Nomzod ma'ruzasi
- Saylovoldi dastur qoraqalpoq tilida
Oʻzbekiston Respublikasi Prezidentligiga nomzod
Maxmudova Robaxon Anvarovnaning “Adolat” SDP XI Qurultoyidagi
MAʼRUZASI
Assalomu alaykum, hurmatli Qurultoy delegatlari va ishtirokchilari!
Prezidentlikka nomzod sifatida Sizning muhokamangizga oʻz Saylovoldi dasturim loyihasini havola etishga ijozat bergaysizlar.
Dastur oʻnta yoʻnalishdan iborat boʻlib, unda huquqiy davlat, ijtimoiy adolatni qaror toptirish, fuqarolik jamiyatini barpo etish, iqtisodiyot, taʼlim va ilm-fan, sogʻliqni saqlash, ekologiya, oilani mustahkamlash, yuksak maʼnaviyatli jamiyat qurish, tinchliksevar tashqi siyosat yoʻnalishlari qamrab olingan.
Uning qariyb beshdan bir qismi hozir men toʻxtalib oʻtmoqchi boʻlgan, Adolat partiyasining bosh gʻoyasini tashkil qiluvchi Huquqiy davlat qurishga oid birinchi yoʻnalishga toʻgʻri keladi.
BIRINCHI YOʻNALISHDA
HUQUQIY DAVLAT QURISH – PIROVARD MAQSADIMIZ
Xalqimiz maʼqullab bergan Konstitutsiyada ilk bor Oʻzbekiston Respublikasi huquqiy davlatdir, degan qoida oʻz ifodasini topdi.
Endilikda Konstitutsiyamizda mustahkamlangan mazkur gʻoya va normalarni hayotga toʻla tatbiq etish, jamiyatda qonun va adolat ustuvorligini, inson huquq va manfaatlari, uning qadr-qimmatini yanada samarali taʼminlash borasida izchil va kompleks chora-tadbirlar koʻrilishi lozim.
Bosh qomusimizda inson huquqlari kafolatlariga oid normalar ham uch yarim barobar koʻpaytirildi. Bu esa barcha sohalarda qonun ustuvorligini taʼminlash eng ustuvor vazifamiz boʻlishi lozimligini anglatadi.
Negaki, qonun ustuvor boʻlgan jamiyatda tinchlik va osoyishtalik hukm suradi, taraqqiyotning barqaror va bardavomligi taʼminlanadi, xalqning davlat siyosatiga va kelajakka boʻlgan ishonchi ortadi, fuqarolarning Vatan taqdiriga daxldorlik tuygʻusi yuksaladi.
Shu nuqtai nazardan, biz “Qonun ustuvorligi – adolatli jamiyat qurishning muhim sharti!” degan tamoyilni jamiyatning har bir aʼzosi, ayniqsa, mansabdor shaxslar faoliyatining muhim qoidasiga aylantirishga intilamiz.
Biz uchun oliy qadriyat bu – inson, uning huquq va erkinliklaridir!
Inson huquq va erkinliklarini taʼminlash, har bir shaxsning qadr-qimmatini eʼzozlash erkin va adolatli jamiyatning ajralmas xususiyatidir.
Inson huquq va erkinliklarini ishonchli himoya qilish uchun, biz sudlar adolat qoʻrgʻoni boʻlishi tarafdorimiz!
Bu borada, avvalo, sudlar mustaqilligini taʼminlash maqsadida sudyalarning xalq deputatlari Kengashlariga axborot berish amaliyotini bekor qilishni ilgari suramiz.
Sudyalar sonini koʻpaytirish, ularning ixtisoslashuvini yanada kengaytirish, jumladan, oilaviy, mehnat, intellektual mulk, voyaga yetmaganlar huquqlarini himoya qilishga oid nizolar boʻyicha ixtisoslashtirilgan sudyalar korpusini shakllantirish masalalari diqqat markazimizda boʻladi.
Qonun asosida yashash hayot tarzimizga aylanishi zarur. Buning uchun, eng avvalo, Konstitutsiya va qonunlarning ustunligini taʼminlashimiz shart.
Bu borada Konstitutsiyamizda ilgʻor huquqiy mexanizmlar koʻzda tutilgan boʻlib, biz davlat xizmatiga ishga kiradigan har bir xodimni Konstitutsiyani bilish boʻyicha sinovdan oʻtkazish lozim, deb hisoblaymiz.
Shu bilan birga, sud va huquqni muhofaza qiluvchi organdan “qochish” stereotipini tubdan oʻzgartirishimiz kerak.
Shunday madaniyat shakllantirishimiz kerakki, toki hech bir inson u yoki bu huquqbuzarlikning guvohi boʻlsa, uni koʻrmaganga olmasligi, balki huquqni muhofaza qiluvchi organga xabar qilish sharafli fuqarolik burchi ekanligini anglashi lozim.
Buning uchun huquqbuzarlikka guvoh boʻlgan odamni sud va tergov organlariga ovora qilib chaqiravermasdan, zamonaviy raqamli texnologiyalardan keng foydalanish va ularni ragʻbatlantirish kabi usullardan foydalanishni taklif etamiz.
Shu bilan birga, sud va huquqni muhofaza qiluvchi organlarning ish uslubini oʻzgartirish, xususan, ular faoliyatidagi hali-hanuz saqlanib qolayotgan ayrim eskicha yondashuvlarni bartaraf qilish, yanada aniq aytadigan boʻlsak, jazolash gʻoyasidan adolat, tenglik, erkinlik gʻoyalariga oʻtish zarur, deb hisoblaymiz.
Maʼlumki, inson huquqlarini taʼminlash va uni munosib himoya qilishda advokatura institutining oʻrni va roli beqiyosdir. Shu bois, odil sudlovni taʼminlashda advokatga berilgan huquqlarni qayta koʻrib chiqish, ularga kasbiy vazifalarini samarali bajarishi uchun qoʻshimcha vakolatlar berish zarur.
Advokatura institutini rivojlantirish tomon yana ildam qadamlar qoʻyish kerak, sudyaning sud protsessidagi rolini bosqichma-bosqich kamaytirib borib, asosan tomonlar oʻrtasidagi keltiriladigan dalillarni baholashga urgʻu berish kerak.
Biz advokatura faoliyatiga zamonaviy axborot-kommunikatsiya texnologiyalarini yanada kengroq joriy etish yoʻlidan boramiz. Ayniqsa, advokatura, sud va huquqni muhofaza qiluvchi organlar hamda boshqa davlat organlari oʻrtasida elektron maʼlumot almashinuvini yanada yaxshilash choralarini koʻramiz.
Biz korrupsiyadan xoli jamiyat yoʻlida xalqimiz bilan birgalikda kurashni davom ettirishimiz lozim. Maqsadimiz – davlat boshqaruvining barcha sohalarida, jumladan, sud tizimi va huquqni muhofaza qilish idoralari faoliyatida, taʼlim va sogʻliqni saqlash, qurilish va boshqa sohalarda korrupsiyani yoʻq qilishdir.
Aholi, xususan, yoshlar oʻrtasida korrupsiyaga qarshi murosasiz munosabatda boʻlish muhiti va madaniyatini shakllantirish, davlat organlari va mansabdor shaxslar faoliyatiga “Toza qoʻllar” siyosatini singdirish, qonun ustuvorligini taʼminlash choralarini koʻramiz.
Hukumat aʼzosi boʻlgan ijro etuvchi hokimiyat organi rahbari oʻzi rahbarlik qilayotgan sohaga ajratilgan mablagʻlarni samarali va maqsadli ishlatish boʻyicha birinchi navbatda oʻzi shaxsan javob beradigan tizim joriy qilinishini qoʻllab-quvvatlaymiz.
Korrupsiyaga qarshi kurashish nafaqat davlat organlari va huquqni muhofaza etish tuzilmalarining vazifasi, balki butun jamiyatning burchi ekanligini eʼtirof etib, jamiyatda korrupsiyaga nisbatan mutlaqo murosasizlik madaniyatini shakllantirishga qaratilgan tizimli chora-tadbirlarni ishlab chiqamiz va keng ommaga yetkazish borasida samarali targʻibot ishlarini tashkil qilamiz.
Asosiy shiorimiz – Adolatli kelajakni tanlaymiz!
Biz inson huquqlarini taʼminlash uchun yangi imkoniyatlarni yaratish tarafdorimiz.
Biz parlamentarizm va parlament demokratiyasini yanada rivojlantirish yoʻlida quyidagi chora-tadbirlarni amalga oshirishni muhim deb bilamiz:
- tadbirkorlik subyektlariga qoʻshimcha xarajatlar yuklaydigan barcha qoidalarni faqat qonunlar orqali qabul qilinishiga erishish;
- - qonunlarni toʻgʻridan-toʻgʻri ishlaydigan mexanizmlar bilan qabul qilish, qonunosti hujjatlarni kamaytirish va ularning qonunlarga mosligi boʻyicha parlament qoʻmitalari nazoratini kuchaytirish;
- parlament faoliyatida tadbirkorlik subyektlari ishiga aralashmaslik, ularga oid masalalarni ijro organlaridan talab qilish;
- deputatlarning ish vaqtining yarmini albatta oʻz saylovchilari yonida oʻtkazishini belgilovchi tartibni joriy etish kerak, ular aholi bilan birga ishlasin;
- qoʻmitalarning raisi va rais oʻrinbosari bitta partiyadan boʻlishini taqiqlash.
Mahalliy ijroiya hokimiyati organlari ustidan deputatlik nazoratini kuchaytirish orqali xalq deputatlari mahalliy Kengashlarining rolini oshirish mumkin.
Ushbu yoʻnalishda davlatda boshqaruv intizomini saqlab qolish maqsadida xalq deputatlari viloyat, tuman, shahar Kengashlari deputatlari hokimlarga nisbatan ishonchsizlik bildirish huquqiga ega boʻlishi kerak.
Biz mahalliy davlat hokimiyati organlari faoliyatini tartibga soluvchi qonunchilik hujjatlarini toʻliq xatlovdan oʻtkazilib, takomillashtirilishi tarafdorimiz.
Mahalliy byudjet mablagʻlaridan samarali va oqilona foydalanishni taʼminlash uchun ushbu mablagʻlar hisobidan moliyalashtirilayotgan shtatlar sonini maqbullashtirish boʻyicha tashabbuslarni ilgari suramiz.
Davlat boshqaruvi organlari yoki ular mansabdor shaxslarining qonunga xilof qarorlari, harakatlari yoki harakatsizligi tufayli yetkazilgan zararning oʻrni davlat tomonidan qoplanish tartib-taomillari oʻz aksini topgan “Davlat kompensatsiyasi toʻgʻrisida”gi qonun loyihasini ishlab chiqamiz.
Biz davlat boshqaruvida ochiqlik va shaffoflikni taʼminlash, unda fuqarolar ishtirokini kengaytirishning zamonaviy va samarador usullarini joriy qilish tarafdorimiz.
Bu borada adolatli jamiyat va huquqiy davlat qurishning barcha jabhalarida qonunchilik va insonparvarlik tamoyillariga amal qilish uchun jamoatchilik nazoratini kuchaytirish katta ahamiyat kasb etadi.
Biz yoʻl harakati qoidalarini muntazam buzganlik uchun jazolarni kuchaytirish, shu jumladan, umrbod haydovchilik huquqidan mahrum qilish zarur, deb hisoblaymiz.
Maʼlumki, davlat organlari tomonidan insonga nisbatan qoʻllaniladigan huquqiy taʼsir choralari mutanosiblik prinsipiga asoslanishi va qonunlarda nazarda tutilgan maqsadlarga erishish uchun yetarli boʻlishi lozimligi Konstitutsiyamizning 20-moddasida muhim qoida sifatida mustahkamlab qoʻyildi.
Biz u yoki bu huquqbuzarlik jarima yoki boshqa jazoning miqdorini oshirish bilan emas, balki jazodan koʻzlangan maqsadga erishilganligi va adolatli hal qilinganligi bilan oldi olinishi kerak, deb hisoblaymiz.
Shuningdek, jarimalar huquqbuzarlikning ijtimoiy xavfliligiga qarab belgilanishi zarur.
Konstitutsiyamizda hech kim sud qarorisiz 48 soatdan ortiq ushlab turilishi mumkin emasligi belgilandi va erkinlikni cheklashga faqat sud qarori asosida yoʻl qoʻyilishi haqidagi qoida mustahkamlandi.
Ayblanuvchiga oʻziga qarshi koʻrsatma bermaslik, yaʼni “sukut saqlash” huquqi birinchi marta alohida belgilab qoʻyildi. Advokatlar maqomi oshirilib, ularning tergovchi va prokuror bilan teng vakolatga ega ekanligi qayd etildi.
Biz Asosiy qonunimizga kiritilgan ushbu ilgʻor normalarni hayotimizga izchillik bilan tatbiq etamiz. Buning uchun sud-huquq idoralarining kadrlar salohiyatini yaxshilashga birlamchi eʼtibor qaratamiz.
Ushbu yoʻnalishda, eng avvalo, tergovchi, prokuror, sudya, advokatlarning bilim va malakasini yuksaltirishga, aholining huquqiy madaniyatini oshirishga harakat qilamiz.
IKKINCHI YOʻNALISHDA
IJTIMOIY ADOLATNI QAROR TOPTIRAMIZ
Barcha sohalarda ijtimoiy adolatni qaror toptirish biz uchun muhim.
Biz anʼanaviy sotsial-demokratiyaning ijtimoiy adolat tamoyili va keng koʻlamli dasturlarning amalga oshirilishini taʼminlaydigan kuchli ijtimoiy davlat siyosatini qoʻllab-quvvatlaymiz.
Mehnat qonunchiligi ustuvorligiga, xodimlar huquqlari toʻla taʼminlanishi tarafdorimiz. Aholi bandligini taʼminlash, yangi ish oʻrinlarini yaratish, aholining real daromadlarini oshirishga alohida eʼtibor qaratamiz.
Konstitutsiyamizga koʻra har bir inson uy-joyga ega boʻlishga haqli. Ushbu konstitutsiyaviy qoidani taʼminlash uchun biz oʻzining daromadi bilan uy-joyli boʻlish imkoniyatiga ega boʻlmagan fuqarolar uchun qoʻshimcha imkoniyatlarni izlaymiz.
Biz mamlakatimizda ishlayotgan yollanma va mavsumiy ishchilarga keng sharoitlar yaratib beramiz, ularning mehnati qadrlanishini va muhofaza qilinishini, mehnatiga yarasha haq olishini, mehnat stajiga qoʻshilishini va kelajakda munosib pensiya olishi boʻyicha choralar koʻramiz.
Konstitutsiyamizning 46-moddasida pensiyalar, nafaqalar va boshqa turdagi ijtimoiy yordamning miqdorlari rasman belgilangan eng kam isteʼmol xarajatlaridan kam boʻlishi mumkin emasligi alohida belgilab qoʻyildi. Biz ushbu insonparvar normani hayotga toʻliq joriy qilish uchun barcha zarur chora-tadbirlarni amalga oshiramiz.
Aholini toza ichimlik suvi bilan taʼminlash masalasi doimo diqqat-eʼtiborimiz markazida boʻladi. Biz bu borada sohaga jalb qilinayotgan investitsiyalar hajmini keskin koʻpaytirish choralarini koʻramiz.
Fuqarolarni ijtimoiy himoya qilish va bu yoʻnalishda tadbirkorlik subyektlarini qoʻllab-quvvatlash boʻyicha “Ijtimoiy davlat – 2030” dasturini ishlab chiqish lozim, deb hisoblaymiz.
UCHINCHI YOʻNALISHDA
MILLIY IQTISODIYOTIMIZNING BARQAROR OʻSISHINI TAʼMINLAYMIZ
Davlatning iqtisodiy faoliyati natijasida yuzaga kelgan yalpi ichki mahsulotni adolatli taqsimlashni taʼminlaydigan huquqiy mexanizmlarni ishlab chiqish birlamchi vazifamizdir.
Biz hududlar oʻrtasidagi iqtisodiy bir xil oʻsishni taʼminlash, tuman va shaharlarni bir maromda rivojlantirish tarafdorimiz.
Iqtisodiyotda davlat ishtirokini kamaytirish kerak, faqat soliq, ruxsat berish tartiblari, standartlar va boshqa aralashmaydigan uslublar orqali davlat boshqaruvi boʻlishi lozim, deb hisoblaymiz. Qancha koʻp byurokratiya va aralashuv boʻlsa, shuncha koʻp suiisteʼmolchilik boʻladi.
Koʻpchilik fuqarolarimizni tashvishga solayotgan subsidiya masalasi partiya nigohida boʻladi. Subsidiyalar berish tizimini takomillashtiramiz va maqsadli ishlatilishi ustidan jamoatchilik nazoratini kuchaytiramiz. Agar maqsadsiz ishlatilsa albatta subsidiya davlatga qaytarilishi shart.
Ijtimoiy obyektlar va eng muhim strategik obyektlarda davlat mulkini saqlab qolish tarafdorimiz, lekin bunda fuqarolarga tanlov imkoniyatini beradigan xususiy sektor ham rivojlantirilishi kerak. Shundagina ijtimoiy adolatni taʼminlagan boʻlamiz.
Konstitutsiyamizning 67-moddasida monopol faoliyat qonun bilan tartibga solinishi va cheklanishi alohida belgilab qoʻyilganligi bejiz emas, albatta. Zero, iqtisodiyot faqat erkin raqobat muhitidagina rivoj topadi.
Biz bojxona va soliq imtiyozlarini takomillashtirish hamda imtiyozlarni aniq sohalarga berish tarafdorimiz.
Buyurtmachi va yetkazib beruvchi oʻrtasida tuziladigan shartnomani chinakam huquqiy vositaga aylantiramiz va bu jarayonga hokimiyatning aralashuviga chek qoʻyamiz. Har qanday nizo sud qarori bilan yechim topishiga ustuvorlik beramiz.
Biz mahsulot sifatini qatʼiy davlat nazoratiga olamiz, aniq standartlar joriy etib, sifatsiz mahsulot ishlab chiqarish hamda narx-navolarni sunʼiy koʻtarishga qaratilgan xatti-harakatlar uchun kuchaytirilgan jazo choralarini qoʻllaymiz.
Intellektual mulk obyektlarini himoya qilish, mualliflik huquqlari buzilishi holatlariga nisbatan davlat va jamoatchilik nazoratini kuchaytirish, ixtirolarni qoʻllab-quvvatlash va ragʻbatlantirish ham iqtisodiyotni rivojlantirishga qaratilgan vazifalarimiz qatorida boʻladi.
Uy-joy kommunal xizmat koʻrsatish sohasidagi boshqaruv kompaniyalari faoliyatini takomillashtiramiz.
Qishloq xoʻjaligi ishlab chiqarishini ilmiy asosda tashkil etish, fan va amaliyotning oʻzaro uygʻunligini taʼminlash yaqin kelajakda Oʻzbekistonning agrar sohadagi ulkan imkoniyatlarini roʻyobga chiqarishda, qishloq iqtisodiyotini innovatsion rivojlantirishda, kambagʻallik muammolarini hal etishda ijobiy natijalar beradi, deb hisoblaymiz.
Bugungi kunda qishloq xoʻjaligi sohasida ob-havoning keskin oʻzgarishi, suv tanqisligi, yer shoʻrlanishi kabi xatarlar ortib bormoqda. Bu esa qishloq xoʻjaligida faoliyat olib borayotgan tadbirkorlar hamda jismoniy shaxslarning katta muammolaridan biriga aylanmoqda.
Shu bois, biz qishloq xoʻjaligida davlat tomonidan qoʻllab-quvvatlash koʻlamini kengaytirish va sugʻurtalashning yangi mexanizmlarini amalga oshirish tarafdorimiz. Bu borada qishloq xoʻjaligida sugʻurtalash tizimining huquqiy asoslarini takomillashtirish, jumladan “Qishloq xoʻjaligi tavakkalchiliklarini sugʻurtalash toʻgʻrisida”gi qonunni ishlab chiqish va qabul qilishni taklif qilamiz.
Tadbirkorlarni kreditlashda foiz stavkalari tijorat stavkasida, yaʼni imtiyozli boʻlmasa, ularni maqsadsiz ishlatilgan deb javobgarlikka tortish amaliyotiga barham berish choralarini koʻramiz.
Biz sanoatni rivojlantirish tarafdorimiz!
Sanoat elektr energiyasisiz boʻlmaydi. Buning uchun nafaqat atom energetikasi, balki muqobil elektr manbalaridan kengroq foydalanish choralarini koʻramiz.
Partiyamiz ancha yillardan buyon muqobil energiya manbalari va resurs tejamkor texnologiyalardan foydalanishni ilgari surib keladi. Bizningcha, bu jarayon ragʻbatlantirilishi, zarur hollarda muqobil energiya manbalari kam taʼminlangan aholi qatlamlariga davlat hisobidan imtiyozli berilishi zarur.
Biz sanoat ishlab chiqarishning va umuman, milliy iqtisodiyotning qon tomiri hisoblanmish yoʻl infratuzilmasini yaxshilashga, mavjud yoʻllarni taʼmirlashga birlamchi eʼtibor qaratamiz.
Yoʻlsozlik sohasida bajarilayotgan ishlarning sifati ustidan jamoatchilik nazoratini kuchaytiramiz. Bu sohada ilmiy tadqiqotlarimiz yutuqlaridan keng foydalanish, olimlarimizni ragʻbatlantirish zarur.
Biz iqtisodiyotni inson manfaatlarini hisobga olgan holda modernizatsiya qilish boʻyicha kompleks choralar koʻramiz. Jumladan, “Raqamli iqtisodiyotda aholi bandligini taʼminlash konsepsiyasi – 2030” dasturini ishlab chiqishni taklif qilamiz.
Mamlakatning sanoat salohiyatini oshirish va hududlarni izchil rivojlantirishda kichik sanoat zonalari, iqtisodiy va sanoat klasterlarining muhimligini inobatga olib, biz ushbu sohaning tashkiliy-huquqiy asoslarini yanada mustahkamlashga harakat qilamiz. Bu borada, ayniqsa, “Kichik sanoat zonalari toʻgʻrisida” qonun qabul qilish muhim ahamiyat kasb etadi.
Biz adolatli va samarali soliq hamda byudjet siyosatini amalga oshirish tarafdorimiz.
Shuningdek, ijtimoiy tenglik oʻrnatish maqsadida jismoniy shaxslar daromadlariga progressiv soliqlarni joriy etish tarafdorimiz.
Biz davlat byudjeti daromadlari va xarajatlarining shaffofligini taʼminlash, bunda barcha jarayonlarni raqamlashtirish boʻyicha zarur chora-tadbirlarni amalga oshiramiz.
TOʻRTINCHI YOʻNALISH
ILM-FAN, INNOVATSIYALAR VA TAʼLIM SOHASINING
BARQAROR RIVOJI – TARAQQIYOTIMIZ KAFOLATI
Biz ilm-fan va innovatsiyalarni rivojlantirish orqali
fan – taʼlim – ishlab chiqarish tizimlarining uzviy aloqadorligini taʼminlaymiz.
Adolatli jamiyat va huquqiy davlat barpo etishda taʼlim, ilm-fan va innovatsiyaning ahamiyatini oshirish choralarini koʻramiz.
Biz nafaqat olimlarni, balki ixtiro va ixtirochilarni ham qoʻllab-quvvatlaymiz, ragʻbatlantiramiz va ularga zarur shart-sharoitlar yaratamiz. Shuningdek, iqtisodiyotning haqiqiy lokomotivi boʻlgan injener, texnolog, agronom-mexanizator kabi mutaxassislarning sonini koʻpaytirish va malakasini oshirish hamda qayta tayyorlash choralarini koʻramiz.
Mamlakatimizda ilmiy tadqiqotlardan olingan ijobiy natijalarni tibbiyot va sogʻliqni saqlash, qishloq xoʻjaligi, oziq-ovqat xavfsizligi va suv muammolari, energetika, muqobil energiya manbalari, ekologiya va atrof-muhit muhofazasi kabi sohalarga joriy qilish ishlarini izchillik bilan olib borish orqali davlatning iqtisodiy qudratini yanada mustahkamlaymiz.
Afsuski, iqtisodiyotning real sektorida ilmiy va innovatsion ishlanmalarni tijoratlashtirish darajasi, ilm-fan, taʼlim va sanoat oʻrtasidagi hamkorlik aloqalari nisbatan past boʻlib qolmoqda.
Shu bois, biz mamlakatimizda innovatsion rivojlanishni jadallashtirish, iqtisodiyotning barcha tarmoqlarida innovatsiyalar va texnologiyalarni keng tatbiq qilish, inson kapitalini, ilm-fan va innovatsiya sohalarini rivojlantirish yoʻlidan boramiz.
Sifatli taʼlim – bu baxtli va farovon kelajak kafolatidir!
Hozirgi kunda rivojlangan davlat maqomiga yetishish uchun aholining bilim saviyasini oshirish va dunyoqarashini talab darajasida shakllantirish muhim ahamiyat kasb etadi.
Shu bois, taʼlimga investitsiya kiritish – xalq farovonligi, davlatning raqobatdoshligini taʼminlashning muhim omili demakdir.
Bolalarni maktabgacha taʼlim tashkilotlariga qamrovini kengaytirish orqali ushbu tashkilotlardagi mavjud navbatlarni kamaytirish choralarini koʻrish lozim, deb hisoblaymiz.
Bogʻchalarda jamoatchilik nazoratini kuchaytirishimiz zarur. Ayniqsa, maktabgacha va maktab taʼlimi mamlakat kelajagi uchun hal qiluvchi ahamiyatga egaligidan kelib chiqib, barcha bogʻcha va maktablarga xodimlarni ishga olishni ochiq, shaffof va tanlov asosida tashkil qilishni yoʻlga qoʻyamiz.
Yangi tahrirdagi Konstitutsiyamizning 52-moddasida davlat oʻqituvchining shaʼni va qadr-qimmatini himoya qilish, ularning ijtimoiy va moddiy jihatdan farovonligi, kasbiy jihatdan oʻsishi toʻgʻrisida gʻamxoʻrlik qilishi haqidagi norma oʻz aksini topdi.
Biz uchun oʻqituvchining obroʻ-eʼtibori – bu avvalo millatning, butun xalqning obroʻ-eʼtiboridir. Shu bois, biz pedagog xodimlarning obroʻ-eʼtiborini oshirish hamda yuksak maqomini belgilash orqali ularning jamiyat hayotidagi rolini oshirishga qaratilgan tashkiliy choralarni koʻramiz.
Bu maqsadda oʻqituvchining maqomiga oid qonunning tezroq qabul qilinishini ustuvor masala sifatida koʻramiz.
Taʼlim sohasida ilgʻor davlatlar tajribasi va milliy qadriyatlarimizga tayangan holda maktablarda taʼlim berish standartlarini takomillashtiramiz.
Biz maktab taʼlimini xalqaro taʼlim dasturlari asosida izchil isloh qilish tarafdorimiz.
Jamiyatdagi ijtimoiy mavqeyidan qatʼiy nazar, har bir insonga oliy maʼlumot olish imkoniyatini kengaytirish choralarini koʻramiz. Markazdan uzoq qishloqlarda yashab, aʼlo baholar bilan oʻqigan, ota-ona qaramogʻisiz qolgan, kam taʼminlangan iqtidorli yoshlarning davlat hisobidan oliy taʼlim olishini kafolatlaymiz.
Shuningdek, 2025-yildan boshlab bakalavriatga kirish uchun ingliz tilini bilish boʻyicha milliy yoki xalqaro sertifikatga ega boʻlish tartibini joriy etish choralarini koʻramiz.
Bu orqali talabalarda jahon taʼlimi va ilm faniga toʻsiqlarsiz qoʻshilish imkoniyati yaratiladi.
BESHINCHI YOʻNALISH
AHOLI SALOMATLIGI ULKAN BOYLIK, JAMIYAT BARQAROR RIVOJLANISHI GAROVIDIR
Biz aholiga kafolatli tibbiy xizmat koʻrsatish, zamonaviy texnologiya va davolash usullarini keng joriy qilishni davom ettirish tarafdorimiz.
Dunyoning eng ilgʻor sogʻliqni saqlash tizimlari (Tayvan, Janubiy Koreya, Yaponiya, Fransiya, Daniya, Isroil, Germaniya, Hindiston va boshqalar) tajribasidan kelib chiqib, tibbiyot sohasini yanada isloh qilamiz.
Jumladan, “aqlli tibbiyot” tizimini shakllantirishning huquqiy asoslarini ishlab chiqib, tibbiyot sohasiga zamonaviy axborot kommunikatsiya texnologiyalarini keng joriy etishni kengaytirish tarafdorimiz.
Shu bilan birga, sogʻliqni saqlash tizimini ijtimoiy davlat tamoyiliga muvofiqlashtirgan holda “Oʻzbekiston Respublikasining Sogʻliqni saqlash kodeksi” loyihasini yanada takomillashtirish, unda sogʻliqni saqlash sohasida inson huquqlariga rioya qilish, aholining barcha qatlamlari tibbiy yordamdan bahramand boʻlishini taʼminlash masalalariga alohida eʼtibor qaratish lozim, deb hisoblaymiz.
Ayniqsa, nodavlat tibbiyot tashkilotlarini tijorat tashkilotidan notijorat tashkilotiga oʻtkazish boʻyicha amaliy choralarni koʻramiz. Tibbiyot daromad olish manbaiga aylanmasligi tarafdorimiz.
Biz tibbiyot xodimlarining maqomini qonun bilan belgilaymiz, ularning ijtimoiy himoyasini kuchaytirish va ularga nisbatan turli tazyiqlarning oldini olish maqsadida qonunchiligimizni yanada takomillashtiramiz.
Tibbiyot sohasida malaka oshirishning markazlashgan tizimini qayta koʻrib chiqishni, malaka oshirishni ixtisoslashgan markazlarda va viloyatlarda tashkil etishni taklif etamiz.
Shuningdek, reproduktiv salomatlik masalasi, onkologiya, sil, qand kasalliklarining oldini olish va davlat hisobidan davolash alohida diqqat-eʼtiborimizda boʻladi.
Biz onalik va bolalikni muhofaza qilishga alohida eʼtibor qaratamiz. Onalar va bolalar oʻlimini, bolalarning nuqsonli tugʻilishini oldini olish borasidagi ishlarni takomillashtiramiz.
Biz, aholi, ayniqsa yoshlar oʻrtasida sogʻlom turmush tarzini yanada ommalashtirish, jismoniy-tarbiya va sportni rivojlantirishga birlamchi vazifa sifatida eʼtibor qaratamiz.
Bunda har bir fuqarolar yigʻini hududida sport bilan shugʻullanish uchun zarur shart-sharoitlar yaratish muhim ahamiyat kasb etadi.
Davlat hisobidan koʻrsatiladigan tibbiy xizmatlar va dori vositalari roʻyxatini takomillashtirish, ijtimoiy dorixonalarni rivojlantirish, ogʻir kasalliklarni davlat tomonidan davolashni kengaytirishni qoʻllab-quvvatlaymiz.
Farmatsevtika va tibbiyot xodimlari orasidagi yashirin kelishuvlar ortidan bemorlarga haddan ziyod dorilar sotib olishga undash avjiga chiqib ketganligi barchamizni tashvishga solmoqda.
Afsuski, Oʻzbekiston antibiotiklar isteʼmoli boʻyicha jahonda yetakchi oʻrinlarga chiqib ketdi. Tibbiyot muassasalaridagi koʻplab faoliyat ochiqchasiga farmatsevtika tashkilotlari tomonidan homiylik qilinadi. Bunga chek qoʻyish vaqti keldi. Millat sogʻligi va genofondi ham shu masalalarga bogʻliq.
Tibbiyot sohasidagi bunday munosabatlar toʻgʻridan-toʻgʻri korrupsiya sifatida baholanishi lozim. Tibbiyotchilar va farmatsevtlar orasida noqonuniy muloqot toʻliq taqiqlanishi kerak, bunday muloqotlar va sovgʻalar uchun jazo muqarrar boʻlishi, yangi dorilar va davolanish uslublari faqat vazirlik tomonidan tushuntirilishi lozim. Umuman, tibbiyot sohasidagi davlat xaridlari boʻyicha alohida tartib belgilash joiz.
Shunday qilsak, dorilarning yagona elektron bazasi tizimini yanada takomillashtirish orqali dori-darmonlarning noqonuniy aylanmasiga, farmatsevtika va tibbiyot xodimlari orasidagi yashirin kelishuvlarga hamda dorilar narxining asossiz oshirilishini oldini olsa boʻladi,
deb hisoblaymiz.
Bizning sogʻliqni saqlash sohasidagi ustuvor maqsadlarimizdan yana biri qishloqda va taʼlim tizimida tibbiy xizmatni sifat jihatidan yangi bosqichga koʻtarishdir.
OLTINCHI YOʻNALISH
FUQAROLIK JAMIYATI – DEMOKRATIK TARAQQIYOT ASOSI
Oʻzbekistonda ijtimoiy barqarorlikni taʼminlash vazifasi davlat, hokimiyat, biznes va fuqarolik jamiyati institutlari – jamoat birlashmalari, siyosiy partiyalar, OAV, fuqarolarning oʻzini oʻzi boshqarish organlari saʼy-harakatlarini muvofiqlashtirishni talab etadi.
Biz ijtimoiy taraqqiyot dasturlarini keng jamoatchilik ishtirokida ekspertizadan oʻtkazish, birinchi navbatda tuman va shaharlar miqyosida jamoatchilik nazoratini kuchaytirish yuzasidan chora-tadbirlarni amalga oshirish tarafdorimiz.
Shu bilan birga, biz ijtimoiy ahamiyatga molik fuqarolik tashabbuslarini qoʻllab-quvvatlaymiz, nodavlat notijorat tashkilotlari faoliyati uchun yanada qulay sharoitlar yaratish hamda homiylik faoliyatini kuchaytirish tarafdorimiz.
Nodavlat-notijorat tashkilotlarining sogʻliqni saqlash, taʼlim, atrof-muhitni muhofaza qilish sohalarida muammolarni hal qilishdagi faol ishtiroki bizning doimiy diqqat-eʼtiborimiz markazida boʻladi.
Fuqarolik jamiyatini rivojlantirish, aholining maʼnaviy yuksalishi va moddiy farovonligi ortishi uchun biz oʻzini oʻzi boshqarish organlari tizimining, jumladan mahallalarning taraqqiy etishi tarafdorimiz.
Biz davlat hokimiyatining qator vakolatlarini mahallaga oʻtkazish tarafdorimiz. Bu borada mahalla tizimining huquqiy asoslarini yanada takomillashtiramiz.
OAV mustaqilligi va erkinligi, jurnalistning erkin faoliyat yuritishi uchun zarur shart-sharoitlarni yanada kengaytirish muhim vazifalarimizdan biridir.
Olib borilayotgan ijtimoiy-siyosiy, iqtisodiy islohotlarning ochiq va oshkoraligini taʼminlashda OAVning faolligini oshirish, davlat hokimiyati va boshqaruvi organlari faoliyati ustidan jamoatchilik va parlament nazoratini, hokimiyat va jamoatchilikning izchil aloqasini taʼminlashda uning rolini kuchaytirish, moddiy-texnik bazasini yangilash, uni texnologik modernizatsiya qilish, jurnalist kasbi nufuzini oshirish, soha xodimlarining mehnatini moddiy va maʼnaviy ragʻbatlantirish masalalari doimiy eʼtiborimizda boʻladi.
Maʼlumki, Konstitutsiyada Oʻzbekiston dunyoviy davlat deb eʼlon qilindi. Biz ushbu konstitutsiyaviy tamoyilni amalda toʻliq roʻyobga chiqarish yoʻlidan boramiz.
Taʼkidlash joizki, qadimiy va saxovatli zaminimizda koʻp asrlar davomida turli millat va elat, madaniyat va din vakillari tinch-totuv yashab kelmoqda. Mustaqillik yillarida mamlakatimizda barcha fuqarolarning madaniy va diniy oʻziga xosligini taʼminlashga, turli-tuman madaniyatlar hamda tillarni saqlash va rivojlantirishga qaratilgan muhim qonun hujjatlari qabul qilindi. Millatlararo totuvlik va diniy bagʻrikenglik munosabatlarini saqlashga imkon beradigan oʻziga xos model yaratildi.
Biz bundan buyon ham millatlararo totuvlik va diniy bagʻrikenglikni mustahkamlash masalalariga katta eʼtibor qaratamiz. Maqsadimiz – mamlakatimizda asrlardan buyon yonma-yon, bir yoqadan bosh chiqarib yashab kelgan turli millat va elatlarning xilma-xilligini mushtarak holda saqlash va rivojlantirishdan iborat.
Zero, tinchlik va barqarorlikni mustahkamlash, siyosiy, ijtimoiy-iqtisodiy va gumanitar sohalardagi oʻzgarishlarning barqaror rivojlanishi va muvaffaqiyatli amalga oshirilishi xalqaro maydonda mamlakatimiz nufuzi yuksalishining muhim omilidir.
Oʻzbekiston Respublikasi Konstitutsiyasida fuqarolik jamiyati institutlariga bagʻishlab alohida bob kiritilganligi ayni muddaodir. Shu bilan birga, amaldagi qonunchiligimizda fuqarolik jamiyati institutlari faoliyatini tartibga soluvchi qonun hujjatlari alohida va tarqoq holda boʻlib, amaldagi normalarni yangi konstitutsiyaviy qoidalar asosida takomillashtirish hamda fuqarolik jamiyati institutlari faoliyatining kafolatlarini yanada kuchaytirish muhim vazifalardan biridir.
Shu nuqtayi nazardan, fuqarolik jamiyati institutlari sohasidagi munosabatlarni tartibga soluvchi qonun hujjatlarini takomillashtirish, fuqarolik jamiyati institutlari faoliyati kafolatlarini yanada mustahkamlash, ularni davlat tomonidan qoʻllab-quvvatlash hamda davlat va fuqarolik jamiyati institutlari oʻrtasida oʻzaro manfaatli hamkorlikni rivojlantirishning huquqiy mexanizmlarini takomillashtirish masalalariga alohida eʼtibor qaratamiz.
YETTINCHI YOʻNALISHDA
EKOLOGIYA: ATROFIMIZDAGI OLAMNI HIMOYA QILAMIZ!
Ekologik muammolarni hal etishda biz oʻz saʼy-harakatlarimizni, birinchi navbatda, ushbu muammolarning iqtisodiy jihatlariga qaratamiz. Barcha ekologik muammolarni va u bilan bogʻliq fuqarolar salomatligini himoya qilish masalalarini faqat davlat byudjetiga yuklash toʻgʻri boʻlmaydi. Biz “Ekologiyani ifloslantiruvchi – kompensatsiya toʻlashi lozim” degan prinsip tarafdorimiz.
Biz bu kabi tadbirlarni amalga oshirishda fuqarolik jamiyati institutlari, xususan, ekologik jamoat birlashmalari bilan nafaqat umummilliy miqyosda, balki muayyan hudud sharoitlarida atrof-muhit ifloslanishi, aholi salomatligini himoya qilish bilan bogʻliq qonunchilikdagi kamchiliklarni aniqlash va ularni bartaraf etish boʻyicha yaqindan hamkorlikni yoʻlga qoʻyamiz.
Biz daraxtlarning noqonuniy kesilishiga qarshi ayovsiz kurash olib boramiz. Shaharlarimizdagi barcha qurilishlar amaldagi qonunchilikka muvofiq holda olib borilishi boʻyicha qoʻshimcha choralar koʻrish zarur.
Bunda Konstitutsiyamizning 49-moddasiga kiritilgan shaharsozlik hujjatlarining loyihalari qonunda belgilangan tartibda jamoatchilik muhokamasidan oʻtkazilishi lozimligi haqidagi normani hayotimizga toʻliq tatbiq etamiz.
Mamlakatimizdagi 21 million gektardan ziyod yaylov yerlari mavjud boʻlib, ular chorvachilik, ipakchilik, asalarichilik kabi koʻplab tarmoqlar uchun muhim manba hisoblanadi.
Shu bois, biz yaylov yerlaridan unumli foydalanish choralarini koʻramiz. Buning uchun, birinchi navbatda, yangi tahrirdagi “Yaylovlar toʻgʻrisida”gi qonun loyihasini ishlab chiqishni taklif qilamiz. Bizningcha, shu yoʻl orqali koʻplab iqtisodiy loyihalarga keng yoʻl ochiladi.
Oʻzbekistonda “Qizil kitob”ga kiritilgan hayvonlarni asrash kelgusida birlamchi vazifamiz boʻlib qoladi. Oʻzbekiston flora va fauna dunyosiga juda boy davlat, oʻsimlik va jonivorlarning qator turlari asta-sekin yoʻqolib bormoqda. Shu bois, biz tabiatni muhofaza qilish sohasida amalga oshirilayotgan ishlarga alohida eʼtibor qaratamiz.
Bu borada, ayniqsa, muhofaza etiladigan tabiiy hududlar sohasida davlat boshqaruvi tizimini takomillashtirishni dolzarb vazifa, deb bilamiz. Chotqol biosfera, Zomin, Surxon, Nurota va Qizilqum davlat qoʻriqxonalari, shuningdek, Quyi Amudaryo davlat biosfera rezervatining moddiy-texnik bazasini yanada yaxshilaymiz.
Shu bois, biz ushbu sohadagi davlat siyosatining asosiy yoʻnalishlarini belgilab beruvchi, yovvoyi hayvonlar holatini samarali monitoring qilish imkonini beruvchi, ovchilar va ovchilik xoʻjaliklarining huquq va majburiyatlarini toʻliq aks ettiruvchi qonun hujjatlari qabul qilinishini muhim vazifa, deb bilamiz.
SAKKIZINCHI YOʻNALISH
AYOL – MUQADDAS, OILA – JAMIYAT ASOSI
Ayollarimizning oilada tutgan oʻrni beqiyosdir. Zero, oqila ayollar oʻz mehri bilan oiladagi ijobiy muhitni, qolaversa butun jamiyatdagi muvozanatni saqlab turadilar.
Adolatli jamiyat va huquqiy davlat qurish jarayonida ayollar va erkaklarning teng huquqliligini taʼminlash, xotin-qizlarning ijtimoiy-siyosiy faolligini oshirish, ularning turli soha va tarmoqlarda oʻz qobiliyat va imkoniyatlarini roʻyobga chiqarishi uchun shart-sharoitlar yaratish, ularning huquq va qonuniy manfaatlarini soʻzsiz taʼminlash, onalik va bolalikni har tomonlama qoʻllab-quvvatlashga oid qonun hujjatlarini ishlab chiqish va takomillashtirish faoliyatimizning ustuvor yoʻnalishidir.
Xotin-qizlarning bandligini taʼminlash, mehnat sharoitlarini yaxshilash, ayniqsa, qishloq joylaridagi xotin-qizlarni oilaviy va xususiy tadbirkorlikka, hunarmandchilikka keng jalb etishga alohida eʼtibor qaratamiz.
Biz xotin-qizlar faolligi va rolini oshirishda bardavom boʻlib, barcha boʻgʻindagi davlat hokimiyati va boshqaruvi organlarida xotin-qizlar vakillarini koʻpaytiramiz.
Ayollarga nisbatan oilaviy zoʻravonlikka qarshi qabul qilingan qonunlarning soʻzsiz ijrosini taʼminlaymiz. Bu borada alohida dasturlar ishlab chiqamiz va amalga oshiramiz.
Konstitutsiyamizda oila institutiga alohida eʼtibor qaratilgan. Jumladan, oila jamiyatning asosiy boʻgʻini hamda jamiyat va davlat muhofazasida ekanligi, davlat oilaning toʻlaqonli rivojlanishi uchun ijtimoiy, iqtisodiy, huquqiy va boshqa shart-sharoitlar yaratishi, onalik, otalik va bolalik davlat tomonidan muhofaza qilinishi, Oʻzbekiston Respublikasi Vazirlar Mahkamasi oilani qoʻllab-quvvatlash, mustahkamlash va himoya qilish, anʼanaviy oilaviy qadriyatlarni saqlash boʻyicha choralar koʻrishi alohida belgilandi.
Bu esa, oʻz navbatida, oila institutini mustahkamlash konsepsiyasini yangi konstitutsiyaviy normalar va yangi qabul qilingan qonun hujjatlari asosida qayta koʻrib chiqishni hamda takomillashtirishni taqozo etmoqda.
Biz oilalarda teng huquqli va adolatli munosabatni, maʼnaviy-axloqiy muhitni mustahkamlash va sogʻlomlashtirishning samarali mexanizmlarini yaratishga asosiy eʼtiborimizni qaratamiz.
Eng avvalo, oilalar ajralishining oldini olish choralarini koʻramiz. Oila institutini mustahkamlash boʻyicha milliy indekslarni, shuningdek, tegishli xalqaro reytinglarda Oʻzbekiston koʻrsatkichlarini yaxshilash boʻyicha chora-tadbirlar majmuini ishlab chiqamiz.
Reproduktiv salomatlik va demografik rivojlanishni barqaror taʼminlash maqsadida, “Sogʻlom oila – sogʻlom jamiyat 2030” dasturini ishlab chiqamiz va amalga oshiramiz.
TOʻQQIZINCHI YOʻNALISHDA
YUKSAK MAʼNAVIYATLI JAMIYAT BARPO ETAMIZ
Har qanday jamiyat mustahkam maʼnaviy poydevorga ega boʻlgandagina taraqqiyotga erisha oladi.
Adolat va maʼnaviyat oʻzaro bogʻliq, egiz tushunchalardir. Maʼnaviyat boʻlmagan joyda adolat ham boʻlmaydi.
Huquqiy madaniyatni maʼnaviyatning asosi deb bilamiz, shu bois, jamiyatda huquqiy ong va huquqiy madaniyatni yuksaltirish maqsadida Konstitutsiyani bogʻchadan yoshlar ongiga singdirish tizimini joriy qilamiz.
Maʼnaviy tarbiyaning ustuvorligini taʼminlash uchun davlat barcha madaniy, tarixiy yodgorliklarni va tabiat yodgorliklarini roʻyxatdan oʻtkazishi va saqlashi, ularga mablagʻ ajratishi shart, deb hisoblaymiz.
Biz Oʻzbekistonda adolatli jamiyat va adolatparvar davlat barpo etish jarayonlari, bunyodkor xalqimiz hamjihatligini mustahkamlash, yoshlarni ona yurtga sadoqat ruhida tarbiyalash, ularda tashabbuskorlik, fidoyilik, axloqiy fazilatlarni shakllantirish, xalqimiz, yoshlarimizning ruhiy dunyosini izdan chiqarishga qaratilgan turli buzgʻunchi kuchlar, maʼnaviy tahdidlar, axborot xurujlarining oldini olishning qonuniy asoslarini yaratishni oʻzimizning bosh maqsadimiz, deb bilamiz.
OʻNINCHI YOʻNALISHDA
TINCHLIKSEVAR, ADOLATLI VA PROGRESSIV TASHQI SIYOSAT TARAFDORIMIZ
Konstitutsiyamizning 18-moddasida Oʻzbekiston Respublikasi xorijiy davlatlar va xalqaro tashkilotlar bilan ikki va koʻp tomonlama munosabatlarni har taraflama rivojlantirishga qaratilgan tashqi siyosatni amalga oshirishi belgilandi.
Biz ushbu progressiv normadan kelib chiqqan holda Oʻzbekistonning dunyo hamjamiyatiga integratsiyasini yanada chuqurlashtirish, uzoq va yaqin xorijiy mamlakatlar bilan ikki tomonlama manfaatli aloqalarni mustahkamlash, xalqaro tashkilotlar faoliyatida ishtirokini yanada kengaytirishni dolzarb vazifa, deb bilamiz.
Ayniqsa, Markaziy Osiyoni amalda barqaror, har tomonlama rivojlangan va yaxshi qoʻshnichilik aloqalari yoʻlga qoʻyilgan dinamik – mintaqaga aylantirish, qoʻshni mamlakatlar bilan savdo iqtisodiy, transport-kommunikatsiyaviy, madaniy-gumanitar, ilmiy-texnikaviy sohalarda aloqalarni yanada chuqurlashtirish boʻyicha ishlarni davom ettiramiz.
Muxtasar aytganda, Markaziy Osiyo mintaqasi keyingi yillarda ham Oʻzbekiston tashqi siyosiy faoliyatining asosiy ustuvor yoʻnalishi boʻlib qoladi. Zero, mamlakatimizning taqdiri mintaqadagi qoʻshni mamlakatlar taqdiri bilan chambarchas bogʻliqdir.
Biz mamlakatimizning tub milliy manfaatlaridan kelib chiqqan holda yaqin va uzoq xorij davlatlari bilan oʻzaro manfaatli aloqalarini yanada mustahkamlashni oʻz oldimizga maqsad qilib olganmiz.
Ayniqsa, ilgʻor taraqqiy etgan mamlakatlar bilan yuqori texnologiyalar, zamonaviy innovatsiyalar, investitsiyalar sohasida hamkorlik qilish muhim ahamiyatga ega, deb hisoblaymiz.
Shuningdek, BMTning Barqaror rivojlanish dasturi doirasidagi ijtimoiy va gumanitar loyihalarni amalga oshirishda oʻzaro manfaatli xalqaro hamkorlikni rivojlantirishni ustuvor vazifalarimizdan biri, deb hisoblaymiz. BMT va uning ixtisoslashgan institutlari bilan hamkorlikni kengaytirish va ijtimoiy sohaga doir dasturlarni hamkorlikda amalga oshirishda faol ishtirok etishni qoʻllab-quvvatlaymiz.
Biz mamlakatimizning Jahon savdo tashkilotiga aʼzoligini jadallashtirish yoʻlidan boramiz. Nega deganda, aynan JSTga aʼzolik milliy iqtisodiyotimizda tarkibiy oʻzgarishlarni tezlashtirish, uning raqobatbardoshligini oshirish, Tashkilotga aʼzo mamlakatlar bilan barqaror savdo munosabatlarni oʻrnatish imkonini beradi.
Bir soʻz bilan aytganda, dunyoda kechayotgan murakkab jarayonlar, yaqin-uzoq mintaqalarda kuzatilayotgan ziddiyat va toʻqnashuvlarni teran anglagan holda yurtimizda tinchlik va xavfsizlikni taʼminlash borasidagi ishlarni yanada jadallashtirish tarafdorimiz.
Hurmatli qurultoy ishtirokchilari!
Hozir Sizlarga taqdim etilgan Dasturda 10 dan ortiq aniq qonunlar qabul qilish koʻzda tutilmoqda, shuningdek 150 ga yaqin takliflar oʻrin olgan.
Saylovoldi dasturimiz aholining barcha qatlamlari manfaatlarini qamrab oladi.
Bugun Sizlar bilan uchrashib turishdan maqsad faqatgina Saylovoldi dasturimiz bilan tanishtirish emas, balki Sizlarning fikrlaringiz bilan ham oʻrtoqlashish, hamfikr boʻlishdan iborat. Siz tomoningizdan bildiriladigan har qanday fikr, taklifni oldimizga qoʻygan maqsadlarni amalga oshirishda oʻzimiz uchun muhim vazifa, deb bilamiz.
Soʻzimning soʻnggida shuni alohida taʼkidlab oʻtmoqchimanki, bizning Saylovoldi dasturimizdagi gʻoyalar va ularning amalga oshirilishi:
Kuchli va adolatli jamiyatga ijtimoiy birdamlik orqali erishishga,
Huquqiy davlatni birgalikda qurishga,
Barchaga teng imkoniyatlarni taʼminlashga,
Adolatli ish haqqi, munosib hayotga erishishga,
Barchani munosib ish joyi bilan taʼminlashga,
Baxtli va farovon kelajagimiz kafolati boʻlmish taʼlim sifatini oshishiga,
Sogʻlom millatni asosi boʻlgan sogʻlom turmush tarziga oʻtishga
Va eng asosiysi Adolatli kelajakni barpo etishga olib keladi!
Eʼtiboringiz uchun rahmat!