Жахолат изидан эмас, балки маърифат йўлидан бормоғимиз жоиз

Яқинда Суриянинг энг қайноқ нуқталаридан бири бўлган “Alhol” лагерида 3 йил давомида истиқомат қилган 24 нафар аёл ва 69 нафар болалар Ўзбекистонга қайтарилди. Улар орасида 7 нафар чин етимлар ҳам бор. Бугунги кунгача давлатимиз раҳбари Шавкат Мирзиёев бошчилигида 4 марта ўтказилган меҳр, инсонпарварлик операциясида Сурия, Ироқ ва Афғонистондан урушнинг оловли нуқталарида ҳаёт кечириб яқинларидан айрилган 438 нафар аёллар ва болалар Ўзбекистонга олиб келинганди. Юртдошларимиз орасида нега энди ўз истаги билан нотўғри йўлни танлаганлар юртимизга қайтарилиши керак, деган фикр ҳам йўқ эмас. Аммо бир нарсани доимо ёдда тутиш лозимки, жамиятда меҳр-оқибат ришталари мустаҳкам бўлиши учун биз жахолат изидан эмас, балки маърифат йўлидан бормоғимиз жоиз.

Халқимизда «Ҳар ерни қилма орзу - хар ерда бор тош-тарозу», деган пурмаъно нақл бор. Ватанни тарк этиб, ўзга юртда захмат чекканлар бунинг маънисини жуда яхши тушунишади. Бир зумда бойлик орттириш ёинки ўзга юртдагилар ҳаётига хавас қилиш мана шундай машаққатларни, оқибатларни келтириб чиқариши, шубҳасиз. Сўнги пушаймон эса …

Тағин ҳам юртимиз кишилари бағрикенг, саховатпеша. Кечиримлилик, бошга кулфат тушганда ёрдамини аямаслилик фазилатлари қон-қонга сингиб кетган. Адашганларга йўл кўрсатиб, уларга меҳр қўлини чўзиш азалий қадриятларимиздан. Шу боисдан уларни она юрт бағрига қайтариб тўғри йўлни кўрсатиш Юртбошимиз рахнамолигидаги олижаноблик ва чин инсонийлик муруввати бўлди.

Умрзак РАДЖАБОВ,

Халқ депутатлари Юнусобод туман Кенгаши депутати