Коррупцияга қарши курашиш самарадорлиги янада оширилади

29.07.2021 11:07:34

Бугунги кунда халқаро мутахассисларнинг фикрига кўра, давлатда қандайдир соҳада коррупция каби салбий иллатга қарши курашиш ишлари амалга оширилмаса, айнан ўша соҳада ўсиш, ривожланиш бўлмайди.

Сўнгги йилларда мамлакатимизда ҳам давлатимиз раҳбари Шавкат Мирзиёев томонидан бу иллатга қарши кураш олиб бориш нафақат давлат, жамият балки ҳар бир фуқаро олдида турган асосий масалалардан бири эканлиги такрор-такрор таъкидланиб келинмоқда.

Ҳақиқатдан ҳам, бугун дунё шиддат билан ўзгариб, ривожланиб бораётган бир замонда коррупцияга қарши курашмаслик, унинг салбий оқибатларини олмаслик, жамиятдан ушбу муаммони яшириш ҳар қандай давлат ва соҳа  учун салбий жиҳатларни келтириб чиқариши муқаррар.

Сўнгги йилларда мамлакатимизда бу салбий иллатга қарши кескин  курашиш мақсадида идоралараро ҳамкорликни янада мустаҳкамлаш, ушбу йўналишдаги илғор тажрибаларни қўллаш, оммалаштириш, бу борада юзага келаётган муаммоларни аниқлаш, уларни бартараф этиш, уни мунтазам равишда мониторинг қилиб бориш юзасидан муайян ишлар олиб борилмоқда. Шу билан бирга қатор қонун, фармон ва қарорлар қабул қилиниб,  мустаҳкам ҳуқуқий-меъёрий негиз яратилмоқда.

Хусусан, жорий йилнинг 6 июль куни давлатимиз раҳбари Шавкат Мирзиёев томонидан “Коррупцияга қарши муросасиз муносабатда бўлиш муҳитини яратиш, давлат ва жамият бошқарувида коррупциявий омилларни кескин камайтириш ва бунда жамоатчилик иштирокини кенгайтириш чора-тадбирлари тўғрисида”ги Фармони ҳамда “Коррупцияга қарши курашиш фаолиятни самарали ташкил этишга доир қўшимча чора-тадбирлар тўғрисида”ги Қарори имзоланди.

Мамлакатимизда коррупциянинг олдини олиш ва унга қарши муросасиз курашишнинг илғор халқаро стандартларга асосланган тизимини жорий этиш, давлат органлари ва ташкилотларининг фаолиятида очиқлик, ошкоралик ва шаффофликни таъминлаш ҳамда мансабдор шахсларнинг аҳоли олдидаги ҳисобдорлигини йўлга қўйиш орқали давлат бошқарувида самарали ва таъсирчан жамоатчилик назоратини амалга ошириш мақсадида имзоланган мазкур Фармонда 2021-2022 йилларга мўлжалланган Коррупцияга қарши курашиш бўйича Давлат дастури тасдиқланди. Қолаверса, мазкур Фармонда коррупцияга қарши курашиш ва коррупциявий ҳолатларнинг барвақт олдини олиш тизими самарадорлигини ошириш, ушбу жараёнга жамоатчиликни кенг жалб этиш ва коррупцияга нисбатан муросасиз муносабатда бўлиш муҳитини шакллантириш масалаларига ҳам алоҳида эътибор қаратиган.

Президентимиз Шавкат Мирзиёев томонидан имзоланган ушбу Фармон ва Қарор нафақат барча давлат органлари ва ташкилотлари раҳбарларига, қолаверса, ҳар бир фуқароларга коррупцияга қарши курашишда улкан масъулият юклайди.

Бу масъулиятли вазифани амалга оширишда энг муҳим масала юртдошларимизда коррупцияга, умуман олганда ҳар қандай кўринишдаги қонунбузарликка нисбатан муросасизлик  кайфиятини мунтазам равишда шакллантириш талаб этилади.

Дилмурод ХУДАЙШУКУРОВ,

Халқ депутатлари Жиззах вилоят Кенгаши депутати

 

Улашинг!

Фикрингизни қолдиринг

Илтимос жавобингизни киритинг

+