Aholi talabi asosida

Maʼlumki, saylovchilar bilan uchrashuvlar oʻtkazish, ularning murojaatlarini oʻrganish, mavjud muammolarning yechimini topishga intilish-deputatning asosiy vazifalaridan biri. Oliy Majlis Qonunchilik Palatasidagi “Adolat” SDP fraksiyasi aʼzosi Dilmurod Ismoilov oʻz faoliyatini ayni shu qoidalar asosida tashkil etmoqda. Uning har oyda oʻz saylovchilari bilan muloqotlarida turli-tuman masalalar koʻtariladi. Ularning barchasi hisobga olinadi, hal etish boʻyicha rejalar ishlab chiqiladi.

“Atangan guzar” — Namangan shahrining nisbatan kenja mahallalaridan. Yangiqoʻrgʻon tumaniga qoʻshni hududda, markazdan bir muncha olisda joylashgan. Oʻtgan yil oxirlarida deputatimiz mahalla ahli bilan uchrashuv oʻtkazgandi. Oʻshanda aholi turmush darajasini oshirish boʻyicha qator mulohazalar bildirilgandi. Ular orasida elektr taʼminotini yaxshilash, ichki yoʻllarni asfaltlash, tibbiy xizmat koʻrsatish uchun qulay shart-sharoitlar yaratish kabilar bor edi.

— Kuni kecha parlament aʼzosining saʼy-harakati bilan aholi talabini qondirish yoʻlida dastlabki qadam qoʻyildi, — deydi Qonunchilik Palatasi deputatining yordamchisi Akmaljon Haydarov.

— Mahallaning markaziy koʻchalaridan biridagi nim-stansiyani yangilash boshlandi. ishga tushgach, elektr quvvati taʼminoti keskin yangilanadi, barqarorlik taʼminlanadi. Transformator oʻrnatish va sozlash ishlarini mahalliy elektr tarmoqlari korxonasi mutaxassislari bajarmoqdalar.

Albatta, aholi talabini qondirish oson kechgani yoʻq. Deputat bir qator idoralar rahbarlari huzurida boʻldi. Respublika energetika vaziri Joʻrabek Mirzamahmudov koʻmagida muammo yechimi topildi. Mahalla uchun yangi, kuchliroq quvvatga ega transformator ajratildi. Tez orada ishga tushiriladi.

Ayni vaqtida “Atangan guzar”da yashovchilarning boshqa talablari ustida ham ish olib borilmoqda. Yaqinda ichki yoʻllarni asfaltlashga kirishiladi. Hozir loyiha — smeta hujjatlari tayyorlanmoqda.

Mahalladagi poliklinika filialini taʼmirlash ham kun tartibida turibdi. Masala viloyat sogʻliqni saqlash boshqarmasi va shahar hokimligi oldiga qoʻyilgan. Uning ijrosi nazoratga olingan.

Nurbek Abdullaev,

 “Adolat” SDP Namangan viloyat

 Kengashi matbuot kotibi.