Aholi muammolari deputat ishtirokida hal etilmoqda

Yurtimizda aholi bilan doimiy muloqotni yoʻlga qoʻyish, ularning muammolarini oʻz vaqtida hal etishda partiyamiz deputatlarining hissasi tobora oshayotganligi quvonarlidir. Bunday natijalarning qayd etilishida fuqarolarimizning huquqiy ongi va madaniyatining yuqori surʼatda oʻsib borayotganligi hamda deputatlarimizning faolligi muhim oʻrin egallamoqda. Ana shunday fidoyi va jonkuyar deputatlarimizdan biri partiyaning Navoiy viloyat Kengashi raisi, xalq deputatlari viloyat Kengashi deputati R.Xayitovdir.

Joriy yilning 25-iyul kuni R.Xayitovga Navoiy shahridagi “Tinchlik” MFYda istiqomat qiluvchi fuqaro Gulshad Tuksanova hayotida yuzaga kelayotgan bir qator muammolarni bartaraf etish amaliy yordam soʻrab murojaat etdi.Deputat ushbu muammoni joyiga chiqib oʻrganish va zarur choralarni koʻrish maqsadida murojaatchining xonadonida boʻldi. Maʼlum boʻlishicha fuqaro G.Tuksanovaning 2022-yilda turmush oʻrtogʻi vafot etganligi, bir nafar farzandi borligi, mahallada boquvchisini yoʻqotgan yolgʻiz ona sifatida roʻyxatda turishi aniqlandi.Tabiiyki, turmush oʻrtogʻining bevaqt vafoti, oʻzining ishsizligi hamda davlat tomonidan tayinlangan nafaqaning kamligi fuqaro G.Tuksanovaning ahvolini tang qilib qoʻygan.

Davlat tomonidan boquvchisini yoʻqotganlik uchun tayinlangan nafaqa miqdori bor yoʻgʻi 863 000 soʻmni tashkil etib, butun roʻzgʻor tashvishlarni ushbu nafaqa puliga qarab qolgan. Nafaqa pullari ham 2 yildan buyon davlat tomonidan pensiya va ish haqlarining miqdori bir necha marotaba oshganligiga qaramasdan, uning nafaqa pullari miqdori oshirilmagan. Shuningdek, oʻzi yashayotgan mahalla fuqarolar yigʻini tomonidan biror marta bir martalik moddiy yordam ajratish va yashash xonadonini taʼmirlash, Navoiy shahridagi “Tinchlik” MFY hududidagi “Oʻzbekiston temiryoʻllar” AJga qarashli “Tinchlik” lokomotiv deposiga farroshlik vazifasiga ishga joylashtirishda amaliy yordam berishni soʻradi.

Deputat R.Xayitov tomonidan fuqaro G.Tuksanovaning 2022-yilda vafot etgan turmush oʻrtogʻi uchun tayinlangan nafaqa puli miqdorini nima sababdan oshirilmaganligi boʻyicha viloyat Pensiya jamgʻarmasiga deputatlik soʻrovi yuborildi. Navoiy shahridagi “Tinchlik” MFY tomonidan bir martalik moddiy yordam berilmayotganligi boʻyicha xalq deputatlar Navoiy shahar Kengashiga xat yuborildi.

Fuqaro boshqa murojaatlarini ham ijobiy hal etish boʻyicha tegishli mutasaddi tashkilotlar bilan hamkorlikda chora-tadbirlar belgilanmoqda.

“Adolat” SDP

Navoiy viloyat Kengashi Matbuot xizmati.