“Ҳалоллик вакцинаси – тараққиёт гарови”

03.03.2022 10:03:05

Коррупция бу - давлат ва жамиятнинг ривожига, халқнинг адолатга бўлган ишончига жиддий путур етказадиган хавфли жиноят ҳисобланади. Бугунги кунда мазкур иллат бутун дунёда  тараққиёт кушандаси сифатида баҳоланаётгани бежиз эмас. Бирлашган Миллатлар Ташкилоти Бош Ассамблеясининг 2003 йил 21 ноябридаги резолюциясига мувофиқ 9 декабрь – Бутунжаҳон коррупцияга қарши курашиш куни сифатида нишонланмоқда.

Куни кеча “Адолат” СДП Наманган вилоят Кенгаши томонидан Мингбулоқ туманида ташкил этилган конференцияда ана шу ҳақда фикр юритилди. “Ҳалоллик вакцинаси –тараққиёт гарови” мавзусидаги тадбирда партиямиз фаоллари, ҳуқуқшунослар, таълим ва тиббиёт ходимлари, меҳнат фахрийлари ва ёшлар қатнашдилар.

Конференцияни “Адолат” СДП Мингбулоқ туман кенгаши “Ёш адолатчилар” қаноти раиси, “Ёшлар парламенти” аъзоси Нозима Акбарова очди ва олиб борди. Сўзга чиққан туман ҳокимининг маслаҳатчиси Раънохон Холиқова, “Адолат” СДП вилоят Кенгаши раисининг ўринбосари Ёрқиной Ҳожиматова,  туман адлия бўлими бошлиғи Сарваржон Абдуназаров ва бошқалар партиямиз томонидан ҳам бу соҳада қатор ишлар амалга оширилаётганлигини таъкидладилар. Шу билан бирга тарғаибот-ташвиқот ишларини янада кучайтириш, айниқса, ёшлар билан ишлашни такомиллаштириш зарурлигини қайд этдилар.

Хусусан, бу соҳада ўтган йили  партия ташкил этган “Коррупция ёшлар нигоҳида” иншолар танлови катта аҳамиятга эга бўлди. Унда мамлакатимиздаги умумтаълим мактаблари, коллеж ва лицейларнинг минглаб ўқувчилари иштирок этдилар. Яқинда ёш ижодкорларнинг энг сара асарларини Тошкентдаги “Адолат” нашриёти китоб ҳолида икки минг нусхада чоп этди. Анжуманда ана шу тўплам тақдимоти ҳам ўтказилди. Китобга иншолари киритилган мингбулоқлик муаллифлар – Саида Абдураҳмонова (13-давлат ихтисослаштирилган мактаб-интернати) ва Дилшода Ҳамиджонова (13-умумтаълим мактаби) “Адолат” СДП вилоят Кенгашининг Фахрий ёрлиқлари ва эсдалик совғалари билан тақдирландилар.

 – Биз мазкур мавзу бўйича ўтказиладиган тадбирлар дастурини ишлаб чиққанмиз, - дейди вилоят партия Кенгаши раиси Исроилжон Жўраев. – Коррупцияга қарши курашнинг аҳамиятини иложи борича кўпроқ фуқароларга етказмоқчимиз. Ҳаммамиз бир ёқадан бош чиқариб ишласак, албатта, бу иллатни бартараф этамиз.

Нурбек  АБДУЛЛАЕВ,

“Адолат” СДП Наманган вилоят Кенгаши

 Матбуот котиби.

 

 

 

 

Улашинг!

Фикрингизни қолдиринг

Илтимос жавобингизни киритинг

+