Ҳеч кимнинг хотиржам бўлишга ҳаққи йўқ

23.06.2021 13:06:00

Cўнгги кунларда коронавирус инфекцияси тарқалиш суръати янада авж олгани, касалликка чалинганларнинг кўпчилиги аҳоли орасида аниқланаётгани, энг ёмони, “Covid-19” туфайли шифохоналарда беморлар сони тобора ортиб бораётгани ҳар биримизни сергакликка чорлайди.

Бугун дунёда анчагина катта рақамларни  қамраб олган коронавирус статистикаси одамни ҳушёрликка ундайди. Бу касаллик билан ҳазиллашиб бўлмаслигини тушунтиради. Ана шу аҳволни кўриб хулоса чиқаришимиз, касалликни ўзимизга юқтирмаслик учун санитария-гигиена қоидаларига риоя қилишимиз керак. Умуман айтганда, бу касаллик инсоният “боши”га келди. Ундан қайси давлат қандай йўллар билан чиқиб кетади, бу ҳали аниқ эмас. Хитойдаги санитария ва гигиена, карантин ва чекловлар иш берганини ҳаммамиз билиб турибмиз. Хитой халқи бугун эркин нафас олаяпти. Бошидан ўтган бу касалликдан чуқур хулоса чиқариб олди. Аммо бошқа давлатлар-чи? Бугун ҳеч кимнинг хотиржам бўлишга ҳаққи йўқ. Ҳеч бўлмаса уйда болаларимизга гигиена қоидаларини ўргатиб туришимиз, ниқобсиз ҳатто кўчада тўп тепишга ҳам чиқармаслигимиз керак. Бегоналар билан масофа сақлаб гаплашишни ўргатайлик. Масофа сақлаш ушбу касалликни чақирмасликда катта рол ўйнаяпти. Демак, масофа сақлаш санитария-гигиенада муҳим ўрин тутмоқда. Ҳаммамиз бир ёқадан бош чиқариб ушбу касалликка қарши курашиш, бунда ўз атрофимиздагиларга соғлом турмуш тарзини тарғиб қилишимиз керак. Аслини айтганда гигиена ҳам соғлом турмуш тарзи.

Бугун кўчада кўпчилик ниқобсиз ҳолатда юрибди. Ҳа, десангиз,  ниқоб уйда қолибди, дейди. Афсус, бундай фикрлашга ўрганиб қолиш яхши эмас. Касалликни юқтириб олиш, чекловлар ва карантин қоидаларига амал қилмасликдан келиб чиқмоқда. Ҳаво-томчи орқали юқадиган бу касалликнинг аниқ кўриниб турадиган юқиш белгиси йўқ. Фақат уни юқтириб олган одамни лаборатор анализдан ўтказиб билиш мумкин. Сизнинг соғлиғингиз эса кўчадан топиб олинадиган нарса эмас. Шундай экан, “Ўзини асраганни Худо ҳам асрайди” деган мақолга риоя қилинг.

Ҳурматли юртдошлар, карантин қоидаларига амал қилинг. Чунки бу сизнинг, менинг, уларнинг, умуман, одамларнинг, халқимизнинг соғлиғи учун фойдали. Бу бизнинг ҳаётимиз, бу бизнинг келажагимиз. Бу бизнинг соғлиғимиз. Шундай экан, соғлиғимиз, ҳаётимиз ва болаларимизни биринчи ўринга қўйиб улар қўлига ниқоб, антисептик гел, қўлқоп берайлик. Улар ўзларини вирусли инфекциядан асрашни, ҳимоя қишини, уни чекинтиришни ўргансин. Бизнинг ақлли эканимиз, ана шунда билинади. Бизнинг Ибн Синонинг авлоди эканлигимиз ана шунда ўз исботини топади. Биз тиббиёт соҳасига катта ҳисса қўшганлар авлодимиз деб фахрлансак бўлади, қачонки бу пандемиядан ўз тозалигимиз ва гигиенага садоқатли эканлигимизни исботлаб, кам зарар билан чиқиб кетсак. Бунинг учун бизнинг диққат ва эътиборимизни йиғишимиз ва тоза-покиза бўлиб юришимиз талаб этилади. Ахир “Саломатлик - туман бойлик”, деб айтган доно халқимиз.  Унутманг-ки, ўзингизнинг ва яқинларимизнинг соғлиғини таъминлаш ўз қўлингизда. Шундай экан, барчангиздан зарурий ва оддий эҳтиёт чораларини кўришингизни сўраб қоламиз.

Муҳиба БАБАБЕКОВА,

Ўзбекистон “Адолат” СДП Самарқанд вилоят Кенгаши раиси,

Халқ депутатлари Самарқанд шаҳар Кенгаши депутати

Улашинг!

Фикрингизни қолдиринг

Илтимос жавобингизни киритинг

+