Шу азиз Ватан барчамизники!

“Янги Конституциянинг чин ижодкори халқдир”, деган эди давлатимиз раҳбари жорий йилнинг 20 июнь куни Ўзбекистон Республикаси Конституциясига ўзгартириш ва қўшимчалар киритиш бўйича комиссия аъзолари билан бўлиб ўтган учрашувда.

Президентимизнинг мазкур сўзлари нечоғли ҳақиқат эканлигига куни кеча давлатимиз раҳбарининг Қорақалпоғистонга қилган ташрифи чоғида яна бир карра амин бўлдик.

Қорақалпоғистонда провокацион ҳаракатлар натижа беришидан умид қилиб, халқни кўчага чиқишга чорлаётган бир гуруҳ қора ниятли одамлар томонидан Конституцияга ўзгартириш ва қўшимчалар киритиш жараёнлари нотўғри талқин қилиниши оқибатида юзага келган норозилик намойишлари президентимизнинг сиёсий иродаси сабаб  изга туша бошлади.

“Бундай оғир вазиятда президентимизнинг ҳамма ишни ташлаб шахсан ўзи келиши, одамлар билан учрашиши биз учун катта эътибор бўлди. Ҳозир ҳаммаси ўз ўрнига тушмоқда. Бир нарсани таъкидлашим керак, Мирзиёевнинг ўзи келганини аҳоли чексиз ғамхўрлик сифатида қабул қилди, уларга катта ишонч берди. Биз ўзбек халқи билан бир миллатмиз. Мақсадимиз – икки халқнинг бирга ривожланишидир”, дейди Қорақалпоғистон касаба уюшмалари бирлашмаси раиси Улуғбек Жалменов ОАВга берган интервьюсида.

Оммавий тартибсизлик келтириб чиқаришга уринган иғвогарлар қорақалпоқ халқининг умумий фикрини ифода қилмайди. Бошқача айтганда, айрим провакаторларнинг ўз манфаатлари йўлида қўзғаётган иғво ва фитналари, ғалаёнлари асло умумхалқ фикри эмас.

“Адолат” СДП Сиёсий Кенгаши давлатимиз раҳбарининг тинчлик ва осойишталик ўрнатиш йўлида олиб бораётган оқилона сиёсатини ҳар томонлама қўллаб-қувватлаган холда, юртимиз аҳолисини давлатимиз ва ҳур Ўзбекистонимизнинг эртанги ёруғ истиқболи йўлида бирдамликда, ҳамфикр бўлиб яшашга чорлайди. Зотан, шу азиз Ватан барчамизники!

“Адолат” СДП

Матбуот хизмати