Огоҳлик, эҳтиёткорлик ва эмланиш – соғлом фикрлилар танлови

Мана, қарийб  икки йилдирки, жаҳон  халқлари инсоният тарихидаги энг машъум балолардан бири – коронавирус инфекциясига қарши  кураш олиб бормоқдалар. Ўта маккор ва турланувчан хасталик озмунча одамларнинг ёстиғини қуритмади. Жуда ҳам юқумли бўлган бу дард миллионлаб инсонларнинг саломатликларини йўқотишларига сабабчи бўлди.

Тождор вирус мамлакатимизга ҳам кириб келгани барчамизга маълум. Унинг кенг ёйилиб кетишига йўл қўймаслик учун давлат томонидан зарур чоралар кўрилмоқда. Бироқ айни шу кунларда касаллик занжирини узиш юзасидан саъй-ҳаракатлар яхши самара бераётгани йўқ. Айниқса, вируснинг янги штаммлари одамлар ҳаётига раҳна солаётганлиги ташвишлидир.

Бундай тахлиқали вазиятда биз депутатлар ҳам четда турмаслигимиз лозим. Аҳоли вакиллари билан учрашганда, балои офатнинг  жуда ҳам тажовузкор ва хатарли эканлигини, у каттаю кичикни аяб ўтирмаслигини батафсил тушунтиришимиз  талаб этилади. Касбим шифокор бўлганлиги учун буни мен ҳам теран ҳис қилмоқдаман.  Шу билан бирга одамлар  орасида ўз саломатлигига лоқайдлик, коронавирусдан сақланишнинг ғоят муҳим тартибларини менсимаслик ҳолатлари учраб турганлигидан кўз юмиб бўлмайди. Карантин чекловларига амал қилмаётганлар ҳар қадамда учраб турганлиги ҳам ташвишлидир.

Шунинг учун партиядошларимиз, фаоллар, депутатлар  эпидемиологик вазият барқарорлигини таъминлашга ўз ҳиссамизни қўшишимиз лозим, деб ҳисоблайман. Бу борада кенг жамоатчилик вакиллари билан ҳамкорликда иш олиб боришимиз даркор.

Ҳозирги пайтда  коронавирус инфекциясига қарши эмланиш ҳамма учун биринчи даражали вазифа эканлигини унутмаслигимиз лозим. Мен биринчилар қатори вакцинани қабул қилдим. Ўзимни жуда яхши ҳис қилмоқдаман.  Вакцинациялаш жараёнини уюшқоқлик билан ўтказиш юзасидан тарғибот ишларида фаол қатнашмоқдаман. Чунки  аҳолини тўла эмламасдан туриб, касалликни енгиш ҳақида гапириш мумкин эмаслигини барча тушуниб етиши керак.

Мамлакатимизда тождор вирусга қарши эмлаш тадбирларига  пухта таёргарлик кўрилган. Етарли даражада вакцина заҳираси мавжуд. Шунинг учун ҳар бир киши ўзи ва яқинларининг, юртдошларимизнинг саломатлиги учун масъулиятни ҳис этган ҳолда эмлаш пунктларига бориб, вакцина қабул қилиши зарур.

                                                                           Турғуной ТЎЙЧИЕВА,

Халқ депутатлари Норин туман кенгашидаги “Адолат” СДП гуруҳи аъзоси