Узоқ кутилган орзулар рўёби муборак!

24.05.2021 14:05:25

Каттақўрғонда маърифат нури порлади.  Хушхабарнинг қаноти бор, дейдилар. Куни кеча ҳукуматнинг тегишли қарори билан (307- сон, 18.05.2021 йил) Самарқанд  Давлат университетининг Каттақўрғон филиали ташкил этилди.

Азим кентимиз – Каттақўрғоннинг пешонасига битилган илк олий илмгоҳ барчамизга муборак бўлсин!

Узоқ кутилган орзулар рўёби учун аввало муҳтарам Президентимиз Шавкат Мирзиёевга, Сенат раиси Танзила Норбоевага, вилоят ва шаҳар ҳокимларимизга халқимиз номидан чексиз ташаккурлар айтаман.

Каттақўрғонда 1928 йилда мадрасалар фаолиятини тўхтатган эди. Салкам бир асрдан сўнг олий таълим қайта йўлга қўйилди. Бу чинакам хушхабар эмасми?! Тўғри, бир пайтлар Каттақўрғонда олийгоҳ очилармиш, ана очилди - мана  очилди, деган гаплар бўлган эди. Шу боисми кўпчилик бу гапга унча мунча ишонмади ҳам.

Ва ниҳоят Каттақўрғон тарихига зарҳал ҳарфлар битиладиган кун келди. Шаҳарни бошқараётганига эндигина бир йил бўлган сенатор  Гавҳар Зайировна бугунги кунда Каттақўрғон гавҳарига айланиб улгурди. Таъбир жоиз бўлса Тўмарисдек арслон юракли аёл – Гавҳар Алимованинг бу эзгу ишга астойдил киришиб, давлатимиз раҳбарига қилган  мурожаати беиз, беҳуда кетмади. Сенат  раиси шаҳримизга келганларида бу масала бот-бот кўтарилган эди. Оллоҳга беадад шукурлар бўлсин, мана натижа!

Ёшларнинг маънавий баркамоллиги, иймон-эътиқодининг мустаҳкам бўлиши, уларнинг олий таълим олишга бўлган иштиёқининг янада аланга олишида-ю, бир сўз билан айтганда дунёларга бўйлашида бу муқаддас даргоҳнинг хизматлари беқиёс бўлади.

Мен бир пайтлар Япония, Россия, Озарбайжон каби хориж мамлакатларида маънавиятимиз  қуёши  - ҳазрат Алишер Навоий хайкалининг  ўрнатилганини эшитиб, дил дилдан қувонган эдим. Бугун эса қувончдан кекса бошим осмонларга етди. Юртбошимиз эътироф этганларидек Каттақўрғон – зиёлилар юрти. Азал-азалдан шоирлар, фозиллар, улуғ алломалар бешигини тебратган азиз юртдир. Зеро, ўзига ҳос адабиёт мактабини яратган Сўфи Оллоёр бобомизни бутун дунё билади.

Каттақўрғоннинг мунаввар нурларга чулғанаётгани рост бўлсин, залворли ютуқлари бардавом бўлаверсин!

Менинг ниятим кўплар қатори бизнинг ҳар бир юртдошимиз ҳам нафақат ўзи ёки оиласи учун, балки бутун башарият учун унинг ғилдирагини олдинга айланишида чиройли, эзгу ишларни қилиб ўз ҳиссасини қўшсин. Оллоҳнинг розилигига етишсин. Бундай чиройли амалларимизда ҳаммамизга буюк Роббимиз Оллоҳнинг ўзи мададкор бўлсин.

 

   Фазилат АБДУЛЛАЕВА,

партия фаоли, Ноқис МФЙ раиси, шоира, “Дўстлик” ордени соҳибаси

Улашинг!

Фикрингизни қолдиринг

Илтимос жавобингизни киритинг

+