Кечиримлилик – инсонпарварлик, бағрикенглик  ифодаси

Ватанимиз мустақиллиги эълон қилинганининг ўттиз йиллигини нишонлаш арафасида давлатимиз раҳбари Шавкат Мирзиёев томонидан инсонпарварлик тамойиллари асосида, бир талай олийжаноб фазилатлар жамулжами сифатида  “Жазо муддатини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида”ги Фармонга мувофиқ 215 нафар шахслар афв этилди.

Афв этилган шахсларнинг 3 нафари асосий жазодан озод этилди, 127 нафари жазони ўташдан муддатидан илгари шартли озод қилинди, 12 нафарининг озодликдан маҳрум этиш жазоси енгилроқ жазо билан алмаштирилди. Шунингдек, 73 нафар шахсларга тайинланган озодликдан маҳрум этиш жазосининг муддатлари қисқартирилди. Афв этилганларнинг 14 нафарини аёллар, 12 нафарини 60 ёшдан ошган эркак, 69 нафарини чет давлат фуқаролари, 15 нафарини тақиқланган ташкилотлар иштирокчилари ташкил этади.

Айтиш жоизки, афв – жамиятимизнинг инсонпарварлик ва адолат тамойилларига уйғун ва ҳамоҳангдир. Чунки жиноят содир этган шахс нафақат ўзининг, балки жигарбанди бўлган фарзандлари, ота-онасию қавму қариндошларининг ҳам келажаги ва тақдирига таъсир ўтказмасдан қолмайди. Шу сабабли, қилмишидан чинакам пушаймон бўлган шахсларни кечириш – қалби вайрон бўлиб яқин инсонини кутаётган бутун бир оилани янгидан ҳаётга қайтариш билан баробар. Бу эса юксак олижаноблик тимсолидир.

Мазкур инсонпарварлик акти давлатимизнинг ҳар қандай ҳолатда фуқаролар учун ғамхўрлигининг ёрқин мисолидир. Зеро, жиноятга қўл урган, боши деворга теккандан сўнг адашганлигини тушуниб етган одамларни афв этиш муқаддас динимизнинг ҳам асосий ғояларидан бири саналади.

Дарҳақиқат, жиноят содир этган шахсларни фақат жазолаш эмас, балки “Жаҳолатга қарши маърифат”  ғояси асосида қайта тарбиялаш, уларнинг ўз ҳалол меҳнати билан жамиятда муносиб ўрин эгаллаши учун барчамиз бирдек масъулмиз.

Бундай бағрикенглик шу юрт фарзандиман деб, яшаётган ҳар бир инсонни тўлқинлантирмай қўймайди. Шундай улуғ байрамда яқинлари, оиласи, фарзандлари бағрига қайтиш, жазони ўташ жойидан озод бўлган инсонни ҳам, унинг яқинларини ҳам жонажон юртимизга садоқат билан ҳизмат қилишлари учун асос бўлгани аниқ. Эндиги вазифа, афв этилган шахслар билан  учрашиб, жойларда уларнинг яшаш шароити билан танишиб, бор эьтиборни уларни ижтимоий ҳаётга мослашиб, соғлом турмуш тарзини йўлга қўйиб, жамиятда муносиб ўрин топишлари учун уларга кўмак бериш борасида депутатлар, профилактика нозирлари ва маҳалла фаоллари билан  ҳамжиҳатликда  фаолият олиб боришдан иборатдир.

Бобур МАМИРОВ,

“Адолат” СДП Тошкент вилояти Кенгаши раиси