Депутат аралашгач, маҳаллага ичимлик суви келди

Халқ депутатлари Қашқадарё вилоят Кенгаши депутати Руиддин Раупов аҳоли мурожаатлари билан ишлаш, одамларни қийнаб келаётган муаммоларни ўз вақтида ҳал этишга алоҳида эътибор қаратмоқда. Шу туфайли ҳам кейинги вақтда у раҳбарлик қилаётган депутатлик гуруҳга фуқаролардан кўплаб ёзма ва оғзаки мурожаатлар келиб тушяпти. Худди шундай жорий йил 20 июль куни Қарши тумани Мирмирон маҳалласида яшовчи Дилафруз Норхўжаева қандли диабет касаллиги билан хасталаниб, бир неча йилдан буён даволаниш учун ордер ололмай келаётгани ҳақида мурожаат қилди. Депутат фуқаронинг аризасини обдон ўрганиб чиқиб, унга ҳақиқатдан ҳам амалий кўмак кўрсатиш зарур деган қарорга келди. Фуқаронинг мурожаати бўйича Қарши тумани тиббиёт бирлашмасига депутатлик сўрови чиқариб, даволаниш учун ордер олиб беришга муваффақ бўлди.

Қарши туманидаги Янги боғ қишлоғи аҳолисини кўп йиллардан буён ичимлик сув муаммоси қийнаб келган. Шу камчиликни бартараф этишда амалий ёрдам сўраб, депутат Руиддин Рауповга маҳалла фуқаролари мурожаат қилишди. Шундан сўнг депутатлик гуруҳи аъзолари ва партия фаоллари иштирокида ишчи гуруҳ тузилиб, ҳолат ўрганилди. Қашқадарё вилоят «Ўзсув» таъминот бўлимига депутатлик сўрови юборилиб, одамларни қийнаб келаётган масала ўз ечимини топди.

                                                            Акмал Ҳайитов,

                                                            Партия фаоли.