Adolat har bir inson uchun!

Xabaringiz bor, Oʻzbekiston Respublikasi Prezidentining 2023-yil 31-maydagi Ekologiya, atrof-muhitni muhofaza qilish va iqlim oʻzgarishi vazirligi faoliyatiga oid PF-81-son Farmoni eʼlon qilingan edi. Mazkur farmonga koʻra, Prezidentimiz Shavkat Mirziyoyev rahnamoligida mamlakatimizda ekologik xavfsizlikni taʼminlash, bu boradagi vaziyatni yaxshilash, atmosferaga chiqayotgan zararli chiqindilarning inson salomatligiga taʼsirining oldini olish, tabiiy resurslardan oqilona foydalanish, sanitariya-ekologik vaziyat sifatini yaxshilash uchun qulay sharoitlar yaratish, atrof-muhit va aholi salomatligini muhofaza qilish borasida keng qamrovli chora-tadbirlar amalga oshirilmoqda.

Biroq, shaxsiy manfaati yoʻlida chiqindilarni duch kelgan joyga tashlab, tabiatga ziyon etkazayotganlar, hatto, noqonuniy chiqindixona tashkil qilishga urinish holatlari ham uchrab turibdi.

Bu borada Xalq deputatlari Quvasoy shahar Kengashi deputati Asilbek Nazirovga fuqarolar tomonidan qilingan murojaat Quvasoy shahar hokimi oʻrinbosari, ekologiya boʻlimi boshligʻi, faollar va mahalla raisi ishtirokida tezkor oʻrganib chiqildi. Murojaatda koʻrsatilishicha, T.I.ismli tadbirkor oʻzboshimchalik bilan Quvasoy shahri bilan tutash Fargʻona tumanidagi adirliklarda oʻzboshimchalik bilan noqonuniy chiqindixona tashkil etgan.

Tezkorlik bilan olib borilgan ishlar natijasida mazkur chiqindixonani tashkil etgan mutasaddilarga qonuniy jazo choralari qoʻllanilib, chiqindixona faoliyatiga barham berildi.

Dunyo miqyosida iqlim oʻzgarishlari tufayli tabiat injiqliklari-yu, insoniyat hayotida roʻy berayotgan murakkab sinovlarga shohidmiz, -deydi Xalq deputatlari Quvasoy shahar Kengashi “Adolat” SDP deputatlik guruhi aʼzosi Asilbek Nazirov, — Bugun har birimiz qoʻlni –qoʻlga berib, ona tabiatni asray olsakkina uni musaffo havosi, toza suvi, ona zaminning serhosil neʼmatlaridan bahra ololamiz. Bugun bir chiqindixonani faoliyatini toʻxtatishga erishdik, ertaga ommaviy xalq bilan birga kurashsak tabiatni turli chiqindilar qurshovidan asrashga ham kuchimiz va qudratimiz etadi.

“Adolat”SDP

Farg’ona viloyat kengashi Matbuot xizmati.