Коррупцияга қарши биргаликда курашамиз.

Биз коррупция ва унинг зарарли оқибатлари ҳақида жуда кўп эшитганмиз. Ҳақиқатдан ҳам бугунги кунга келиб коррупция инсоният тараққиётига энг катта ғов бўлаётган иллатлардан бирига айланди.

Биргина мисол, БМТ ҳисоботига кўра коррупция туфайли ҳар йили дунё иқтисодиёти қарийб 3 трлн. АҚШ доллари миқдорида зарар кўради. Бу маблағ жаҳон ялпи ички маҳсулотининг тахминан 5 фоизига тенг демакдир. Коррупциянинг маънавий зарари эса ундан ҳам каттароқ. Чунки, коррупция авж олган жамиятда аламзадалик, қонунларни менсимаслик, эртанги кунга ишончсизлик, одамлар ўртасида табақаланиш, ҳокимият вакилларига нисбатан ҳурматсизлик авж олади. Халқнинг маънавий қадриятларига дарз кетади. Шу боисдан ҳам коррупцияга қарши кураш узоқ ўйланган, пухта ишлаб чиқилган комплекс чора-тадбирларни тақозо этади.

Коррупциянинг келиб чиқиш ва кенг тарқалиши бўйича ҳам турлича фикрлар мавжуд. Айрим мутахассислар қонунчилик базасининг номукаммаллиги, режали иқтисодиёт, мамлакат бошқарув органларининг шаффоф эмаслигини коррупцияни келтириб чиқарувчи асосий омиллар деб ҳисобласалар, бошқа тадқиқотчилар жамиятда ҳуқуқий онг ва ҳуқуқий маданиятнинг паст даражада эканлигини бу борадаги асосий муаммо деб биладилар. Умуман олганда, коррупцияни келтириб чиқарувчи ҳар бир омилга нисбатан бирламчи хавф сифатида қараш, унга қарши биргаликда курашиш лозим. Шундагина унинг кўламини камайтириш, аянчли оқибатларини бартараф этиш мумкин бўлади.

Шунга кўра, Республикамизда коррупцияга қарши курашишнинг ҳуқуқий механизми яратилган ҳолда 2017 йил 3 январда Ўзбекистон Республикасининг «Коррупцияга қарши курашиш тўғрисида»ги Қонуни қабул қилинди ҳамда шундан сўнг бир қатор норматив-ҳуқуқий ҳужжатларда коррупциянинг олдини олиш ва бартараф этиш бўйича чора-тадбирлар белгиланди.

Бинобарин, коррупцияга қарши курашишда аҳолининг ҳуқуқий онги ва ҳуқуқий маданиятини юксалтириш, жамиятда коррупцияга нисбатан муросасиз муносабатни шакллантириш, давлат органлари ва бошқа ташкилотлар ходимларининг ҳуқуқий саводхонлигини ошириш, таълим муассасаларида коррупцияга қарши курашиш соҳасидаги ҳуқуқий таълим ва тарбия масалалари Қонуннинг бир нечта моддаларида ўз ифодасини топган. Чунки ҳуқуқий онг ва ҳуқуқий маданияти юксак бўлган ва ҳуқуқий таълим ва тарбия жиҳатдан етук бўлган инсонлар салбий иллат бўлмиш коррупцияга йўл қўймайдилар.

Бу борада, давлатимиз раҳбари кўплаб маъруза ва чиқишларида лоқайдлик, бепарволик, порахўрлик, коррупция, сохтакорлик, мансаб ваколатини суиистеъмол қилишга қарши кураш бутун жамиятнинг мақсадига айланиши кераклиги тўғрисида таъкидлаб ўтган.

Хусусан, давлат раҳбари «Ҳалоллик вакцинаси» ва коррупцияга қарши курашишга масъул бўладиган алоҳида орган ташкил этилиши ҳақида илк бор жорий йил Парламентга йўллаган мурожаатномасида қайд этган эди. Давлат раҳбарининг «Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида»ги Фармони қабул қилинди ва мазкур ҳужжат билан янги орган – Ўзбекистон Республикаси Коррупцияга қарши курашиш агентлиги ташкил этилди.

Ҳозирда мамлакатимизда коррупциянинг олдини олиш ва унга қарши курашиш соҳасида аҳолимизнинг ҳуқуқий онг ва ҳуқуқий маданиятини оширишда Адолат СДПнинг устувор вазифаларидан биридир.

«Коррупция тараққиёт кушандаси» шиори остида бирлашиб бу иллатни жамиятдан йўқотиш учун ўз билим ва ташаббуслари билан фаол иштирок этишга ваъда қиламиз.

Ойзода Қурбоналиевна

«Адолат «СДП Ширин шаҳар кенгаши раиси