“Депутатлик отамдан мерос...”

дейди, Халқ депутатлари Мирзаобод туман Кенгаши депутати Акмалжон  Хасанов  биз билан суҳбатда. Дарҳақиқат, 25 ёшли  Акмалжон Ўзбекистон “Адолат” СДП Сирдарё вилоят Кенгаши томонидан номзоди кўрсатилиб 2006-2019 йилларда  Халқ депутатлари вилоят Кенгаши депутати бўлган Тўймурод Шариповнинг  фарзанди ҳисобланади. Демак отасига ҳавас қилган бу йигит учун депутатлик фаолияти бегона эмас. Партиянинг вилоят Кенгаши томонидан “Депутат ҳузурида” лойиҳаси асосида Акмалжон Хасанов табрикланди ва у раҳбарлик қилаётган ишлаб чиқариш корхонасида БПТ ташкил қилинди. Халқнинг ишончига эришиш бу нафақат обрў, балки масъулият ҳам эканлигини яхши англаган Акмалжон бугун ўз тадбиркорлигига эга. Мирзаобод тумани “Тошкент” маҳалласидаги  “Finiba tex” тикув фабрикаси ва бир қатор фаолият турларига бошчилик қилади. Мутахассислиги иқтисодчи бўлган ёш тадбиркор бугун кўплаб аҳолини иш билан банд қилган.                                                            -2015 йилда тумандаги “Тошкент” маҳалласидаги ушбу бинони “0” қийматда 2 миллиарлд  миқдоридаги инвеститция киритиш ва  15 та янги иш ўрни яратиш шарти билан  олган эдик. Авваллари мактабнинг эски биноси бўлган бу иншоатда ҳозирда мебел ва махсус иш кийимлари ишлаб чиқишга мўлжалланган тикув цехларимиз фаолият олиб бормоқда. Шу маҳалланинг икки юзга яқин аҳолисни иш билан таъминладик. Шунингдек туманнинг “Баҳористон” маҳалласи ҳудудида ҳам 2020 йилда тикув фабрикасини очишга муваффақ бўлдик ва ҳозирда маҳалланинг юз нафар хотин-қизларига янги иш ўринларини яратиб бердик. Тадбиркорлик фаолиятимизнинг яна бир йўналишида 50 та авто техникаларимиз ҳам мавжуд бўлиб, қурилиш, таъмирлаш ва қишлоқ хўжалиги соҳасида иш олиб бормоқда. Бу йўналишда ҳам 50 дан ортиқ  йигитлар фаъолиятини олиб бормоқда. Шунингдек  ўтган йилда туман ҳудудида 500 гектар ер майдонида  ғалла ва пахта етиштириб шартномавий режани бажардик. Мазкур  хўжалигимизда  ҳам эллик нафар аҳоли иш билан банд бўлди. Ҳозирда эса чорвачиликка мўлжалланган, 200  бош қорамол ва 1000 бош қўй  боқиладиган  фермани ташкил қилаяпмиз. Март ойида иш бошлаш ниятидамиз.  Шунингдек  100 гектар кўлчилик ҳам ташкил қилиб ўтган йилда интенсив шароитда 5 хил балиқ етишитириб бир миллард сўмга яқин даромад олдик. Тўғрисини айтсам,  дастлаб шу бинони олганимда режаларим кўплигидан қайси йўналишдан бошлашни билмаганман. Бугун эса катта бир жамоага эга бўлдим.  Аҳолининг ишончи билан яқинда мана депутатликка ҳам сайландим. Муҳими сенга билдирилган  ишончни оқлай олишда экан. Чунки халқнинг ишончи инсонни ҳаракат қилишга, изланишга, меҳнат қилишга ундар экан. Бундан албатта фахрланаман. Тадбиркор ёки депутат бўламанми ҳамиша халқнинг хизматида бўлиш ниятидаман - дея  қўшимча қилди Акмалжон  Хасанов.

Ҳа, ёш бўлишига қарамай юксак марраларни кўзлаётган,  мақсадлари улкан Акмалжон Хасанов бугун нафақат тенгдошларига балки катта ёшдагиларга ҳам ўрнак бўларли ишларни амалга оширмоқда, десак муболаға бўлмайди. Зеро ақл ёшда эмас бошда эканлигини бу йигит аллақачон ўз ҳаёти мисолида исботлаб бўлди.

Маҳфират ХУДОЙБЕРДИЕВА,

Ўзбекистон “Адолат” СДП Сирдарё вилоят Кенгаши матбуот котиби