9-may “Xotira va qadrlash kuni”

Oʻzbek xalqi azal-azaldan yoshi ulugʻlarni eʼzozlab, ularga munosib hurmat va ehtirom koʻrsatishga alohida eʼtibor qaratgan. Yurtimizda nishonlanadigan har bir bayramlar qatori 9-may —“Xotira va qadrlash kuni” munosabati bilan ham bu anʼana davom ettiriladi. Zero, inson xotira bilan tirik, qadr bilan barhayot. Ikkinchi jahon urushida halok boʻlgan yurtdoshlarimiz xotirasini yod etish, olovli janggohlardan omon qaytgan, ogʻir kunlarni sabr-bardosh bilan yenggan faxriylarimizga yuksak ehtirom, mehr-oqibat koʻrsatish davlatimizning hamisha eʼtibor markazida boʻlib kelmoqda. Bayram arafasida Oʻzbekiston “Adolat” SDP Yuqori Chirchiq tuman Kengashi raisi Iskandar Alashbayev, partiya aʼzosi Damir Qoldiboyevlar tumanning “Tanta Qangli” qishlogʻida istiqomat qilayotgan bugungi tinch va nurafshon kunlarimizning sababchilaridan boʻlgan Ikkinchi jahon urishining faxriylari 98 yoshli Andaqul ota Xudoybergenov hamda, 99 yoshli Bekseiit ota Boymurzayev xonadonlariga tashrif buyurib, ular holidan xabar olishdi, dildan suhbat qurishdi.

Yuzma-yuz suhbatlar chogʻida faxriylar dunyo xalqlari boshiga musibat solgan mashʼum urush, oʻsha ogʻir kunlarni matonat bilan yengib oʻtgan ota-bobolarimizning yengilmas irodasi, cheksiz matonati haqida soʻzlab berishdi.

“Tanta Qangli” qishlogʻida istiqomat qilayotgan Ikkinchi jahon urishi faxriylari farzandlari, nevara va chevaralari ardogʻida keksalik gashtini surmoqdalar. Otaxonlar qoʻllari duoda bugungi dorulomon kunlarga shukronalik keltirib, davlatimiz tomonidan yoshi ulugʻ insonlarga koʻrsatilayotgan eʼtibordan mamnunliklarini izhor etdilar.

 “Adolat” SDP Toshkent viloyati Kengashi

Matbuot xizmati.