“Бир адолатчи - юз аёлга ҳимоячи” лойиҳаси - Сайҳунободда

30 ёшли Феруза Жўраева Сайҳунобод туманининг “Намуна” маҳалласи, Чинорли кўчасида истиқомат қилади. Уч нафар вояга етмаган фарзандлари бор бу аёлнинг турмуш ўртоғи Шерали Жўраев ҳам ишсиз. Қўлида олий маълумотини тасдиқловчи дипломи йўқлиги сабабли эр-хотин давлат ишида ишлай олмайди. Мавсумий ишлар эса ҳамиша ҳам топилавермайди. Маҳалла томонидан хатловга ўтказилганда бу ёш оила “Темир дафтар”га киритилди. Уй бекаси Феруза эса “Аёллар дафтари”га қайд этилди. Шу сабабли у касб ва ҳунар ўрганиш мақсадида қўлидаги чақалоғини қариндошларига қараш учун бериб туман марказида ташкил этилган ўқув курсига қатнади. Тадбиркорликка ўқитиш машғулотлари якунлангач Ферузага тикувчилик йўналишида тадбиркорлик қилиши учун сертификат ҳам беришди. Лекин ушбу сертификатини тумандаги Агро банкка олиб борганида  масъуллардан “кредит олишиз учун бу сертификатиз ўтмайди” деган жавобни олди. Қўлидаги сертификат ва тикувчилик йўналишида ўз тадбиркорлигини очиш ниятида тайёрлаган ҳужжатлари эса кераксизга айланди.

Ўзбекистон “Адолат” СДП Сирдарё вилоят Кенгаши томонидан тузилган ишчи гуруҳининг “Бир адолатчи - юз аёлга ҳимоячи” лойиҳаси асосида Жўраевлар хонадонига ташрифи чоғида оила бекасининг ушбу муаммоси ўртага ташланди. Яъни Феруза банкдан кредит олишида тўсиқ бўлаётган омиллар билан бир қаторда икки ёшгача бола парвариши учун бериладиган моддий ёрдам пулини ҳам олмаётганлигини маълум қилди. Халқ депутатлари туман Кенгаши депутати Пўлат Абдувалиев Феруза Жўраеванинг мурожаатига масъул сифатида бириктирилди ва шу куннинг ўзидаёқ туман маҳалла ва оилани қўллаб қувватлаш бўлими ҳамда тумандаги тижорат банки раҳбариятига оғзаки мурожаат қилинди. Натижада “Аёллар дафтари”да турган Феруза Жўраевага бизнес фаолиятини бошлаши учун кредит маблағи ажратиладиган бўлди.  

Маҳфират Худойбердиева,

Ўзбекистон “Адолат” СДП Сирдарё вилоят

Кенгаши матбуот котиби