Эҳтиёткорликни бир лаҳза ҳам унутмаслик зарур!

Бугуннинг талаби ўзгача. Олдинги ҳаёт ҳаёли билан яшаш тўғри келмайди. Чунки коронавирус пандемияси  сабаб энг машаққатли синовни кечиряпмиз. Карантин режими босқичма-босқич юмшатилиб,  шу тариқа   секинлик билан меҳнат фаолияти йўлга қўйилди. Барчамиз яна иш фаолиятимизни бошлаган бўлсак-да, карантин чекловлари бутунлай бекор қилинмаганлигини эсдан чиқариб қўйдик.

Иш юзасидан Термиз шаҳри кўчаларини кезар эканман, бирор кишида ниқоб борлигини кўрмадим. Юртдошларимиз атрофимизда вирус ҳали ҳам мавжуд эканлигини эсдан чиқариб қўйишди. Карантин қонун-қоидаларига умуман амал қилминмаяпти десак, муболаға бўлмайди.

Юртимиз бўйлаб катта тезликда тарқалаётган, кўплаб инсонларнинг ўлимига сабаб бўлаётган бу инфекциянинг тарқалишига қарши давлатимиз томонидан барча ресурслар ишга солиниб, зарурий ва қатъий чора-тадбирлар амалга оширилмоқда.  Коронавирус инфекцияси тарқалиб кетишининг олдини олиш бўйича берилаётган тавсиялар ва шахсий гигиена қоидаларига фуқароларнинг қатъий амал қилиши бот-бот такрорланаётган бўлса-да, нимагадир ҳеч кимнинг ҳаёлига келмайди.

Коронавирус инфекцияси бутун дунёни таҳликага қўйган шу дамларда ота-онамиз, болаларимиз, қўни-қўшниларимизнинг ҳаётини ўйлашимиз, эртанги кунга умид билан қарашимиз керак. Бу балони енгишда шифокорлар маслаҳатига қатъий амал қилиш билан бир қаторда назаримда, сабр- тоқатли бўлмоқ муҳим аҳамият касб этмоқда. Ахир, ота-боболаримиз “Сабр қилсанг ғўрадин ҳалво битар”, деб бежиз айтишмаган. Сабрли бўлсак, бу балони енгиб ўтишимиз муқаррар.

Ҳар бир нарсанинг интиҳоси бор. Доно халқимиз “Ойнинг ўн беши ёруғ”, деб топиб айтган. Қолаверса, ҳаёт бир жойда тўхтаб қолган эмас. Шундай экан, мен барча юртдошларимни карантин қоидаларига қатъий амал қилишга даъват этаман.

Дарҳақиқат, халқимиз бир лаҳза бўлсин эҳтиёткорликни унутмаслиги зарур. Аввало, оилада, иш жойимизда карантин қоидаларига қатъий амал қилиш ёдимиздан кўтарилмасин. Янги ҳаракатлар билан ибрат бўлиш каби фазилатлар ҳар бир фуқарога тегишлидир. Ўз соғлигимизни ўзимиз асрашимиз зарур. Эътиборсизликнинг оқибати фақатгина ўзимизга эмас, балки фарзандлар, яқинларга ҳам қанчалик салбий таъсир кўрсатишини ҳис этдик. Ҳатто ўз қўлингиз, юзингиз, кийган кийимингиз токи неча бор кириб чиқадиган эшигингиз тутқичини ҳам озода сақланг!

Асрлар давомида не-не машаққатларни, турли синовларни енгиб ўтган донишманд халқимиз, албатта, бу балодан ҳам эсон-омон, бағри бутунликда чиқиб олади.

Биздан фақатгина ҳушёрлик ва ўзимизни ҳамда муқаддас оиламизни асраш, қўйилган тақиқларга ва тартибга фаол инсоний позицияда туриб амал қилиш ҳамда тиббиёт ходимлари тавсияларини бажариш талаб қилинаётган экан, барчамиз шунга дахлдор, масъул бўлган соҳалар меҳнатини қадрлашимиз керак.

Назокат ХИДИРОВА,

Халқ депутатлари Термиз шаҳар Кенгаши депутати