Ягона тергов қўмитасига эҳтиёжимиз юқори

Ижтимоий тармоқларда кенг жамоатчиликнинг кескин нафратига сабаб бўлаётган Сурхондарё вилояти Денов туман «Оқтом» маҳалласида содир бўлган мудхиш воқеа қалбимни жунбушга келтирди.

Унда айтилишича, Ҳасан Хушматов исмли фуқаронинг оиласида низоли жанжал келиб чиққанлиги туфайли укаси Юнус Хушматов туман ички ишлар бўлимига «тинчлигимни бузяпти», деб хабар қилган. Шунга асосан, туман ИИО ФМБ профилактика инспектори ва унинг икки нафар ёрдамчиси Ҳ.Хушматовнинг хонадонига келишган ва уни автомашинага ўтқазиб, туман ИИБга олиб кетишган. Йўлда профилактика инспекторининг ёрдамчилари Ҳ.Хушматовни бир неча бор уриб тан жароҳати етказган. Оқибатда Ҳ.Хушматов 11 июль куни шифохонада вафот этган.

Нақадар аянчли воқеа, тўғрими? Сўнги вақтларда жамиятда бу каби хунук ҳодисаларнинг тез-тез такрорланаётгани ва уларга жиддий ечим топилмаётгани энг оғриқли муаммоларимиздан бирига айланмоқда. Воқеада келтирилган туман ИИО ФМБ профилактика инспектори ва унинг икки нафар ёрдамчисига қандай ҳуқуқ берилдики, бир инсоннни уриб, ўлдириш даражасига борса … Ёки улар форма кийиб орган ходими бўлиш хоҳлаган ишини қилишга руҳсат деб ҳисобламоқдами? Тан олишимиз керакки, бугунги жамиятмизда ёшлигидан орган формасини кийиб юрганларга хавас қилиб, шу соҳани танлаган ёшлар кўп. Аммо бизнинг камчиликларимиздан бири шуки, оддийгина оила муҳитида болаларга ушбу касбнинг салмоқли уст-бошига эътибор қаратиб, халқ орасида унинг асл қиймати қанчалик даражада муҳимлиги, адолат мезонларига тўлиқ амал қилиш ҳақида фикр юритмаймиз. Шу сабабми ўз касбининнг асл моҳиятини тушуниб етмаган вахшийлар орамизда тобора урчиб бормоқда. Бу каби ҳолатларга чек қўйиш фурсати келмадими? Бу борадаги қонун-қоидаларни қайтадан ислоҳ қилиш замони келмадими?

Депутатлар мазкур ҳолат бўйича ҳукуматнинг тегишли вакилларидан изоҳ талаб қилди. Яъни, ИИБ фаолияти қонунийлиги доимий прокуратура назоратида туриши шарт эканлиги, профилактика ишлари суст равишда олиб борилаётганлиги танқид остига олинди. Бу борада «Адолат» СДПнинг ягона тергов қўмитасини ташкил қилиш ҳақидаги таклифи мана шу каби ноқонуний ҳолатларга чек қўяди, деб ҳисоблайман.

Меҳринисо БОБОНАЗАРОВА,

Ўзбекистон “Адолат” СДП

Тошкент шаҳар Кенгаши

матбуот котиби