Хотин-қизлар спорти — соғлом миллат пойдевори

Ўзбекистон “Адолат” социал-демократик партияси Тошкент вилоят кенгаши ташаббуси билан Ўзбекистон давлат жисмоний тарбия ва спорт университети ҳамкорлигида “Хотин-қизлар спорти — соғлом миллат пойдевори” шиори остида спорт тадбири ташкил этилди. Унда ”Адолат” СДП Тошкент вилоят кенгаши раиси Гулнора Аҳмедова, партиянинг Халқ депутатлари Чирчиқ шаҳар Кенгаши депутати, Ўзбекистон Белбоғли кураш Федерацияси раиси Равшан Дастиров, маҳаллий Кенгаш депутатлари, бошланғич партия ташкилот аъзолари, университет ўқитувчи ва талабалари ҳамда ОАВ вакиллари иштирок этишди.

Таъкидлаш зарурки, хотин-қизлар спорти жисмоний тарбиянинг асосий бўғини ҳисобланади. Бугунги кунга келиб спорт ва жисмоний тарбия аёлларимизнинг турмуш тарзининг ажралмас қисмига айланиб қолди. “Адолат” СДП Тошкент вилоят кенгаши томонидан ҳам турли соғломлаштириш акциялари, мусобақалар, турнирлар, маърифий тадбирлар ўтказиш орқали жисмоний маданият ва спорт билан шуғулланишни хотин- қизларнинг кундалик ҳаёт тарзига айлантиришга алоҳида аҳамият қаратилмоқда. Бу эса келажак авлодни яратувчиси опа-сингилларимиз соғлигини мустаҳкамлашга, улар ўртасида соғлом турмуш тарзини шакллантиришга хизмат қилмоқда, қолаверса, спорт соҳасида ҳам қизларимиз жаҳон спорт майдонларида юқори марраларни забт этиб, ўзбек аёлларининг, қизларининг нималарга қодир эканликларини намойиш этиб келишмоқда.

Тадбир Тошкент вилоятининг турли ҳудудларидан келган спортсевар хотин-қизлар, талабалар ва спорт мутахассисларини бир жойга тўплади. Мусобақанинг очилиш маросимида ”Адолат” СДП Тошкент вилоят кенгаши раиси Гулнора Аҳмедова сўзга чиқиб, тадбирнинг аҳамияти ва мақсадлари ҳақида гапирди. Хотин-қизлар спортини ривожлантириш жамиятнинг барча қатламлари учун муҳимлигини, айниқса ёшлар орасида соғлом ва фаол турмуш тарзини тарғиб қилиш зарурлигини таъкидлади.

Мусобақа ўзбек миллий спорт турларидан бири белбоғли курашга бағишланиб, унда 20 нафардан зиёд курашчи қизлар иштирок этдилар. Маълумки, миллий спортнинг бу тури милоддан аввалги 2-3 асрларда пайдо бўлиб, айни кунгача ривожланиб келмоқда.

 Иштирокчи хотин-қизлар 3 гуруҳда юқори маҳорат ва куч-қувват билан беллашдилар, томошабинлар эса уларнинг чиқишларини олқишлаб туришди.

Тадбир давомида спорт мусобақаларидан ташқари, турли маърифий ва маданий дастурлар ҳам ўтказилди. Хотин-қизлар спорти бўйича маърузалар, соғлом турмуш тарзи ва тўғри овқатланиш ҳақида маслаҳатлар берилди. Шунингдек, машҳур спортчилар ва мутахассислар иштирокида мастер-класслар ташкил этилиб, иштирокчилар ва томошабинлар ўзларини қизиқтирган саволларга жавоб олиш имкониятига эга бўлдилар.

“Хотин-қизлар спорти — соғлом миллат пойдевори” мусобақаси нафақат спортчилар, балки барча қатнашчилар учун ҳам катта илҳом манбаи бўлди. Тадбир ниҳоясига етгач, ғолиб ва совриндорлар муносиб равишда тақдирландилар. Уларга ”Адолат” СДП вилоят Кенгашининг эсдалик совғалари, диплом ва медаллар топширилди. Шунингдек, фаол иштирокчиларга ҳам алоҳида совринлар берилди.

Мусобақанинг муваффақиятли ўтказилиши Ўзбекистонда хотин-қизлар спортига бўлган эътиборнинг янада ошиши ва бу соҳадаги давлат сиёсатининг самарали амалга оширилаётганлигини кўрсатади. “Адолат” СДП Тошкент вилоят кенгаши ҳамда Ўзбекистон давлат жисмоний тарбия ва спорт университети бу каби тадбирларни келажакда ҳам мунтазам ўтказишни режалаштириб олишди. Бу эса нафақат спортчилар, балки бутун жамият учун катта фойда келтиради.

Мухтасар қилиб айтганда, “Хотин-қизлар спорти — соғлом миллат пойдевори” спорт мусобақаси нафақат спортчилар, балки барча иштирокчилар ва томошабинлар учун ҳам унутилмас воқеа айланди. Бу тадбир барча қатнашчиларни бирлаштириб, уларга янги дўстлик алоқалари ва қизиқарли тажрибалар бағишлади.  

“Адолат” СДП
Тошкент вилояти Кенгаши
Матбуот хизмати