Бош қомусимизда юртдошлармиз истак ва хоҳишлари акс этмоқда

Мана икки ойдан ортиқ вақт давомида барча юртдошларимиз томонидан “Ўзбекистон Республикасининг Конституциясига ўзгартиш ва қўшимчалар киритиш тўғрисида”ги Конституциявий қонун лойиҳаси қизғин муҳокамадан ўтказилмоқда.

Ташкил этилаётган муҳокамалар жараёнида фуқароларимизнинг фаол иштирок этаётганлиги, улар томонидан юборилаётган ва билдирилаётган ҳар бир таклиф ўзининг ҳаётий аҳамиятга эгалиги ҳамда чуқур таҳлил ва ўрганишларни талаб этаётганлиги боис, Олий Мажлис Қонунчилик палатаси қарори билан Конституциявий қонун лойиҳасининг муҳокамалар жараёни муддати бир неча бор узайтирилди.

Хусусан, дастлабки белгиланган муҳокамалар жараёнида юртдошларимиз томонидан 50 мингдан ортиқ таклифлар йўлланган бўлса, айни кунга келиб улар сони юз миндан ошиб кетди. Албатта, бу жараёнда ўтган беш йиллик вақт давомида халқ билан мулоқот қилиш, аҳолининг сиёсий саводхонлигини ошириш ҳамда давлат аҳамиятига эга бўлган муҳим ҳужжатлар ва қонун лойиҳаларининг кенг жамоатчилик муҳокамасидан ўтказиш амалиётининг йўлга қўйилганлиги муҳим аҳамият касб этяпти.

Шу боисдан, бугун юртдошларимиз мамлакатимиз тараққиётига хизмат қилувчи ҳар қандай ҳужжат лойиҳасини ишлаб чиқиш жараёнидан тортиб уни ҳаётга татбиқ этилишигача бўлга жараёнларда фаол иштирок этмоқда.

Шунингдек, фуқароларнинг Конституцявий қонун лойиҳаси муҳокамаларидаги фаоллиги ортишида Конституциявий комиссия матбуот хизмати ҳамда мутасадди идоралар томонидан амалга ошириб борилаётган тарғибот ва ташвиқот ишларининг ўрни ҳам юқори албатта.

Жумладан, Конституциявий комиссия матбуот хизмати томонидан фуқароларнинг ўз таклифларини йўллашлари учун яратилган барча имкониятлар орқали йўлланган ҳар бир мурожаати тақдири бўйича қисқа фурсатларда кенг жамоатчилик учун халқчил тилдаги маълумотлар тақдим этиб борилмоқда.

Комиссия томонидан тақдим этилган сўнгги маълумотга кўра, энг кўп таклифлар Конституциянинг “Маъмурий-ҳудудий ва давлат тузилиши” йўналиши бўйича келиб тушмоқда. Кейинги ўринда эса, “Давлат ҳокимиятининг ташкил этилиши”, “Конституцияга ўзгартириш киритиш тартиби” ҳамда “Инсон ва фуқароларнинг асосий ҳуқуқлари, эркинликлари ва бурчлари” йўналишларига келиб тушган.

Шунингдек, юртдошларимиз томонидан “Умумий принциплар”, “Жамият ва шахс” ва “Муқаддима”даги нормаларга оид таклифлар ҳам билдирилган.

Бош қомусимизга ўзгартиш ва қўшимчалар киритиш ташаббуси бугунги кунда энг аввало, юрдошларимизнинг кўнглидаги истак ва ташаббус бўлганлигини муҳокамалар жараёнида билдирилаётган фикрлар ҳамда аҳолининг фаол иштироки мисолида ҳам кўриш мумкин.

Бугун ҳар бир ватандошимиз Бош қомусимиз лойиҳасига билдирилаётган ҳар бир таклифи келажакда Конституциямизнинг чинакамига халқ хоҳиш-иродасини ўзида акс эттиган ҳужжат сифатида қабул қилинишига эришишга хизмат қилишига тўлақонли ишонч билан қарамоқда.

Шу боисдан, биз халқ вакиллари жойларда бўлиб ҳар бир фуқарога Конституциявий қонун лойиҳаси муҳокамалари юзасидан янада кенгроқ маълумотларни тақдим этишимиз, киритилаётган ўзгартиш ва қўшимчалар бўйича тўлақонли маълумот беришимиз даркор.

Мавлуда АТХАМЖОНОВА,

Олий Мажлис Қонунчилик палатаси депутати