"Адолат" аралашгач, ноҳақ бўшатилган тиббиёт ходими ишга қайтди

Аввал, хабар берганимиздек, жорий йилнинг 24–июнь куни Чироқчи туманида умргузаронлик қилаётган фуқаро туман тиббиёт бирлашмаси юқумли касалликлар шифохонасига мурожаат қилди. Шифохона кундузги муолажа фельдшери Ғ.А. фуқародан касаллик тарихи  дафтарини очиш учун 5000 сўм сўраган. Ушбу воқеадан сўнг бу ҳақидаги хабар ижтимоий тармоқларда кенг тарқалди. Туман юқумли касалликлар шифохонаси раҳбарининг 2021 йил 1 июлдаги буйруғи билан муолажа фельдшери Ғ. А. ишдан бўшатилган ва у билан тузилган меҳнат шартномаси ҳам бекор қилинган.

Ўзбекистон “Адолат” СДП вилоят ва туман Кенгаши депутатлари, фаоллар билан  бўлиб ўтган нохуш ҳолатни атрофлича ўргандик. Туман юқумли касалликлар шифохонаси ходимлари билан юзма-юз мулоқотда фельдшер Ғ.А.ни ҳар томонлама яхши ишлаши ҳақида маълумотларга эга бўлдик. Шундан сўнг муолажа фельдшери Ғ.А.ни ўз ўрнига қайта тиклаш юзасидан мутасадди ташкилотлар ҳамкорлигида кенг қамровли тушунтириш ишларини олиб бордик. Ҳақ йўлидаги уринишларимиз эса зое кетмади.

Бугун Ўзбекистон “Адолат” СДП вилоят ва туман Кенгашига Чироқчи туман юқумли касалликлар шифохонаси бош шифокори С.Боймирзаев имзоси билан хат келди. Унда ёзилишича, шифохона кундузги муолажа фельдшери Азамат Пардаевич Ғозиев юқумли касалликлар шифохонасига ўз ўрнига ишга тикланди. Демак, адолат қарор топди. Биз  партия фаоллари ҳечдан кўра кеч бўлсада, бир фуқарога нисбатан ноҳақ йўл тутилганлигини аниқ далиллар билан исботлаб, уни аввалги иш жойига қайтарганимиздан мамнун бўлдик.

Собир АХМЕДОВ,

Ўзбекистон “Адолат” СДП Чироқчи туман Кенгаши раиси, халқ депутатлари   туман Кенгашидаги Ўзбекистон “Адолат” СДП депутатлик гуруҳи раҳбари