Изчил ёндошув зарур

Мана, икки йилдирки, тождор вирус дунёни ларзага келтириб турибди. Ўтган давр мобайнида бу хавфли хасталик етиб бормаган жой қолмади. Юз бераётган ҳолатлар инсоният ҳозирча пандемияни тўла енгиш учун имкониятларга эга эмаслигини кўрсатмоқда. Тиббиёт тизимининг салоҳияти чекланганлиги ҳам билиниб қолди. Ҳатто Жаҳон соғлиқни сақлаш ташкилотининг баъзан бир-бирини инкор этувчи тавсияларни тарқатаётгани кенг жамоатчиликда норозилик уйғотиб, аҳолида турли гумонлар туғдирмоқда. Яқинда аниқланган “омикрон” штамми ҳақидаги гап-сўзлар  бунга мисол бўла олади.

Бир неча кун аввал Ўзбекистонда ҳам республика махсус комиссиясининг йиғилишида  коронавирус инфекциясининг янги тури кириб келишига йўл қўймаслик мақсадида бир қатор янги тартиб ва чекловлар белгиланганлиги ҳақида хабар тарқатилди. Хусусан, энди хориждан ташриф буюрувчилар камида 72 соат олдин топширилган коронавирус инфекциясига ПЗР тест натижаси бўйича манфий кўрсаткичга эга маълумотномага эга бўлишлари лозим. Акс ҳолда  аэропорт, темир йўл вокзаллари ва чегара ўтказиш пунктларида ташкил этилган коронавирус инфекциясига экспресс тест топширишлари шарт. Шунингдек, Австралия, Австрия, Бельгия, Буюк Британия, Германия, Дания, Исроил, Италия, Нидерландия, Чехия ва Миср давлатлари ҳудудидан Ўзбекистон Республикаси ҳудудига кириб келувчи йўловчилар юқоридаги талаблар бажарилгандан ўн кун давомида мажбурий уй карантини ёки ўз ҳисобларидан меҳмонхонага карантинга жойлаштирилади. Қолаверса, Янги йил байрамини  оила даврасида ўтказиш юзасидан тавсиялар берилди.

Бундай чоралар бошқа давлатлардан кўчирилганини осонгина пайқаш мумкин. Лекин махсус комиссиянинг ўзи эпидемиологик вазиятни барқарорлаштириш учун нима иш билан шуғулланаётгани номаълум. Ҳамма ерда юзлаб кишилар қатнашаётган тадбирлар, тўйлар ва бошқа маросимлар давом этмоқда. Ахир, улар инфекция тарқалишининг ҳақиқий ўчоғи эмаслигига ким кафиллик беради?

Ёки коронавирусга қарши эмлаш масаласини олайлик. Шу ҳақда қанун ҳам қабул қилинди. Аммо унинг ижроси қай аҳволдалиги номаълум. Нега қилинаётган ишлар таҳлил этилмайди? Кўрилаётган чоралар ҳақида хабардор этиб турилмаётганининг сабаби нимада? Ҳар бир киши шу тўғридаги маълумотларга эга бўлишга ҳақли-ку... 

Бу фикрларни айтишдан мақсад шуки, ҳар бир фаолиятда изчиллик зарур. Шу жумладан, республика махсус комиссиясининг ишида ҳам.

                                                                                     Нурбек АБДУЛЛАЕВ,

“Адолат” СДП Наманган вилоят  Кенгаши матбуот котиби