Малака оширган педагог амалиётда билимини қўллай оляпдими?

Ўзбекистон Республикаси Президентининг Олий Мажлисга йўллаган Мурожаатномаларидан келиб чиқиб унда белгиланган вазифалар бўйича Олий Мажлис Қонунчилик палатаси депутатлари ўз сайланган округларида бўлишиб, аҳолининг мавжуд муаммоларини ўрганишмоқда.

Жумладан, парламент қуйи палатасининг Фан, таълим, маданият ва спорт ишлари бўйича қўмитаси аъзоси Ойдин Абдуллаева Халқ депутатлари Тошкент шаҳар Кенгаши депутати Баҳром Валиев ҳамда “Адолат” СДП Тошкент шаҳар Кенгаши аъзолари ҳамкорлигида пойтахтимизнинг Яшнобод туманидаги 216, 215 мактаблари ҳамда 602 МТМдаги мавжуд ҳолатни ўрганди.

Ўрганишлар жараёнида 216 мактабнинг капитал таъмирга муҳтож эканлиги ойдинлашди. Мактаб директорининг маълум қилишича, мактаб ўтган йилги пандемия ҳисобига капитал таъмирлашдан қолиб кетган ва ушбу йилда ҳам аниқ давлат дастурига киритилганлигини тасдиқлай олмади. Энди мактаб депутатларга умид боғламоқда. Ҳар ҳолда улар ижтимоий муаммоларни ҳал қилиш учун депутатларга ажратилаётган маблағлар эвазига муаммолар ечим топишига кўз тутишган. Депутатлар мактаб ичини кўздан кечиришганида  иссиқ сув, ҳожатхона, канализация тизими бутунлай ишдан чиққанлиги, таъминот йўқлиги, дарс ўтилиши учун компьютерлар йўқлиги, спорт зали таъмирга мухтожлиги маълум бўлди. Шунингдек, мактаб ўқитувчиси тарафидан футбол майдони чимини мактаб ҳудудига яқин ерга кўчириб олиб келиш, яқин ўртада боғча йўқлиги ва бу мактаб ёшига етган боланинг мактабга тайёрлов сифат кўрсаткичига салбий таъсир этаётганлиги боис яқин ҳудудда МТМ ташкил қилиш кабилар  таклиф этилди. Депутатлар ушбу таклифларни маъқуллаб, инвестиция дастурига киритиш лозимлигини таъкидлашди. Ўрганишлардан келиб чиқиб депутатлар бир неча таклифларни ишлаб чиқишди. Хусусан, хорижий тилларга ихтисослаштирилган лингвистик хоналарни ташкиллаштириш, электрон кутубхона – АРМлар фаолиятини йўлга қўйиш, бунинг учун мактабга керакли мутахассисларни жалб қилиш каби масалалар таклифлар кўламидан ўрин олди. Ушбу мактабдаги ўрганиш ва муҳокамалар якунида керакли лойиҳа смета ҳужжатлари тайёрланиб депутатларга тақдим этилиши режага киритиб олинди.

Депутатларнинг кейинги ташрифи ушбу туманнинг 215 мактабида бўлди. Мактаб яқинда капитал таъмирдан чиққан бўлиб, энг сўнгги замонавий шароитларга эга эканлиги маълум бўлди. Биргина камчилиги мактаб стадионини барпо этиш масаласи экан. Бўш ётган жойни спорт майдончасига айлантириш бўйича депутатлар томонидан тегишли тавсиялар берилди. Шунингдек, кимё-лоборатория хоналарини ҳам керакли асбоб-ускуналар билан жиҳозлаш бўйича таклифлар айтилди.

Ушбу туман Халқ таълими бўлими мудири Отабек Жумаев билан бўлган суҳбатда юқорида камчилиги аниқланган капитал таъмирга муҳтож мактабларнинг таъмирланиши бу йилда давлат дастуридан ўрин олганлиги айтилди. Шу билан бирга, мактаб директорлари томонидан мактаб формаси масаласига ҳам тўғри ёндашиш зарурлиги, бу бўйича депутатлар томонидан қатъий қонунлар яратиш лозимлиги ҳусусида таклифлар берилди. Депутатлар ушбу таклифларни Қонунчилик палатаси ва тегишли сессияларга олиб киришларини билдиришди.

Яшнобод туманидаги Наргиза Зокирова  раҳбарлик қилаётган  602 МТМда кечган учрашувда 300дан ортиқ бола ўрни бўлишига қарамай 8та гуруҳда 215 та бола тарбияланаётганлиги, тарбиячи ҳамда мудиранинг методик ва педогогик билим ва савиялари талаб даражасида эмаслиги ойдинлашди.

Хулосалар сўнгида айтиш жоизки, педагог кадрларнинг малака ошириш тизимини такомиллаштириш устида қизғин ишлар кетаётган ушбу кунда оширган малакасини таълим ва тарбия жараёнида ўз ўрнида қўллай билмаётганлиги бугунги кун таълим сифатининг оқсоқлик томонларини ўзида намойиш этмоқда.

Меҳринисо БОБОНАЗАРОВА,

Ўзбекистон “Адолат” СДП

Тошкент шаҳар Кенгаши

матбуот котиби