Партия – тараққиётнинг янги сифат босқичида

Ўзбекистон  “Адолат”  СДП Сурхондарё  вилояти  Кенгашида  партия   ташкил этилганининг 26 йиллик муносабати билан онлайн видеоконференция ўтказилди. Унда вилоят, шаҳар ва туман  Кенгаши ходимлари, депутатлар, партия фахрийлари, бошланғич партия ташкилоти раислари, партия “Аёллар қаноти”, “Ёшлар қаноти” аъзолари, партия фаоллари иштирок этди.  

Тадбирнинг биринчи қисмида партия фаолиятида амалга оширилган ишларга эътибор қаратилди.

Конференцияни  вилоят Кенгаши раиси Рустам Ҳамраев кириш сўзи билан очиб берди. Унда партиянинг  йиллар давомида амалга оширган ишлари тўғрисида  сўз юритди. Шунингдек, қўлга киритилган ютуқларда албатта партия фахрийлари, фаолларининг  фидойилиги, тинимсиз меҳнатлари  чуқур эътиборга олинди. Айни пайтда устозлар изидан дадиллик билан иш олиб бораётган жамоанинг фаолиятига айтилган дил сўзлар иштирокчилар қалбида кўтаринки руҳ бағишлади. Шундан сўнг, сўз олганлар ўтган 26 йил давомида партия ташаббуси билан амалга оширилган ишлар, келгусида амалга оширилиш лозим бўлган устувор вазифаларга алоҳида тўхталиб ўтди.

Исроил Қурбонов, партиянинг вилоят Кенгаши ташкилий ишлар бўйича раис ўринбосари:

Партиямиз 1995 йилда сиёсий майдонга чиқиб, барча даражада бўлиб ўтган давлат ҳокимияти органлари сайловларида ўз номзодлари билан иштирок этиб келмоқда. Ўтган давр мобайнида партия ташкилий жиҳатдан ва сиёсий томондан анча жипслашди, сиёсий майдонда обрў ва эътиборга эга бўлди. Бироқ, ҳали партия олдида бир қанча долзарб вазифалар турганлигини ҳам алоҳида таъкидлаш лозим. Биз албатта бу вазифаларни уддалаймиз. Ишонч билан айтиш мумкинки, Ўзбекистон “Адолат” СДП ҳозирда ўз тараққиётининг янги сифат босқичида турибди. Бу партия хайрихоҳлари сонининг ортиши ва ташкилий жиҳатдан мустаҳкамлашувида намоён бўлмоқда.

Тадбир сўнгида партия фаолиятида ўрнак кўрсатган бир гуруҳ фаолларга партия вилоят Кенгашининг ташаккурномалари ҳамда эсдалик совғалари топширилди.

Гулшод ТУРСОАТОВА,

Ўзбекистон “Адолат” СДП Сурхондарё вилоят Кенгаши матбуот котиби