Чек қоғозини челакка ташлаш қийинми?

Сўнгги йилларда ҳаётимизга кириб келаётган техника ва технологиялар биз учун кенг имкон ва қулайликлар яратиб, мушкулимизни осон қилмоқда. Бундан барчамиз хурсандмиз, албатта.                                                  Банк пластик карталари энди-энди оммалашаётган 2010-2014 йиллар, ўша вақтда ундан фойдаланишдаги қийинчиликлар кўпчиликнинг ёдида бўлса керак. Ҳамма савдо марказларида ҳам терминаллар ўрнатилмаган ёки ўрнатилган бўлса ҳам пластик карта орқали савдо қилишни истамасдан, уни растанинг тагига яшириб қўйиш ҳолатларининг ҳам гувоҳи бўлдик. Пластик карта орқали савдо қилинганда нархлар сунъий оширилар, бечора истеъмолчи дардини қаерга айтишни билмас эди. Нақд пул зарур бўлиб қолганда эса фоиз эвазига пластик картадаги маблағини нақдлаштирганлар қанча. Ўзимизнинг меҳнат қилиб топган пулимизни 10-15, ҳаттоки 20 фоизини бериб, нақд пул олганмиз ўша вақтларда. Айниқса, чекка қишлоқларда яшовчи аҳолига бу жуда катта қийинчиликлар туғдирган эди.          Мана, бир неча йиллар давомида замонавий техникалар шарофати билан бу каби муаммолар ечимини топди. Бозорлар атрофида, бекатларда пластик карта маблағларини нақдлаштирадиган банкоматлар ўрнатилган. Кечаю кундуз узлуксиз ишлайди. Лекин бизнинг бу имкониятларга муносабатимиз қандай? Бу шароитлардан қай йўсинда фойдаланяпмиз?          Афсуски, кечаги кунимиз кўпчилигимизнинг ёдимиздан кўтарилгандай. Банкомат ўрнатилган қайси хонага қараманг оёқ остида бетартиб ёйилиб ётган чек қоғозлари таъбингизни хира қилади. Ҳолбуки, барча банкомат олдига мана шундай чекларни ташлаш учун челаклар ҳам қўйилган. Баъзи кимсалар банкоматларга шикаст еткизаётгани, атайлаб бузаётгани янада ачинарлидир.                                                                     Ҳа, ҳар бир инсонда ички маданият бўлсагина берилган имкониятни ҳам, яратилган шароитни ҳам қадрига етади. Феълимизда маданиятни яратиш учун эса, аввало ўзимиздаги кибрни енгишимиз зарур. Кеча кимларгадир ялиниб нақдлаштираётган эдик, бизга ҳам хориж мамлакатларидаги каби пластик картадан истаган вақтингда нақд пул ечиб олиш шароити кириб келармикан, дея орзу қилардик. Бугун эса оддий бир чек қоғозини эгилиб челакка ташлашга ҳафсаламиз етмайди. Буни кўриб тўқликка шўхликми бу, дегинг келади.

Зохиджон МУСТАФОЕВ,

Ўзбекистон Адолат СДП Нарпай туман Кенгаши раиси