Вакцинация – коронавирусни енгишда ягона чора

Маълумки, бугунги кунда коронавирус инфекцияси дунё аҳлини қўрқув ва таҳликада ушлаб турган жиддий муаммолардан бирига айланди. Афсуски, қисқа вақт давомида бу касаллик кўплаб инсонларнинг ўлимига сабаб бўлди.

Бутун дунёда бўлгани каби мамлакатимизда ҳам коронавирус инфекциясини енгиш ва пандемияни тўхтатиш учун барча чора-тадбирлар амалга оширилмоқда. Қилинаётган ишлар замирида касалликка қарши эмлаш у билан курашишнинг энг самарали усули экани тобора ойдинлашиб бормоқда.

Айтишимиз лозимки, бундай мураккаб ва оғир даврда бу хасталикка қарши курашиш учун кўплаб давлатлар ва йирик фармацевтика компаниялари томонидан бир нечта вакциналар яратилиб, фуқароларни эмлаш орқали пандемияни жиловлашга эришилмоқда.

Айрим давлатларда эмлаш жараёнлари яхши ташкил қилинганлиги ва фуқароларнинг бу жараёнга бефарқ эмаслиги сабабли COVID-19 билан касалланиш ҳолатлари камайиб бормақда. Айрим давлатларда эса  аксинча эмлаш билан боғлиқ тадбирлар суст кетаётгани сабабли эпидемик вазият кучайиб бормоқда.

Мисол учун Ҳиндистонда кунига 50-100 мингдан ортиқ инсонлар коронавирусни юқтириб олмоқда. Шу билан биргаликда, бундай мураккаб вазият вируснинг янги мутациялари пайдо бўлишига ҳам сабаб бўлаётир. Шундай бўлсада, вакцина ер юзи аҳолиси ўртасида вируснинг барча мутацияга учраган турларига қарши тура олади.

Мутахассисларнинг кузатишларига кўра коронавирусга қарши эмлаш амалиёти шундан далолат берадики, нафақат эмланганлар касалликдан ҳимояланади, балки вакцинация сабабли ушбу ҳудудларда вируснинг айланиши ҳам камаяди.

Маълумки, бугун халқимиз саломатлигини асраш, уларни бу касалликдан ҳимоя қилиш мақсадида фуқароларимиз бепул эмланмоқда. Бу мамлакатимизда олиб борилаётган инсонпарварликнинг сиёсатининг чинакам ифодасидир.

Бироқ бу жараёнга бефарқлик, нафақат ўзимиз, балки яқинларимиз саломатлигини ҳам жиддий хавф остига қўяди. Афсуски, эмланишга беписанд муносабатда бўлиб, шифохоналарда ҳаво етишмаслиги ва нафас қисишидан қаттиқ азоб чекаётган беморлар фикримизга яққол мисол бўла олади. Шундай экан, пандемияни фақат вакцинация билангина енга оламиз!

Пўлат ҲАМЗАЕВ,

Ўзбекистон “Адолат” СДП

Жиззах вилоят Кенгаши

раиси ўринбосари