Вакцина учун музлатгичлар йўқ. Жараён депутатлар назоратида

Мамлакатимизда жорий йилнинг 1 апрель кунидан бошлаб аҳолини COVID-19 га қарши оммавий эмлаш тадбирлари бошланди. Шу муносабат билан эмлаш жараёнларини сифатли ўтишини таъминлаш учун барча керакли шароитлар яратилаётганлиги барчамизга маълум.

Хусусан, вилоятимиздаги барча тиббиёт бирлашмалари, оилавий поликлиника ва уларнинг ҳудудий филиалларида ташкил этилган эмлаш пунктларида эмлаш жараёнини хавфсиз ўтказиш учун барча зарур чоралар кўрилганлигига аминмиз. Лекин, 2021 йил 28 апрелда вилоят нашри бўлмиш “Самаркандский вестник” сайтининг “Для "Спутника V" нет морозильников” ("Спутника V" учун музлатгичлар йўқ”) номли мақоласида вилоятда вакцинани сақлаш учун музлатгичлар мавжуд эмаслиги қайд этилган мақола ёритилди. Вилоят Санитария-эпидемиология фаровонлиги ва соғлиқни сақлаш бошқармаси эмлаш бўлими бошлиғи Шоира Ҳалилованинг кўрсатмасида тиббий муассасаларда (оилавий поликлиникалар, қишлоқ врачлик пунктлари ва бошқалар) ушбу вакцинани сақлаш учун (-20 даража) музлатгичлар мавжуд эмаслиги,  ҳудудда фақатгина -2 дан -8 даражагача бўлган ҳароратни сақлашга қодир бўлган совутгич камералари мавжудлиги баён этилган. Шу ўринда таъкидлаш жоизки, жорий йилнинг февраль ойидаги Соғлиқни сақлаш вазирлиги жамоатчилик билан алоқалар бўлимининг ахборотида юртимизда 2-8 ℃ ҳароратга мўлжалланган совуқлик занжири инфратузилмаси мавжуд бўлиб, бу тизим ЖССТнинг барча талабларига жавоб бериши, хавфсиз эмлаш амалиётини кафолатлаши ҳақида баён этилган эди.

Бу хабарлар қанчалик ҳақиқатга яқин? Самарқанддек шаҳри азимда, салоҳияти ва аҳоли сони бўйича республикада энг олдинги қаторда бўлган ҳудудда фуқароларимиз кутаётган «Спутник V» вакцинасини сақлаш учун музлатгичлар мавжуд бўлмаса? Агар ҳақиқатдан ҳам бу тўғри маълумот бўлса, ушбу масалани ижобий ҳал этиш ишлари вакцинация жараёни бошланишидан олдин нега соғлиқни сақлаш бошқармаси билан ҳамкорликда ҳал этилмаган?  

Шу ва шу каби саволларга жавоб олиш мақсадида вилоятимизга бугунги кунга қадар қанча вакцина олиб келинганлиги, уларнинг сақланиш ҳолати юзасидан батафсил маълумот тақдим этишни сўраб партиямизнинг вилоят кенгаши депутатлари томонидан вилоят Соғлиқни сақлаш бошқармаси, вилоят санитария-эпидемиология осойишталик марказига депутатлик сўровлари юборилди.

Ушбу масала “Адолат” СДПнинг вилоят кенгаши депутатлари эътибори ва назоратидан четда қолмайди. Тез орада мазкур муаммо бартараф этилишига эришамиз.

Тозагул ХОЛИҚОВА,

Халқ депутатлари Самарқанд вилоят Кенгаши депутати