Dolzarb qonun loyihalari muhokama qilindi

Oliy Majlis Qonunchilik palatasidagi “Adolat” SDP fraksiyacining yig‘ilishida “O‘zbekiston Respublikasi Mehnat kodeksining 208-moddasiga qo‘shimcha va o‘zgartish kiritish to‘g‘risida”gi qonun loyihasining muhokamasi qizg‘in kechdi.

Ta’kidlanganidek, hozirgi vaqtda yurtimizda kasaba uyushmalari tizimida 34 mingdan ortiq boshlang‘ich tashkilotlar samarali faoliyat ko‘rsatib, soha bo‘yicha 6 ming 700 dan ziyod xodim va 300 mingga yaqin faollar fidokorona xizmat qilmoqda.

Mamlakatimiz kasaba uyushmalari o‘z saflarida 5,5 milliondan ziyod xodimlarni birlashtirgan eng yirik jamoat tashkiloti hisoblanadi. Uning a’zolari soni doimiy tarzda ko‘payib bormoqda. Shu bois, har yili 11 noyabr ‒ O‘zbekiston kasaba uyushmalari kuni respublikamizning barcha ishchi-xodimlari tomonidan muhim sana sifatida keng nishonlanadi.

Lekin amaldagi qonunlarda 11 noyabr sanasi ishlanmaydigan bayram kuni sifatida e’tirof etilmagan. Shuningdek, bayram tadbirlarini o‘tkazishni tashkil etish hamda xodimlarni rag‘batlantirish choralarini ko‘rish mexanizmlari belgilanmagan.

Mazkur qonun loyihasi bilan O‘zbekiston Respublikasining Mehnat kodeksiga 11 noyabrni ishlanmaydigan bayram kunlari qatoriga qo‘shishga qaratilgan qo‘shimcha kiritilmoqda.

Fraksiya a’zolari ushbu qonun loyihasining qabul qilinishi xodimlarning kasbiy, mehnatga oid, ijtimoiy-iqtisodiy huquqlarini ta’minlash tizimini yanada kuchaytirishga xizmat qililishini e’tiborga olib, uni qo‘llab-quvvatladilar.

Shundan so‘ng, pedagog xodimning jamiyatdagi maqomini yuksaltirish, uning faoliyati bilan bog‘liq huquqiy, ijtimoiy va iqtisodiy munosabatlarni tartibga solish va kasbiy kamol topishi uchun sharoit yaratish hamda huquqiy kafolatlarini ta’minlash maqsadida ishlab chiqilgan “Pedagog xodimning maqomi to‘g‘risida”gi qonun loyihasi ko‘rib chiqildi.

Muhokamalar chog‘ida deputatlar mazkur qonun loyihasining qabul qilinishi bilan pedagog xodimlarning jamiyatdagi nufuzi oshishini aytib, hujjat yuzasidan o‘z takliflari, fikr-mulohazalarini bildirdi.

—Har jihatdan mukammal qonunlar, eng avvalo, inson manfaatlarini ta’minlash, mamlakatni izchil taraqqiy toptirish, iqtisodiy barqarorlikni kafolatlashga xizmat qiladi, — deydi Qonunchilik palatasidagi “Adolat” SDP fraksiyaci a’zosi Dilmurod Ismoilov. —Shu sababli biz qonun loyihasini muhokama qilish chog‘ida bu masalaga alohida e’tibor qaratdik. Fraksiyamiz a’zolari tomonidan ilgari surilgan bir qator takliflar inobatga olinib, qonun loyihasida o‘z aksini topadigan bo‘ldi.

Yig‘ilishda shuningdek, bir qator qonun loyihalari partiya maqsad va vazifalaridan kelib chiqib qizg‘in muhokama qilinib, deputatlar tomonidan ma’qullandi.