YeTTBning Samarqand sammiti O‘zbekiston iqtisodiy islohotlarining yuksak e’tirofidir

O‘zbekistonda so‘nggi yillarda barcha sohalarda bo‘lgani kabi iqtisodiyotni yanada erkinlashtirish, biznesga keng yo‘l ochish, bu borada qonun ustuvorligi va huquqiy kafolatlarni mustahkamlash bo‘yicha tizimli ishlar amalga oshirildi.

Jumladan, mintaqamizdagi eng qulay fiskal tizimni yaratish bo‘yicha katta o‘zgarishlarga erishildi. Xususan, qo‘shilgan qiymat solig‘i stavkasi dastlab 20 foizdan 15 foizga, 2023 yil boshidan 12 foizga tushirildi, valyuta operatsiyalariga ruxsat berildi. Shuningdek, qo‘shilgan qiymat solig‘ini eksportchi korxonalarga 7 kun ichida qaytarish joriy qilingani, soliq va bojxonada o‘zaro hisobga olish yo‘lga qo‘yilgani tadbirkorlarga juda katta qulayliklar yaratib bermoqda.    

Eng muhimi, hozirgi vaqtda xalqaro maydonda davom etayotgan murakkab va tahlikali jarayonlar, bashorat qilib bo‘lmaydigan o‘zgarishlar dunyo iqtisodiyotini jiddiy sinovdan o‘tkazayotganiga qaramasdan mamlakatimizda erishilayotgan iqtisodiy ko‘rsatkichlar xalqaro hamjamiyat tomonidan ham munosib e’tirof etilmoqda.  

Xususan, ikki yildan buyon an’anaviy tarzda o‘tkazib kelinayotgan Toshkent xalqaro investitsiya forumi va unda ishtirok etgan ishbilarmon doiralar vakillari va joriy yil 16-18 may kunlari Samarqand shahrida bo‘lib o‘tgan Yevropa tiklanish va taraqqiyot banki Boshqaruvchilar kengashining 32-yillik yig‘ilishi doirasida ham O‘zbekistonda iqtisodiyotni rivojlantirish borasida qiilinayotgan ishlar yuqori baholandi.  

Jumladan, Yevropa tiklanish va taraqqiyot banki Boshqaruvchilar kengashining bu yilgi yig‘ilishi qadimiy va betakror Samarqandda o‘tkazilayotgani mamlakatimiz hamda islohotlarimizga yuksak ishonch va e’tibor ifodasidir.  

Ushbu islohotlar dasturini amalga oshirishda Yevropa tiklanish va taraqqiyot banki O‘zbekistonning strategik hamkorlaridan biri sanaladi. Bugunga kelib uning mamlakatimizdagi loyihalar portfeli 4 milliard yevrodan oshgan. Shundan 3,3 milliard yevrolik loyihalar so‘nggi to‘rt yilda boshlangan. O‘tgan yil yakuni bilan O‘zbekiston bankning beshta eng asosiy hamkorlari qatoriga kirgan. Yillik investitsiya hajmi bo‘yicha esa uning Markaziy Osiyodagi eng yirik biznes sherigidir.  

Kengash yig‘ilishining ochilish marosimida nutq so‘zlagan davlatimiz rahbari O‘zbekiston uchun xususiylashtirish va xususiy sektor uchun keng sharoitlar yaratish, infratuzilma, tibbiyot, ta’lim, transport, ekologiya kabi davlat ixtiyoridagi sohalarda davlat-xususiy sheriklik loyihalarini kengaytirish, “yashil iqtisodiyot”, ayniqsa, “yashil energiya” sohalarini jadal rivojlantirish, ayollar tadbirkorligini yanada qo‘llab-quvvatlash, yangi agrotexnologiyalarni joriy etish, suvni tejash va oziq-ovqat xavfsizligini ta’minlash ustuvor vazifalardan ekanligini ta’kidlab o‘tdi.  

Davlatimiz rahbari bank bilan hamkorlikda bu sohalarda yangi loyiha va dasturlar amalga oshirilishini ma’lum qildi. Shuningdek, bankni qo‘shni mamlakatlar bilan hamkorlikdagi mintaqaviy loyihalarda ishtirok etishga taklif etdi.  

Shu o‘rinda aytib o‘tish kerakki, O‘zbekistonda iqtisodiy islohotlar jarayonida banklar faoliyatini rivojlantirishga ham alohida e’tibor qaratilmoqda. Xususan, 2022-2026 yillarga mo‘ljallangan Taraqqiyot strategiyasida iqtisodiyotning real sektorida hamda moliya va bank sohalarida ishlab chiqarish va operatsion jarayonlarni raqamlashtirish darajasini 2026 yil yakuniga qadar 70 foizga yetkazish maqsad qilingan.  

Yevropa tiklanish va taraqqiyot banki Boshqaruvchilar kengashining 32-yillik nufuzli tadbiri mamlakatimizda o‘tkazilgani esa, bu borada ko‘zlangan maqsadlarga yanada yuqori natijalar bilan erishish imkonini beradi. Jumladan, tadbirlar doirasida O‘zbekiston investitsiya taqdimoti ham o‘tkazilib, biznes sohasida qanday katta imkoniyatlar borligi ko‘rsatib berildi. Bundan tashqari, anjuman sessiyalarida sog‘liqni saqlash, ta’lim, infratuzilma, transport, energetika sohalarida 40 dan ortiq yirik xususiy sheriklik loyihalari taqdimot qilinadi.  

Xech shubhasiz aytish mumkinki, bunday nufuzli iqtisodiy tadbirlar va ular doirasida erishilgan kelishuvlar yaqin vaqt ichida mamlakat iqtisodiyotini yanada yuksaltirish, aholi turmush farovonligini oshirishda o‘z samarasini ko‘rsatmasdan qolmaydi.  

Oltinoy Mamirova,  

Oliy Majlis Qonunchilik palatasi deputati,

O‘zA