Таъминотни ким таъминлайди?    

Жорий йилнинг 24 июнь куни Чироқчи туманида истиқомат қилаётган фуқаро туман тиббиёт бирлашмаси юқумли касалликлар шифохонасига мурожаат қилади. Шифохона кундузги муолажа Фульдшери Ғ.А. фуқародан касаллик тарихи очиш учун 5000 сўм пул сўраган. Шундан сўнг бу ҳақдаги хабар ижтимоий тармоқларда тарқалди. Туман юқумли касалликлар шифохонасининг 2021 йил 1 июлдаги буйруғи билан саломатлик посбони Ғ. А. ишдан бўшатилган, у билан тузилган меҳнат шартномаси ҳам бекор қилинган.

Хўш, бўлиб ўтган нохуш холатга тўғри ёндошилганми? Биз ушбу кўнгилсиз воқеани партиямиз фаолари, депутатларимиз иштирокида ўрганиб чиқдик. Ҳурматли юртдошлар, шу ўринда қуйидаги ҳаётий масалаларга эътибор қилишингизни сўрайман. Биз тиббиёт ходимлари билан юзма-юз мулоқот ўтказганимизда, беморларга касаллик тарихи дафтари очиш учун мутасадди ташкилот, аниқроқ айтадиган бўлсак, туман тиббиёт бирлашмаси томонидан маблағ ажратилмаса шифокорлар касаллик тарихи очиш учун махсус варақани канцелярия дўконидан ўз ҳисобларидан сотиб олиб бера олмайдику? Нега, туман тиббиёт бирлашмасидаги мутасаддилар даволаш профилактика муассасаларини зарур жиҳозлар, канцелярия товарлари билан таъминламаяпти? Умуман, Президентимиз қайта-қайта таъкидлаётганларидек,   соғлиқни сақлаш тизимига аҳолига бепул тиббий хизмат кўрсатиш учун ажратилаётган маблағ қаёққа кетяпти? Ўртада миллион-миллион  милярдларни ўзлаштириб кетаётганлар четда қолиб, ҳақиқатдан ҳам беморга касаллик тарихи варақасини ўша беморни ўзи учун сотиб оладиган тиббиёт ходими бизнингча, Чироқчи тумани тиббёт бирлашмаси юқумли касалликлар шифохонаси кундузги муолажа фельдшери Ғ.А. ноҳақ ишдан бўшатилган. Ахир инсон тақдири ўйинчоқ эмас-ку? Энди фельдшер Ғ.А. нинг оиласи, фарзандлари ҳақида ким қайғуради? Аниқроғи, уларни  ким боқади?

Шу ўринда бир партиядошимизнинг берган суҳбати эсимга тушди. Унинг айтишига қараганда, жорий йилнинг июнь ойи бошларида  Қашқадарё вилоятидаги туманлардан бири тиббиёт бирлашмасига қарашли физиотерапия бўлимида даволанган. Энг ачинарли томони, битта тиббиёт асбобини   вирус ва микробларини спирт ёки бошқа зарарсизлантирувчи воситалар билан ишлов бермасдан 15, 20 нафаргача беморга ишлатишаётган экан. Партиядошимиз шунда эътироз билдириб, ушбу асбобдаги микроб ва вирусларни зарарсизлантириб сўнгра ўзига ишлатишларини ҳамширадан илтимос қилганида, аввалига саломатлик посбони заҳархандалик, ўта қўпол ва эътиборсизлик билан “хеч нарса қилмайди, ҳамма кишига шу асбобдан фойдаланаяпмиз” – дебди. Шунда партиядошимиз “кимнидир бошига кимнидир елкаларига кимнидир белига ҳар хил жойларига суртаяпсиз. Ҳар бир ишлатганингиздан кейин зарарсизлантирувчи восита билан ишлов беришингиз керак”, деганида  ҳалиги ҳамшира “бизга пахта ҳам, спирт ҳам зарарсизлантирувчи бошқа  оситалар ҳам берилмайди” деб гапнинг пўст калласини айтиб  қўя қолибди.

Биз масалага бир томонлама ёндашмасдан муолажа фельдшери Ғ.А.нинг ҳам фикрларини тинглашимиз керак. Бизнинг назаримизда, Чироқчи туман тиббиёт бирлашмаси юқумли касалликлар шифохонаси маъмурияти шошма-шошарлик билан йўл тутган.  Шунинг учун ҳечдан кўра, кеч бўлса ҳам Ғ.Ани  ўз ўрнига тиклаш керак. Ана ўшандагина адолат қарор топади.

Биз бугун барча жабҳада қонун устуворлигига эришиш учун ҳаракат қилаяпмиз. Буни Чироқчи тумани тиббиёт бирлашмаси масъуллари унутишга ҳақлари йўқ.

Руиддин РАУПОВ,

Ўзбекистон “Адолат” СДП Қашқадарё вилоят Кенгаши раиси, халқ депутатлари вилоят Кенгаши депутати