Sud amaliyotida vujudga kelayotgan muammolar bartaraf etiladi

Oliy Majlis Qonunchilik palatasidagi “Adolat” sotsial-demokratik partiyasi fraksiyasining navbatdagi yig‘ilishida “Ma’muriy qamoqni o‘tash tartibi to‘g‘risida”gi O‘zbekiston Respublikasi Qonuniga o‘zgartishlar kiritish haqida”gi qonun loyihasi ko‘rib chiqildi.

Ta’kidlanganidek, keyingi yillarda mamlakatimizda sud-huquq tizimini yanada takomillashtirish, fuqarolar huquqlari hamda qonuniy manfaatlarini ishonchli himoya qilish choralarini kuchaytirish bo‘yicha izchil ishlar olib borildi. Bu borada qator qonun hujjatlari qabul qilindi.

Xususan, “Sud qarorlarini qayta ko‘rish institutining takomillashtirilishi munosabati bilan O‘zbekiston Respublikasining Ma’muriy javobgarlik to‘g‘risidagi kodeksiga o‘zgartish va qo‘shimchalar kiritish haqida”gi qonun qabul qilinib, u bilan ma’muriy huquqbuzarliklar to‘g‘risidagi ishlarni ko‘rib chiqish vakolati ma’muriy sudlardan jinoyat ishlari bo‘yicha sudlarga o‘tkazildi.

Ammo ushbu o‘zgartishlardan kelib chiqib, boshqa qonunlarni ham ushbu qonunga muvofiqlashtirish zarurati vujudga kelmoqda. Shu sababli Oliy Majlis Qonunchilik palatasining bir guruh deputatlari tashabbusi bilan mazkur qonun loyihasi ishlab chiqildi. Ushbu hujjat bilan “Ma’muriy qamoqni o‘tash tartibi to‘g‘risida”gi qonunga tegishli o‘zgartishlar kiritilishi nazarda tutilmoqda. Xususan, “Ma’muriy qamoqni o‘tash tartibi to‘g‘risida”gi O‘zbekiston Respublikasi Qonunining 5 va 24-moddalaridagi “Tuman (shahar) sudi ma’muriy ishlar bo‘yicha” degan so‘zlar “Jinoyat ishlari bo‘yicha tuman (shahar) sudi” degan so‘zlar bilan almashtirilmoqda.

Yig‘ilishda deputatlar ushbu qonunda nazarda tutilgan yangiliklar “Adolat” sotsial-demokratik partiyasi saylovoldi dasturida belgilangan ustuvor vazifalarga uyg‘un va hamohang ekanligini ta’kidladi.

—Adolatni qaror topishida sud hokimiyatining o‘rni katta. Biz sud hokimiyati mustaqil, sudlar esa adolat ko‘rg‘onlari bo‘lishi tarafdorimiz, — deydi Oliy Majlis Qonunchilik palatasidagi “Adolat” sotsial-demokratik partiyasi fraksiyasi a’zosi Inomjon Qudratov. — Mubolag‘asiz aytish mumkinki, ushbu qonun loyihasining qabul qilinishi sud amaliyotida vujudga kelayotgan muammolarni bartaraf etilishiga hamda turli xil yondashuvlarning oldi olinishiga xizmat qiladi. Shu bois, qonun loyihasini yanada takomillashtirish bo‘yicha bir qator takliflar berib, uning bugungi kundagi ahamiyati va zaruratini e’tiborga olgan holda qo‘llab-quvvatladik.

Yig‘ilishda fraksiya vakolatiga taalluqli boshqa masalalar ham ko‘rib chiqilib, tegishli qaror qabul qilindi.