Шундай жазирама иссиқда “тонировка” пулли... Шу адолатданми?!

20.04.2021 13:04:36

Халқ тили билан айтганда, жазирама, диққинафас ҳавода одам ўзини қаерга уришини билолмаётган бир пайтда, ловуллаб турган енгил автомобиль ичига кириш қанчалар малол келишини тасаввур қиласизми? Ана энди, куннинг катта қисмини автомобилда ўтказадиган аҳоли қатламининг соғлиғига “жаз-жаз” қуёш нури қандай таъсир кўрсатишини ҳам кўз олдингизга келтиринг! Автобус, йўналишли такси ёки энг кўп аҳолимиз фойдаланадиган енгил автомобиль ҳайдовчилари ва йўловчилари ёз чилласининг қуёш тиғида бехаловатлик ва ноқулайликлар ҳис қилишлари бор гап.   

Жазирамада автомобиль ойналаридан тўсиқсиз ўтадиган қуёш нурлари инсон терисининг шикастланиб, туси ўзгариши барчамиз учун азалдан маълум. Аммо, ультрабинафша нурларининг таъсири остида онкологик (саратон, ўсма) касалликларга олиб келиши мутахассислар томонидан тасдиқланган. Яна бир гап: илғор, ривожланган давлатлар ўз фуқароларига автомобилларининг ойналарини бепул(!) қорайтириш – қуёшдан ҳимоялашни тавсия қилишларини кўпчилик билармикин? Қаранг, улар ўз аҳолисининг саломатлиги устида қанчалик қайғурадилар.

Шу борада яна бир савол туғилади: пул тўлаш эвазига(!) автомобиль ойналарини қорайтириш (“тонировка”)га рухсат бериш қанчалик тўғри? Ва умуман шу адолатданми?

Фуқаронинг ёки бирор ташкилотнинг чўнтаги кўтарса, автомобиль ойналарини қорайтиришга рухсат олади-ю пулдан қийналган фуқароларимиз ва уларнинг оила аъзолари жазирама офтоб тиғида “қоврилиб” юраверишсин экан-да!

Масаланинг бошқа томонига эътибор қаратадиган бўлсак, “тонировка”га рухсат олиш учун тўланадиган маблағларнинг, хаттоки(!), бир тийини ҳам давлат ғазнасига туш-май-ди! Демак, кимнинг тегирмонига сув қуйилади? Жумбоқ!

Бу пуллар тўлалигича турли идораларнинг "махсус" ҳисоб рақамларига бориб тушади. Нима учун фуқаролар айнан битта ташкилотни “боқиш” учун ҳақ тўлаши лозим? Ахир ўша ташкилот давлат бюджетидан молиялаштириладику. Умуман, аҳолини бу тарзда табақалаштириш ёки пули борга имтиёз бериб, уларни ажратиш адолатданми?

Биз бепул “тонировка” тарафдоримиз!

 

Ўзбекистон “Адолат” СДП

Улашинг!

Фикрингизни қолдиринг

Илтимос жавобингизни киритинг

+