Fraksiya a’zolari Hukumatning hisobotini qanday baholadi?

2023 yil 10 may kuni Oliy Majlis Qonunchilik palatasidagi “Adolat” SDP, O‘zXDP hamda O‘zbekiston Ekologik partiyasi fraksiyalarining kengaytirilgan yig‘ilishi bo‘lib o‘tdi.

Unda Vazirlar Mahkamasining “2022 – 2026 yillarga mo‘ljallangan Yangi O‘zbekistonning taraqqiyot strategiyasini “Insonga e’tibor va sifatli ta’lim yili”da amalga oshirishga oid davlat dasturining 2023 yil birinchi choragida bajarilishi yuzasidan hisoboti muhokama qilindi.

Ta’kidlanganidek, 2023 yilning I choragida yalpi ichki mahsulot o‘sishi o‘tgan yilning shu davriga nisbatan 105,5 foiz, shundan yalpi ichki mahsulot tarkibida sanoat 104,1 foiz, xizmatlar 107,0 foiz, qishloq xo‘jaligi 103,2 foizni tashkil qildi. O‘tgan davr mobaynida davlat budjeti ja’mi xarajatlari 47,3 trln. so‘mni, shundan ijtimoiy sohalarga yo‘naltirilgan harajatlar 18,1 trln so‘mni tashkil qildi. Ushbu sarflangan xarajatlar o‘tgan yilning mos davriga nisbatan 22,3 foizga oshgan.

Yig‘ilishda “Adolat” SDP fraksiyasi a’zolari tomonidan Davlat dasturining partiya saylovoldi dasturi bilan hamohang bo‘lgan inson huquqlari va erkinliklarini himoya qilish, xususan, advokatura instituti jozibadorligini oshirish, sohaga yosh kadrlarni jalb qilish bo‘yicha amalga oshirilayotgan ishlar alohida e’tirof etildi.

Shuningdek, Davlat dasturi doirasida boshlangan va amalga oshirilayotgan loyihalarni 2023 yilning qolgan davrida ham izchil davom ettirish, belgilangan vaziflarni amalga oshirishda sustkashlikka yo‘l qo‘ymaslik kerakligi ta’kidlab o‘tildi.

Qayd etilganidek, Davlat dasturining ijrosida Xalq demokratik partiyasining elektorati uchun muhim ahamiyatga ega bo‘lgan — adolatli ijtimoiy siyosat yuritish, inson kapitalini rivojlantirish yo‘nalishlarida tizimli ishlar amalga oshirilgan. Xususan, respublika bo‘yicha og‘ir ijtimoiy ahvolga tushib qolgan 78 mingga yaqin ishsiz xotin-qizlarning manzilli ro‘yxati shakllantirildi. Ularni kasb-hunarga o‘qitish choralari ko‘rilmoqda. “Ayollar daftari”ga kiritilgan 1 mln. 680 ming xotin-qizning 225 mingdan ziyodiga toifalarga ajratilgan holda yordam ko‘rsatildi.

Shuningdek, professional ta’lim muassalari xodimlari mehnatiga haq to‘lashning takomillashtirilgan tizimini joriy etish va ularni moddiy rag‘batlantirishni kuchaytirish to‘g‘risida Prezident qarori loyihasi ishlab chiqildi. Qaror loyihasi qabul qilinishi natijasida respublikadagi professional ta’lim muassasalarida faoliyat yuritayotgan o‘qituvchilar lavozim maoshlarini o‘rtacha 20 foizga oshirishga erishiladi.

O‘zXDP fraksiyasi a’zolari hududlardagi ijtimoiy masalalarni samarali hal etishga, ijtimoiy sohaning barqarorligini ta’minlashga, ehtiyojmand qatlam vakillarini har tomonlama qo‘llab-quvvatlashga alohida e’tibor qaratilayotganini yuqori baholab, reabilitatsiya markazlarida nogironligi bo‘lgan shaxslarni reabilitatsiya choralari bilan qamrab olish ko‘lamini 5 baravarga oshirish, talabalarni yotoqxonaga onlayn joylashish imkoniyatlarini beruvchi, Davlat xizmatlari markazi va Yagona interaktiv davlat xizmatlari portali orqali ko‘rsatiladigan bepul elektron xizmatni joriy etish kabi masalalar ijrosiga alohida e’tibor qaratish zarurligini qayd etishdilar.

Qayd etilganidek, “Yashil makon” umummilliy loyihasi doirasida bahorgi ko‘chat ekish mavsumida 127,7 mln. dona ko‘chat va qalamchalar ekilgan. Shu bilan birga, eksportbop mahsulotlar yetishtirish hamda meva-sabzavotchilikni rivojlantirish, intensiv bog‘lar maydonini 1,5 baravarga va issiqxonalarni 1,2 baravar ko‘paytirish bo‘yicha tasdiqlangan chora-tadbirlar dasturi doirasida 25 ming gektar bog‘lar va 35 ming gektar tokzorlar barpo etish ko‘zda tutilgan bo‘lib, hisobot davrida 10,9 ming gektar bog‘lar, 8,6 ming gektar tokzorlar tashkil qilingan hamda ularga 23,9 mln dona ko‘chatlar ekilgan.

O‘zbekiston Ekologik partiyasi fraksiya a’zolari tomonidan Orolbo‘yi hududini ekologik jihatdan tiklash ishlarini kengaytirish, olis hududlaridagi aholini toza ichimlik suv bilan ta’minlash, maishiy chiqindilarni yig‘ish va uni qayta ishlash tadbirlarini o‘z muddatida, sifatli ijrosini ta’minlash borasida taklif va mulohazalar bildirildi.

Yig‘ilishda Davlat dasturi bandlari ijrosining borishi yuzasidan samarali parlament nazoratini amalga oshirishga kelishib olindi. Fikr-mulohaza, savol-javoblarga boy bo‘lgan yig‘ilishda fraksiya a’zolari tomonidan Hukumat hisoboti qo‘llab-quvvatlandi.