Вирус сизга “кафолат хати” берганми?

17.07.2021 22:07:50

Кўчаларда, бозорларда юрган одамларни кузатар экансиз, кўпчилиги ҳеч қандай ҳимоя восталарисиз юрибди. Нима, тождор вирус уларга кафолат хати берганми, “сенга юқмайман” деб, ҳайрон қоласан киши. Энг қизиғи, буларнинг орасида бизнинг яқинларимиз ҳам бор. Эҳтиёт бўлишини, карантин қоидаларига риоя қилишини айтсангиз, “ана одамлар юрибдику” деган гапни ҳам эшитасиз.

Азиз юртдошлар, 2021 йил 16 июль ҳолатига кўра, Ўзбекистонда коронавирус инфекцияси қайд этилганлар сони 118 881 нафарни ташкил этаётгани ҳақида маълумотлар бугун барчамизни сергакликка чорлаши керак. Аҳолига каронавирус пандемияси ҳали давом этаётганини тушунтириш, карантин чораларига амал қилишга чорлашимиз керак. Аҳолига ушбу вирусга қарши эмланишлари учун барча шароитлар яратилган бўлишига, соҳа вакиллар томонидан тушунтириш ишлари олиб борилаётганига қарамасдан негадир одамларда вакцина олишга қўрқув бор. Эмланишни ортга суряпти. Ахир фарзандларимиз ҳам қоқшол, қизамиқ каби турли касалликларга қарши эмланиш ундан сақланишнинг энг биринчи йўли эканлигини яхши биламиз ва эмланиш учун ўзимиз ҳаракат қиламиз. Ҳаттоки грипп, гепатитни юқтириб олмаслик учун пуллик хизматлардан ҳам фойдаланамиз. Коронавирусга қарши эмланиш ҳам юқоридагилар каби оддий ҳол эканлигини, вакцина олиш вирусдан сақланишнинг самарали йўли эканини унутманг, қадрли юртдошим.

Вирус ва унга қарши эмланиш масалари бўйича, ижтимоий тармоқларда тарқалаётган фейк хабарларга ишониб, қайсидир маънода антивируснинг фойдасидан зарари кўп деган тушунча одамлар онгида шаклланишига йўл қўймайлик. Ахир, ҳар куни расмий вазирлик ва идоралар томонидан берилаётган маълумотлардан ташқари, эмланган аҳолининг ўзи ҳам вакцинанинг таъсири ҳақида маълумот бериб боряпти-ку.

Бугунги кунда Жомбой туманимизда ҳам туман тиббиёт бўлими томонидан аҳолининг тўрт босқичга бўлган ҳолда эмлаш жараёнлари олиб борилмоқда. Биринчи ва иккинчи босқичда рўйхатга олинган аҳоли биринчи босқичда эмланишди. Эндиги навбатда учинчи ва тўртинчи гуруҳ вакилларини эмлаш жараёнлари амалга оширилмоқда. Ҳа, айтганча, тумандаги “адолатчи”лар ҳам вакцинация жараёнида фаол иштирок этиб, биринчилардан бўлиб эмланмоқда.

 

Комила УМАРОВА,

Ўзбекистон “Адолат” СДП Жомбой туман Кенгаши раиси

Улашинг!

Фикрингизни қолдиринг

Илтимос жавобингизни киритинг

+