Алимент тўлашдан қочиб…

07.08.2021 10:08:50

Иш юзасидан Фуқаролик ишлари бўйича Жомбой туманлараро иқтисодий судига бордим. Анча одам тўпланган. Судьяни кутиб турганлар қаторига,  навбатга қўшилдим. Одам кўплигидан навбатим келгунича тушлик вақти келиб қолди.  Хамма ҳар томонга тарқалди. Бир чеккада бир аёл билан ёнма-ён туриб қолдик. У-ёқ бу-ёқдан гаплашдик. Табиийки, суд биносига ҳеч ким ўз-ўзича келмайди. Бир биримиздан нима учун бу ерга келганимиз ҳақида суриштирдик.

Маълум сабабларга кўра ажрашаётган экан. Ҳали ажрим қонуний  бўлмасада, бошқа турмуш қилган собиқ турмуш ўртоғи, беш боланинг отасидан алимент пулларини талаб қилиб келган экан.   Ажабланарлиси,  катта корхонанинг таъсисчиси бўлсада, бугунги кунда ўша корхонада қоровул бўлиб ишлаётгандек қилиб кўрсатилган отадан беш нафар фарзанд учун бор-йўғи беш юз минга яқин пул тўланиши бўлди. Бундан ташқари, 5 фарзанди учун яшаб турган уйини бир вақтлар ташлаб кетган ота, эндиликда ўзи ўша уйга яна даъвогарлик қилаётганмиш.

- Ўзи бирга яшаб юрган кезларимизда ҳам доим фарзандларимни, кўпинча кичик ўғлимни тиззасига ўтқазиб олиб «Болаларимга янги ая олиб келаман» деб кўп айтарди - дейди ўша аёл. – Айтгани бўлди. Уйланди. Тўйига Тошкентдан казо-казо санъаткорлар келибди. Майли мен бунга қарши эмасман. Аммо, ўзининг фарзандлари яшаб турган уйни сўраб нима қилади?! 

Номинг ўчсин ажралиш!

Ажралиш ҳақида сўз борар экан, гўшангага энг эзгу ниятлар ила қадам қўяётган ёшларнинг бахти бу тартибда завол топиши, уларнинг не не орзулар ила бошлаган янги ҳаётларининг бир зумда барбод бўлиши кўз олдимизга келади. Энди рақамларга тўхталадиган бўлсак, биргина вилоятимизда ўтган давр мобайнида 34 мингдан ортиқ ажрим ҳолатлари кузатилган бўлса уларнинг кўпчилиги ёш оилаларни ташкил этаётгани ачинарлидир. Бугун ажрим ёқасида турган ёш оила вакиллари билан суҳбат қилар экансиз арзимаган важларни келтиришмоқда. Таажжубланасан киши, бир йигит ҳали ўн саккизга ҳам кирмаган бола, ўзининг синфдоши билан ишқий муносабатда бўлиб, никоҳсиз фарзандли бўлишади. Мажбурликдан оила қурган йигит турмуш қийинчиликларига чидай олмай бугун ажрим ёқасига келиб қолган.

Энди масаланинг ечимга эътибор қаратамиз. Ўсиб келаётган авлодни яхши тарбияласак, келгусида ундан намунали ота-она чиқади.  Халқимизда «Қуш уясида кўрганини қилади», деган нақл бор. Юқоридаги икки фикрни жамлаб якдил хулоса чиқарадиган бўлсак, ҳар икки ҳолатда ҳам оилада ота-онанинг роли муҳим. Аммо, сўнги кунларда кўпгина ажрим ҳолатларига учинчи шахс аралашуви ҳам сабаб бўлаётгани айни ҳақиқат. Биз учинчи шахс дея санаётган ота-оналар ўз фарзандларининг яхши ҳаёт кечиришларини исташади ва ана ўшанинг учун ҳаракат қилишади. Бунинг оқибатида улар на ўзларини ва на фарзандларини тушунишади. Икки ўртада ёшларнинг бир-биридан кўнгли совийди.

Бошқа томондан олиб қарасак, юқорида келтириб ўтган рақамлар ортида ана ўшанча боланинг етим бўлиб қолаётгани ҳеч кимнинг ҳаёлига ҳам келмайди.

Гапнинг индаллоси, бугун бундай ҳолатларнинг олдини олиш мақсадида жамоатчилик назоратини кучайтириш керак. Аразлаб кетишдан  ажрим ёқасига келиб қолмасидан тўғри ва етарлича тушунчаларни бериш лозим.

 

Дилмурод МАҲРАМОВ,

Ўзбекистон “Адолат” СДП Жомбой туман Кенгаши “Ёш адолатчилар” қаноти раиси

Улашинг!

Фикрингизни қолдиринг

Илтимос жавобингизни киритинг

+