Кўзни кўр қилувчи жиноятлар

Ватанимиз келажаги ҳақида ўйлаганда, диний экстремизм ва гиёҳвандлик, яъни наркомания ҳақида ҳам айтиб ўтиш керак. Бу тушунчалар ҳақида ёшларимизнинг қарашлари шаклланиши, уларга бу иллатларнинг одамзот ҳаётига тушов бўладиган, уни тубанликларга улоқтириб юборадиган иллат эканлигини тушунтиришимиз керак.

Масалан, диний экстремизмнинг нима эканлиги, унга учраган одамнинг ҳолатини 5-10 йиллардан буён ҳаммамиз тушуниб қолдик.

Сурияга ширин оиласини ташлаб ёки хотини-ю болаларини олиб чиқиб кетган ёки шунга уринган қанча эркак ёки йигитларни телевидение ё ижтимоий тармоқларда кўрдик. Тасаввур қилинг, болани ё хотинни уруш бўлиб ётган, юзига ниқоб тақиб олиб, Оллоҳ деб одам ўлдираётган бераҳм кимсаларнинг олдига, граната, автомат, бомбалар олдига олиб бориш учун шу банда камида умуман ақли йўқ ё тентак бўлиши керак. Диний экстремизм ана шуниси билан хавфли.

Ўз боласи ё турмуш ўртоғи кўзига кўринмаган одам эртага ватанига қандай яхшилик қилиши мумкин? Бу саволга жавоб беришнинг иложи умуман йўқ.

Негаки, диний экстремизм, динни, иймонни, охиратни, Исломни бузиб, бутунлай тескари тушунтирадиган бу ақида эгаларига бирон гап айтиш, уларни инсон сифатида гапириш имкони топилмайди.

Шунингдек, яна бир ёшларимиз билиб қўйиши керак бўлган иллат, жиноят наркоманиядир. Наркоманияга учраган одамнинг охир-оқибат оиласи боқувчидан, отадан ё ўғилдан айрилади ё уни бу касаллик одамгарчиликдан айиради. Наркомания бир моддага қул, муте бўлиб қолиш, чекиш ёки укол олиш орқали одамгарчиликдан, жамиятдан ажралишдир.

Мазмунан олганда болаларимиз бу “касалликлар” ҳақида ўйлаганда уларнинг одамни жамиятдан, маҳалладан, бахтли келажакдан айирадиган жиноят эканлигини билишлари керак. Акс ҳолда огоҳликдан йироқлик уларни бир кун умр йўлларида қоқилишига сабаб бўлиши, гулдай ҳаётини барбод қилиши мумкин.

Азамат ТАВБОЕВ,

Халқ депутатлари Пайариқ туман Кенгаши депутати