Ҳукуматнинг вазифаси “sms” юборишдан иборатми?

Ўзбекистонда бир неча кундан буён ўта юқори ҳаво ҳарорати кузатилмоқда. Бундай ҳолатларда оддий аҳоли учун Ўзбекистон ҳукумати қандай ҳимоя чора-тадбирларини амалга оширди? Ёзнинг жазирама  иссиғида жамоат транспортларида совитгичлар қўйилиши назарда тутилдими? Асло йўқ! Қурувчилар, ҳайдовчилар, ободонлаштиришда айнан кўчада ишловчи ходимлар, жамоат транспортларида фаолият кўрсатувчиларни иссиқдан ҳимоялаш ҳақида ҳеч бир янгилик эшитмадим. Яна камига шундай жазирамада автомобил эгаларининг ўз шахсий мулкларини “тонировка” қилдиришлари ҳам пулли қилиб қўйилганини нима деб аташ мумкин? “Ўзинг учун ўл етим” дейликми ёки “Ўзингники ўзагингни ўртаркан” деймизми ... Ёки ҳукуматнинг вазифаси фақатгина телефонимизга аномал иссиқдан ўзимизни эҳтиёт қилишимиз кераклиги ҳақидаги хабарни жўнатиб қўйиш билан чекланганми?!

Бу мазмундаги хабарларни ўқиб Ўзбекистонда хизмат кўрсатган артист, сўз устаси Хожибой Тожибоевнинг “Ана, куйдинг” деган машҳур жумласини эслайман. Бюджет учун ортиқча юк бўлади, дерсиз лекин жойларда уюштирилаётган керак-нокерак маданий тадбирларга кичкина маблағ ажратилмаябди. Бир ойда камида 4-5 марта ўтказиладиган бундай тадбирларнинг ҳар бирига ўртача 30-40 миллион сўмлар атрофида пул сарфланади. Бу эса ҳар бир тадбир маблағига 10-15 та, бир ойда эса 50-60 та жамоат транспорти учун совитгичлар олиш мумкин дегани. Тадбирлар учун мўлжалланган маблағларни жамоат транспортига йўналтириб бўлмайдиган расмиятчиликлар ҳам йўқ эмас. Шунинг учун Молия вазирлигидан тортиб қуйи молия бўлимларигача, нафақат иқтисод соҳаси билимдонларини, балки мантиқан ва соғлом фикрлай оладиган соҳа эгаларини ишга олиш тизимини яратиш керак.

Умуман, барча соҳаларда малакали кадрлар етишмовчилиги энг оғриқли нуқталаримиздан эканлиги аён бўлиб турибди.

Айгул ПЕРНЕБЕКОВА,

Ўзбекистон “Адолат” СДП

Мирзо Улуғбек тумани Кенгаши раиси