Aholi turmush darajasini yaxshilashga qaratilgan ustuvor vazifalar belgilab olindi

Kuni kecha Davlatimiz rahbari hududlar iqtisodiyoti, aholi hayoti tarzi va amalga oshirilayotgan bunyodkorlik loyihalari bilan yaqindan tanishish maqsadida Andijon viloyatiga tashrif buyurdi.

Bashariyat tamadduniga katta hissa qo‘shgan qadimgi kentlar qatorida Andijon shahri ham, mamlakatimiz tarixi va taraqqiyotida o‘zining munosib o‘rniga ega. Bu azim shahar dunyoga buyuk davlat arbobi, betakror shoir va olim Zaxriddin Muxammad Boburni, hassos shoira Nodirabegimni, istiqlolning yalovbardor kurashchisi, buyuk shoir va adib, jaxon adabiyoti durdonalarini o‘zbek tiliga tarjima qilgan Sulaymon O‘g‘li Cho‘lponni, akademik, shoir, yozuvchi, dramaturg Komil Yashinni, betakror shoir Muxammad Yusufni, teatr va kino sanʼatining yorqin yulduzlari Abbos Bakirovni, Soyib Xo‘jayevni, bastakor To‘xtash Jalilovni, buyuk matematik olim Toshmuxammad Sarimsoqov kabi mashhur insonlarni yetkazib bergan.

Andijon viloyati Farg‘ona vodiysining sharqiy qismida joylashgan bo‘lib, bugungi kunda viloyat 14 ta tuman, 11 ta shahar va 954 ta mahallalarga bo‘lingan holda boshqarib kelinmoqda. Eʼtiborli jihati shundaki, viloyatdagi ushbu mahallalarning har bir o‘ziga xos madaniyati, rivojlanish bosqichi va o‘sish nuqtalariga ega.

Bu galgi tashrif davomida Prezidentimiz dastlab, aholi bandligini taʼminlashdagi muhim yo‘nalish bo‘lgan sanoat korxonalari faoliyati bilan yaqindan tanishish maqsadida Bo‘ston tumanidagi «Sayyora favvorasi» masʼuliyati cheklangan jamiyati tomonidan yaqinda ishga tushirilgan to‘qimachilik korxonasi faoliyati bilan yaqindan tanishdi. Ushbu korxonada nafaqat fuqarolar uchun tayyor ish o‘rinlari shu bilan birga, kasb-hunarga qayta tayyorlash bo‘yicha o‘quv markazlari ham tashkil etilgan. Bu esa, ko‘nglida ishlash istagi bo‘lib, qo‘lida hunarli bo‘lmagan minglab yoshlar uchun katta imkoniyatdir.

Aytish joizki, bundan bir necha yil oldin Bo‘ston tumani iqtisodiy jihatdan viloyatning boshqa tumanlariga nisbatan orqada qolayotgan tumanlardan biri edi. Tumanda ochilgan mana shunday korxonalar esa, tuman iqtisodiyotiga munosib hissa qo‘shish bilan bir qatorda minglab aholini munosib mehnat haqqiga ega bo‘lgan ish o‘rinlari bilan taʼminlanish imkonini beradi.

Maʼlumki, Davlatimiz rahbarining viloyatga qilgan avvalgi tashriflari davomida Andijonda aholi zich joylashgani, shu boisdan, aholini uy-joyga bo‘lgan ehtiyojini to‘laqonli taʼminlashda bugungi zamonaviy yondashuvlardan samarali foydalanish bo‘yicha ham tegishli ko‘rsatmalar berilgan edi. Bu galgi tashrif davomida, Andijon tumanidagi Sadda tagi mahallasida bo‘lib, aholi turmushi bilan yaqindan tanish asnosida mahalladagi Mamadaliyevlar xonadonida tajriba tariqasida qurilgan yig‘ma uylarni ham kirib ko‘rdi. Maʼlum qilinishicha, xonadon hovlisida qurilgan bunday uylar kamxarj, issiq-sovuq va yong‘inga chidamli, qurish ham oson, bunday uylarni ko‘paytirish esa aholiga faqatgina qulaylik tug‘diradi.

Shu yerda mahalla aholisi va faollar bilan suhbatlashib, fuqarolarning amalga oshirilayotgan bunyodkorlik ishlariga bo‘lgan fikrlarini so‘rab dildan suhbatlashdi. Umuman olganda so‘nggi yetti yilda Andijon viloyati barcha soha va yo‘nalishlarda Respublikamizning yetkachi viloyatlari qatoridan o‘rin oldi.

Xususan, o‘tgan 2021-2022 yillarda viloyatda umumiy qiymati qariyb 20 trillion so‘m teng 600 dan ziyod investitsiya loyihasi amalga oshirildi. Natijada, 14,7 mingta ish o‘rinlari yaratildi. Bunda to‘qimachilik, qurilish materiallari, elektr texnikasi, charm-poyabzal, oziq-ovqat va farmatsevtika sohalari “drayver” bo‘ldi. 

Birgina 2022 yilda viloyatda yalpi hududiy mahsulot ishlab chiqarish hajmi 54,5 trillion so‘mni tashkil etib, 2021 yilga nisbatan 8,6 foizga o‘sdi. Jumladan, sanoat mahsulotlari ishlab chiqarish 22,6 foizga, xalq isteʼmoli mollari ishlab chiqarish 43,1 foiz, qishloq xo‘jaligi mahsulotlari ishlab chiqarish 3,5 foiz, qurilish ishlari hajmi 7,2 foiz, chakana savdo aylanmasi 11,3 foiz, kapital qo‘yilmalar hajmi 19,9 foiz, xizmatlar hajmi 12,9 foiz, tashqi savdo aylanmasi 35,3 foiz, eksport hajmi 27,3 foizga o‘sdi.

Xulosa qilib aytganda, bu galgi tashrif doirasida belgilab berilgan reja va chora-tadbirlarning amalga oshirilishi 2023 yil yakuniga kelib, viloyat iqtisodiyoti yana-da yuksalib, aholi turmush farovonligi yaxshilanishiga xizmat qiladi.

Mavluda Adxamjonova,

Oliy Majlis Qonunchilik palatasi deputati,

"Adolat" SDP fraksiyasi a'zosi