Вобкент туманининг энг чекка ҳудудида янги мактабнинг очилиш маросими бўлиб ўтди

Вобкент туманининг энг чекка ҳудуди бўлган «Ўзбакон» маҳалласида янги замонавий мактаб фойдаланишга топширилди. Мустақиллигимизнинг 31 йиллиги муносабати билан бугун «Порлоқ келажак» қишлоғида 40 йил ичида 330 ўринга мўлжалланган 34-сонли мактабнинг тантанали очилиш маросими бўлиб ўтди. Очилиш маросимида Олий Мажлис Қонунчилик палатаси депутати Қодир Жўраев, туман ҳокими Фарҳод Умаров, вилоят Халқ таълими бошқармаси бошлиғи Дилфуза Мустафоева ўқитувчилар, ўқувчилар ҳамда кенг жамоатчилик вакиллари иштирок этдилар. Тадбирда Олий Мажлис Қонунчилик палатаси депутати Қодир Жўраев сўзга чиқиб, Мустақиллигимизнинг 31 йиллиги олдидан мактаб жамоаси ва ўқувчиларга катта туҳфа эканлигини таъкидлади. Шунингдек, мутлақо янгича дизайнда барпо этилган ушбу мактабда ўқувчиларнинг билим олиши учун барча қулайликлар мавжуд. Ушбу яратилган шароитлардан унумли фойдаланиб, Мустақиллик берган неъматларни қадрига етиб яшаш ҳамда Ватанимиз равнақи йўлида олға бориш зарур, - дея таъкидлади, Олий Мажлис Қонунчилик палатаси депутати Қодир Жўраев. Мактаб шинам ва сифатли мебеллар, ўқув ва лаборатория ускуналари, компьютерлар, зарур адабиётлар ва кўргазмали қуроллар билан тўлиқ таъминланган. Эртамиз эгалари бўлган навқирон авлодга қаратилаётган бундай эътибор Ватанимиз келажагига бўлган эътибордир.

Амин ҲОМИДОВ,

Олий Мажлис Қонунчилик палатаси депутати ёрдамчиси