Инсонпарварлик сиёсатининг амалий тасдиғи

Мамлакатимиз ҳаётида муҳим ўринга эга бўлган байрамлар арафасида бағрикенглик, инсонпарварлик, кечиримлилик каби халқимизга хос эзгу фазилатлар кўлами янада кенгаяди. Хусусан, бу Муборак Рамазон ҳайити арафасида яна бир бор намоён бўлди.

Байрам муносабати билан Юртбошимиз Шавкат Мирзиёев томонидан “Озодликдан маҳрум этиш жазосини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида"ги Фармон имзоланди. Бу давлатимиз раҳбари томонидан мамлакатимизда олиб борилаётган инсонпарварлик  ғояларининг ва  гуманистик сиёсатнинг амалий тасдиғи сифатида кўплаб оилаларга қувонч, шодлик ва умид олиб кирди.

Ҳужжатга кўра, Конституциясининг 93-моддаси 23-бандига асосан жазо муддатини ўтаётган ҳамда қилмишига чин кўнгилдан пушаймон бўлган ва тузалиш йўлига қатъий ўтган 100 нафар фуқаро афв этилди.

Афв этилган шахсларнинг 3 нафари асосий жазодан тўлиқ озод этилди, 43 нафари жазони ўташдан муддатидан илгари шартли озод қилинди, 10 нафарининг озодликдан маҳрум этиш жазоси енгилроқ жазо билан алмаштирилди. Шунингдек, 44 нафар шахсларга тайинланган озодликдан маҳрум этиш жазосининг муддатлари қисқартирилди.

Афв этилганларнинг 4 нафарини 60 ёшдан ошган эркаклар ташкил этади. Демак, энди қарилик гаштини сураман, фарзандларимнинг ҳузур-ҳаловатини кўраман деганда, панжара ортида ўтирган фуқароларнинг афв этилиши уларнинг оиласи, ўғил-қизлари ҳамда набиралари учун катта қувончга сабаб бўлганлигини тассаввур қилиш қийин эмас.

Фармон ижроси юзасидан афв этилган шахсларни оиласи ва яқинлари бағрига қайтариш, ижтимоий ҳаётга мослашиб, фойдали меҳнат билан шуғулланишлари, соғлом турмуш тарзини йўлга қўйиб, жамиятда муносиб ўрин топишлари учун уларга кўмак бериш бўйича барча тадбирлар режалаштирилган.

Нима бўлганда ҳам, уларнинг ўз оиласи бағрига, фарзандлари олдига қайтгани ҳам бир бахт. Энг муҳими, давлатимиз томонидан афв этилган ҳамюртларимизнинг жамиятда муносиб ўрнини топиши учун ҳам алоҳида ғамхўрлик қилинаётганидир.

Ориф ШУКУРОВ,

Ўзбекистон “Адолат” СДП

Жиззах вилоят Кенгаши раиси