Депутат сайловчилар билан учрашди

Боғот туман Боғзор маҳалла фуқаролар йиғинида Халқ депутатлари Боғот туман Кенгашига «7 — Зарбдор» сайлов округидан сайланган «Адолат» СДП туман Кенгаши депутати Қадамбой Хўжақовнинг сайловчилари билан учрашуви бўлиб ўтди.

Учрашувда «Адолат» СДП вилоят Кенгаши ходимлари, партиянинг Боғот туман Кенгаши фаоллари ҳамда «Боғзор» маҳалла аҳолиси иштирок этишди.

Депутат Қадамбой Хўжақов сайловчиларга жорий йилнинг иккинчи чораги давомида амалга оширган ишлари тўғрисида ҳисобот берди.

Таъкидланганидек, депутат номига 15 тадан зиёд турли соҳалар бўйича мурожаатлар келиб тушган, шундан 5 та муаммо юзасидан тегишли ташкилотлар раҳбарлари номига депутатлик сўровлари жўнатилиб, ижобий ҳал этилган, 5 та мурожаат жойида оғзаки ҳал этилган, қолган мурожаатларнинг ижроси назоратда олинган. Шунингдек Қ. Хўжақов мансабдор шахс эшитувларида, доимий комиссия ва сессия йиғилишларида иштирок этиб, сайловчилардан тушган таклифлар ички йўллар, ичимлик суви, трансформатор, ишсизлик каби масалалардаги муаммоларни ечимини топишда фаол иштирок этган.

Шундан сўнг депутат сайловчиларини ўйлантираётган муаммолар билан қизиқди. Хусусан, «Боғзор» маҳалласи Илҳом кўчаси №32 уйда яшовчи 1-гуруҳ ногирони Санъатжон Жуманиёзов чарм тикиш машинаси олиш бўйича амалий ёрдам сўраб мурожаат қилди. Мурожаат депутатнинг диққат марказидан жой олди.

Шу маҳаллада яшовчи Ярашбек Собиров оилавий тадбиркорлик қилиш учун кредит олиш бўйича амалий ёрдам сўраб мурожаат қилди. Бу мурожаат ҳам депутат томонидан эътиборга олинди ва туман Агробанк бошлиғига мурожаат қилиниши айтиб ўтилди.

Қудрат Атаниёзовнинг аҳолининг солиқдан муаммоси яъни ҳоким қарори мавжуд бўлмаган турар жойларда ер-мулк солиғи 3 баравар кўпайтириб олинаётгани, маҳалла фаоли Саидмусо Абдираимовнинг 34-сон умумтаълим мактабига ажратилган кўмир ёқилғисининг сифатсиз экани тўғрисидаги мурожаатлар ҳам депутат томонидан эътиборга олинди ва бартараф этиш чоралари бошлаб юборилди.

Фикр ва мулоҳазалар, таклиф ва тавсиялар қизғин кечган учрашув сўнгида депутат сайловчилар қизиққан саволларга атрофлича жавоб берди.

ҚАҲРАМОН РАҲИМОВ
«Адолат» СДП Боғот туман Кенгаши раиси,
туман Кенгаши депутатлик гуруҳи раҳбари.