Pedagog xodimning huquqlari milliy qonunchilikda mustahkamlanmoqda

Joriy yilning 1 may kuni O‘zbekiston “Adolat” sotsial-demokratik partiyasi fraksiyasi yig‘ilishi bo‘lib o‘tdi. Yig‘ilishda “Pedagog xodimning maqomi to‘g‘risida”gi O‘zbekiston Respublikasining qonuni loyihasi keng va atroflicha muhokama etildi.

Taʼkidlash joizki, pedagog xodimning jamiyatdagi maqomini yuksaltirish, uning faoliyati bilan bog‘liq huquqiy, ijtimoiy va iqtisodiy munosabatlarni tartibga solish va kasbiy kamol topishi uchun sharoit yaratish hamda huquqiy kafolatlarini taʼminlash maqsadida “Pedagog xodimning maqomi to‘g‘risida”gi Qonun loyihasi ishlab chiqilgan.

Qonun loyihasi bilan quyidagilar taklif etilmokda:

taʼlim tashkilotlari pedagog xodimlarining huquqlari, shaʼni,

qadr-qimmati va ishchanlik obro‘si davlat himoyasi ostida bo‘lishini kafolatlash maqsadida, shaʼni, qadr-qimmatini himoya qilish masalasida va mansabdor shaxslarning xatti-harakatlari ustidan sudga murojaat qilganida davlat bojini to‘lashdan ozod etish;

pedagog xodimni lavozim majburiyati va kasbiy faoliyati bilan bog‘liq bo‘lmagan ishlarga, yig‘ilishlar va boshqa tadbirlarga jalb qilishni taqiqlash;

ilk bor kasbiy faoliyat boshlayotgan shaxsga bir o‘quv yili davriga o‘qituvchi-murabbiylikni amalga oshiruvchi pedagog xodimni biriktirish;

davlat taʼlim tashkilotlarida faoliyat yuritayotgan pedagog xodimlarni davlat sog‘liqni saqlash muassasalarida majburiy tibbiy ko‘rikdan bepul o‘tishi;

pedagog xodimning kasbiy faoliyati davomida yuqumli kasalliklarga qarshi bepul profilaktik emlash davlat tomonidan taʼminlanishi;

davlat taʼlim tashkilotlaridagi pedagog xodimlarni taʼlim berish jarayonida foydalaniladigan birlamchi o‘quv-metodik materiallar va o‘quv qurollari (ruchka qalam, qog‘oz va boshqalar) bilan davlat tomonidan bepul taʼminlash;

o‘quv reja va dastur o‘zgarganda (yangi fan kiritilganda yoki mavjud fan chiqarib tashlanganda) davlat taʼlim tashkilotlarining pedagog xodimlarini yangi turdosh fan bo‘yicha qayta tayyorlashni Davlat byudjeti hisobidan amalga oshirilishi;

ellik olti ish kunidan iborat yillik haq to‘lanadigan uzaytirilgan taʼtil berish.

Qonunning qabul qilinishi bilan pedagog xodimlar maqomi belgilanadi, ularning jamiyatdagi nufuzi oshadi, pedagogik faoliyatga bo‘lgan talab oshgan holda taʼlim berish tizimi yana-da kuchayadi, ularning mehnatini munosib rag‘batlantirish imkoniyatlari kengayishiga mustahkam zamin yaratiladi.

TAVAKKAL Choriyev,

"Adolat" SDP fraksiyasi a'zosi,

Oliy Majlis qonunchilik palatasi deputati