Инсон манфаатлари устун бўлган жамият кучлидир

Таъкидлаш керакки, охирги вақтларда жамиятимизда инсон ҳуқуқларининг таъминланиши, инсон омилини қадрлашга бўлган муносабат туб ижобий ўзгаришларни ясамоқда. Бунинг исботи сифатида 2021 йил 1 сентябрдан бошлаб ҳайдовчилардан автомототранспортни бошқариш учун ишончнома (нотариал тартибда тасдиқланган), техник кўрикдан ўтказилганлиги тўғрисидаги маълумот, автотранспорт воситалари ойналарининг тусини ўзгартиришга (қорайтиришга) рухсатномалар берилиши электрон шаклга ўтказишнинг жорий этилаётганлиги, бу билан ҳайдовчидан ортиқча ҳужжатларни талаб этиш тартиби бекор қилинаётганлигини эътироф этиш жоиз. Ушбу тизимнинг электронлашиши рақамли технологияларни амалий ҳаётга кенг жорий қилинаётганлигидан даракдир. Шунингдек, бу турли ҳил коррупцион ҳолатларнинг олдини олишда қўл келади.

Илгари айниқса, жазирама ёз кунларида автоулов хайдовчиларига қийин бўларди. Яқин йилдан бошлаб “тонировка”га рухсат берилди. Аммо бу ҳам муаммонинг тўлиқ ечими эмас. Негаки, тонировка пулли қилиб қўйилди. Айрим каттакон-у бойлар учун арзимас бўлиб кўринган ушбу пулли тўлов аҳолининг катта қисми учун оғирлик қилади. Масаланинг бу томонига ҳам эътибор қаратилиши зарур, деб ҳисоблайман. Афзаллик жиҳати, рухсатнома олиш учун фуқаролар аввалари ҳали у ёқ ҳали бу ёққа чопишган бўлса, электронлаштириш орқали турли хил оворагарчиликларнинг олди олинади. Бу эса халқимизни ўйлаб амалга  оширилаётган оқилона тадбирдир.

Меҳринисо БОБОНАЗАРОВА,

Ўзбекистон “Адолат” СДП

Тошкент шаҳар Кенгаши

матбуот котиби