Онкологик касалликларга қарши кураш - Президент назоратида

Сир эмаски, сўнги йилларда юртимизда  онкологик касалликлар билан касалланиш кўрсаткичлари ортиб бормоқда. Маҳалла-кўй, атрофимизда тез-тез ушбу касалликдан кўз юмаётган юртдошларимизни эшитиш одатий ҳолга айланиб қолди.

Яқинда Президентимиз Шавкат Мирзиёевнинг Республика ихтисослаштирилган онкология ва радиология илмий-амалий тиббиёт марказига ташрифи давомида кўрилган масалалар мазкур масалалар мамлакатимизда давлат сиёсати даражада кўрилаётганлигининг ёрқин тасдиғидир.

Айниқса, беморлар учун энг қийини керакли дориларни топиш ва сотиб олишда давлат томонидан ҳам кўмак муҳим аҳамиятга эга. Онкология хизмати учун дори-дармон ва сарфлов воситаларига сўнги беш йилликда қарийб саккиз  баробарга оширилиб, 2021 йилда бу кўрсаткич қарийб 62 миллиард сўмга етган.

Шифокорларнинг таъкидлашича, касалликни қанча барвақт аниқлаб, унга қарши вақтида даво чоралари кўрилса бемор ҳаёти сақлаб қолиш имкониятлари шунча катта эканлиги кўп бор айтилади.

Давлатимиз раҳбари бошчилигида ўтган видеоселекторда ҳам онкологик касалликларни эрта аниқлаш мақсадида мобил бригадалар тузиб, хавф гуруҳига кирувчи аҳоли учун профилактик кўриклар ўтказиш зарурлиги таъкидланди. Бунинг учун ҳар бир ҳудудга мобил маммографлар ва позитрон-эмиссион томографлар етказиб берилади. Саратон касалликларини эрта аниқлайдиган лабораториялар ташкил этилиб, махсус онкомаркерлар текширувлари йўлга қўйилишига эътибор қаратилди. Бу эса ушбу касаллик билан самарали курашишда юқори натижаларга эришишда айни муддао бўлади, деб ўйлайман.

Шунингдек, иккинчи асосий масала - даволаш сифатини оширишга жиддий эътибор қаратилмоқда. Шу мақсадда жойлардаги онкология ва гематология шифохоналарини таъмирлаб, замонавий ускуналар билан жиҳозлаш, малакали мутахассисларни жалб қилиш вазифаси белгиланди. Касаллик оқибатида оёқ-қўли ампутация бўлган беморларни протез маҳсулотлари билан таъминлаш масаласига ҳам тўхталиб ўтилди.

Умуман олганда бу каби оғир хасталикка қарши курашда мамлакатимизда тизимли ёндашилар экан шубҳасиз кўзланган натижаларга эришилади.

Рустам ХАЙИТОВ,

халқ депутатлари Навоий

вилоят Кенгаши депутати