Muddatidan ilgari o‘tkazilayotgan prezidentlik saylovi yangi Konstitutsiya asosida barqaror rivojlanishni ta’minlaydi

2023 yil mamlakatimiz tarixida demokratik yangilanish va o‘zgarishlar davri sifatida joy olmoqda. Boisi, ilk bor referendum yo‘li bilan qabul qilingan yangi tahrirdagi Konstitutsiya Yangi O‘zbekiston strategiyasini amalga oshirishning siyosiy-huquqiy asoslarini yaratib, milliy davlatchilik taraqqiyotining tarixiy muhim bosqichida davlat va jamiyatni yanada rivojlantirishning ustuvor yo‘nalishlarini belgilab berdi.

Eng muhimi, ushbu jarayonda fuqarolarimiz faollik ko‘rsatib, o‘zlarining fikr-mulohazalari va ertangi kunga bo‘lgan ishonchini oshirishga qaratilgan takliflari bilan faol ishtirok etishdi. Buni birgina yangi tahrirdagi Konstitutsiyani qabul qilish bo‘yicha o‘tkazilgan 30 apreldagi referendumda saylovchilarning 90,21 foizi tomonidan yoqlab ovoz berilganida ham ko‘rish mumkin.  

Hech shubhasiz aytish mumkinki, bugungi ko‘p millatli xalqimizning mamlakatimiz taraqqiyoti yo‘lidagi bunday jipsligi so‘nggi yillarda jamiyatda amalga oshirilgan so‘z erkinligi va ochiqlik kabi islohotlarning yaqqol namunasidir. Albatta, yangi Konstitutsiyamizda belgilangan yangi normalarning hayotimizga to‘la to‘kis tatbiq etilishi boshlangan islohotlarni yangi kuch va shijoat bilan davom ettirishni taqozo etadi.

Shu bois joriy yil 8 may kuni O‘zbekiston Respublikasi Prezidenti Shavkat Mirziyoyev Oliy Majlis palatalari, siyosiy partiyalar, sud va ijro etuvchi hokimiyat organlari rahbarlari hamda jamoatchilik faollari bilan o‘tkazgan muloqotida qonunchilik, va yangi tahrirdagi Konstitutsiyada amaldagi Prezidentlik vakolatini 2026 yilgacha amalga oshirib, undan keyin yana ikki marta yetti yillik muddatga saylanish imkoniyati berilganligiga qaramasdan asosiy qonunimizdagi yangilanishlar orqali hokimiyatning barcha bo‘g‘inlari isloh qilinib, ular o‘rtasidagi munosabat va muvozanat jiddiy o‘zgarayotganligi hamda prezident, parlament, hukumat, vazirlar, hokimlar oldiga kechiktirib bo‘lmaydigan yangi siyosiy, ijtimoiy va iqtisodiy vazifalarni qo‘yayotganligini hisobga olib, muddatidan ilgari prezidentlik saylovini o‘tkazish tashabbusini bildirdi.

Shubhasiz, muddatidan ilgari o‘tkazilayotgan prezidentlik saylovi mamlakatimizni yangilangan Konstitutsiya qoidalari asosida barqaror rivojlantirish yo‘nalishlarini xalqimiz bilan bamaslahat belgilab olish uchun sharoit yaratadi.  

Boisi, siyosiy tizimning yangilanishi, saylanadigan nomzodlarning xalq oldida hisobot berishi islohotlarni jadallashtiradi. Hech kimga sir emaski, saylovlar oldidan nomzodlar faol bo‘lib, xalqni qiynayotgan dolzarb masalalar bo‘yicha o‘z yechimlarini taklif etadi.

Bu o‘z navbatida joylardagi muammolar o‘z yechimini topishini tezlashtiradi, kerak bo‘lsa, unga ajratilishi qiyin bo‘lgan mablag‘lar ajratiladi, yangicha konstitutsiyaviy shart-sharoitlarga monand ravishda jamoani shakllantirib, ishni ham yangicha tashkil etish imkonini beradi hamda davlat hokimiyatining legitimligini yanada mustahkamlaydi.

Ya’ni, mamlakatimizni kelgusi yetti yillikda barqaror rivojlantirish, aholi turmush farovonligini yanada yuksaltirish borasida har bir partiya o‘z yo‘li va takliflarini ilgari suradi. Xalqimiz esa ushbu jarayonda o‘z kelajagi uchun eng to‘g‘ri yo‘l deb bilgan nomzodni va uning dasturini qo‘llab-quvvatlab, o‘z tanlovini amalga oshiradi.

Shu bois hech shubhasiz aytish mumkinki, ushbu muddatidan oldin o‘tkazilayotgan prezidentlik saylovi mamlakatimizda asosiy siyosiy kuch bo‘lgan beshta partiya uchun emas, eng avvalo ko‘p millatli xalqimiz uchun katta imkoniyat demakdir.

Ushbu jarayonni qonunga muvofiq  ochiq va oshkora tarzda o‘tkazish, siyosiy partiyalar hamda prezidentlikka nomzodlarga yurtimiz tinchligi va uning ravnaqiga, xalqimiz farovonligiga xizmat qiladigan yangi g‘oya va tashabbuslar bilan maydonga chiqishlari uchun esa yangilangan Konstitutsiyamizda barcha huquqlar kafolatlangan.

Mavluda ADHAMJONOVA,

Oliy Majlis Qonunchilik palatasi deputati