Йигирма йилдан буён газсиз яшаётган аҳоли

Халқ депутатлари Гулистон туман Кенгашидаги Ўзбекистон “Адолат” СДП депутатлик гуруҳи аъзолари томонидан партиянинг туман Кенгаши билан ҳамкорликда “Муаммо билан юзма-юз” лойиҳаси ташкил этилди. Манзил эса туманнинг “Деҳқонобод” шаҳарчасидаги “Ғаллаорол” кўчаси бўлди. Бу ҳудуддан сайланган туман Кенгаши депутати Анваржон Холмирзаев ўз сайловчилари билан мулоқот қилар экан, депутатлик гуруҳининг эътиборига аҳолини ўйлантириб келаётган бир қатор масалаларни ҳавола қилди. Халқнинг мурожаатига асос бўлган масалалар рўйхатидан биринчилардан бўлиб ичимлик суви билан таъминланмаганлик муаммоси ўрни олди. Яъни ушбу кўчада мавжуд бўлган 72 та хонадонга ичимлик сувининг қувури олиб кирилмаган.

Аҳоли эса кўп йиллардан буён ичимлик сувини 200-500 метр узоқликдаги масофадан ташиб келтиради. Бу эса ёш болали аёллар ва ёши кекса нуронийларга қийинчилик туғдирмоқда. Депутатлар ушбу масалани ўрганиш асносида бир қизиқ ҳолатга дуч келишди. Яъни, аҳоли вакиллари ичимлик сувини бошқа кўчадан ташиб келишига қарамай сув учун тўловни мунтазам тўлаб келади. Бу вазиятда аҳолининг  истеъмолчи сифатидаги ҳуқуқлари ҳам бузилаётгани депутатларнинг сўровига асос бўладиган бўлди. Шунингдек ушбу кўчада табиий газ мавжуд эмас.

- Мана  йигирма йилдан буён газ ёқмаймиз. Ўтин билан овқат пиширамиз, совуқ кунларда уйларимизни бир амаллаб иситамиз. Айниқса ёш болаларимиз, ногиронлиги бор қўшниларимиз, кексаларимиз совуқотиб қолишади. Лекин иложимиз йўқ. Қишга деб ғамлаган ўтин заҳирамиз бир мавсумга зўрға етади. Мурожаат қилиб бир қатор ташкилотларга бордик. “Кутинглар, қилиб берамиз” мазмунидаги қуруқ ваъдаларни эшитиб қайтамиз холос, - дея депутатларга мурожаат қилди шу кўчада 30 йилдан буён истиқомат қилаётган Дилором Омонова.      

Аҳолининг шу каби мурожаатларини ўрганган депутатлик гуруҳи ва партиянинг Гулистон туман Кенгаши  муаммо билан юзлашганда энг тўғри қарор унга ечим топиш эканлигини таъкидлаб, куз-қиш фаслининг ёғингарчилик ва совуқ кунлари яқинлашиб қолганини инобатга олган ҳолда  зудлик билан ишга киришишди. Депутатлик сўровларига тегишли ташкилотлар ўз вақтида жавоб беришига ва аҳолини ўйлантираётган масалаларга ечим топилишига  умид қилиб қоламиз. 

Зеро, адолат бор жойда ҳар қандай масалага ечим бор.

Маҳфират ХУДОЙБЕРДИЕВА,

Ўзбекистон “Адолат” СДП Сирдарё вилоят

Кенгаши матбуот котиби