Bolani chet davlat hududida nazoratsiz qoldirgani uchun maʼmuriy va jinoiy javobgarlik belgilanmoqda

Oliy Majlis Qonunchilik palatasidagi “Adolat” sotsial-demokratik partiyasi fraksiyasining navbatdagi yig'ilishida bir qator qonun loyihalari ko'rib chiqildi.

Xususan, “O'zbekiston Respublikasining ayrim qonun hujjatlariga bola huquqlari himoyasini yanada kuchaytirishga qaratilgan qo'shimcha va o'zgartishlar kiritish to'g'risida”gi qonun loyihasi muhokamalar markazida bo'ldi.

Qayd etilganidek, mamlakatimizda bolalar huquqlari, erkinliklari va qonuniy manfaatlarini ishonchli himoya qilishning institutsional va huquqiy asoslarini tubdan takomillashtirish, bolalar orasida nazoratsizlik va huquqbuzarliklar sodir etilishining barvaqt oldini olishga qaratilgan keng ko'lamli ishlar amalga oshirilmoqda.

Shu bilan birga, so'nggi vaqtlarda uchrayotgan bolalarni nazoratsiz turli chet el davlatlarida qoldirib kelish kabi salbiy holatlar voyaga etmaganlarning jismoniy, intellektual, ruhiy va ma'naviy ahvoliga salbiy ta'sir ko'rsatmoqda.

Yig'ilishda mutasaddilar qonun loyihasi yuzasidan tushuntirish berar ekan, ushbu hujjat ota yoki ona yoxud ularning o'rnini bosuvchi shaxs yoki hamrohlik qiluvchi shaxs tomonidan bolaning chet el davlati hududida nazoratsiz qoldirgani uchun ma'muriy va jinoiy javobgarlikni belgilash orqali bolalarning huquqlari va qonuniy manfaatlarini ishonchli himoya qilishga xizmat qilishini bildirdi.

Muhokamalar davomida fraksiya a'zolari qonun loyihasini tayyorlash chog'ida xorij tajribasi ham o'rganilganligi bilan qiziqdi.

Ma'lum qilinishicha, loyihani tayyorlash jarayonida xorijiy tajriba ham o'rganilgan. Xususan, Germaniya, Fransiya, Kanada, AQSh, Buyuk Britaniya va Koreya kabi davlatlarda bu kabi qilmishlar uchun javobgarlik mavjudligi aniqlangan.

Fraksiya a'zolari qonun loyihasini ko'rib chiqish davomida partiya pozitsiyasidan kelib chiqqan holda bir qator takliflar berishdi. Hujjatdagi ayrim normalar yuzasidan asosli savollar o'rtaga tashlandi.

Qonun tashabbuskorlari yig'ilishda ko'tarilgan barcha savollarga batafsil javoblar qaytardi. Deputatlar tomonidan berilgan takliflar e'tiborga olinib, qonun loyihasi ma'qullandi.