Ҳасратда емирилган асаблар

Шу кунларда ижтимоий тармоқларда боласини калтаклаётгани  аёл акс этган видеолавҳа тарқалди. Албатта, меҳмондўст ва болажон халқимизга ёт бўлган бу каби тушунчаларнинг бугунги кунда кўпайиб бориши миллатимиз шаънига доғ бўлиб қолмоқда. Ҳалқимизда “типратикан боласини юмшоғим, қўнғиз эса оппоғим дейди” каби нақллар бор. Наҳотки  инсон онги, иродаси ҳайвон онги иродасидан  ҳам сустлашиб бормоқдами?                                              

Ёхуд танганинг иккинчи томонига назар ташлаб ҳеч бир она фарзандига ёмонликни раво кўрмайди қабилида сўз юритсак.  Бу аёлнинг ҳам орзулари осмон бўлгандир? У ҳам жигарбандини бағирлаб хурсандчилигининг гувоҳи бўлишини истагандир?! Оналик бахти нашидасини биринчи бор туйганида фарзандларимни калтаклайман деб ўйламагандир? Бир онанинг фарзандини, жигарбандини бу қадар хўрлашига қандай воқеа ёки воқеалар сабаб бўлмоқда ахир шу мурғак жонни шу она тўққиз ой юрагининг ёнида кўтарганмасми?

Шу каби саволлар билан масалага чуқурроқ ёндашиб онанинг турмуш шароити, унга қилинаётган муомала, руҳий касалликлар шифокорига эҳтиёжи борми ёки оилада маънавий, ҳуқуқий саводхонликни ошириш керакми? Ана шу каби муаммоларни ўрганиш масаланинг туб илдизи сари олиб боради. Бизнингча, айнан ана шундай саволларни бугунги кунда кўпайиб кетаётган боласини хўрлаётган онанинг, эрининг қўлида хор бўлаётган аёлнинг, бир парча ер учун жигарининг жонини олиш даражасига борган оға-инининг ишларида беришимиз лозим. Зеро, бола онаси қўлида хўрланаётган, аёли эри қўлида хор бўлаётган, бир парча ер учун жигари қўлида жон бераётган, юраги жиз этмай ватанни майдалаб сотаётган миллат таназзулга учраши муқаррар!

Феруз Абдуковулов,

 Ўзбекистон “Адолат” СДП Самарқанд вилоят Кенгаши,

Олий Мажлис Қонунчилик  Палатаси депутати ёрдамчиси