Aholining murojaatlari oʻz yechimini topadigan boʻldi

Ayni kunlarda Xalq deputatlari Surxondaryo viloyat Kengashi deputati Rustam Hamrayev Shoʻrchi tumanida boʻlib saylovchilar bilan yuzma- yuz muloqotlar qilmoqda. Xususan, tumandagi “Tamaddun” mahalla fuqarolar yigʻinida saylovchilar bilan uchrashib, ularning fikrlarini, takliflarini, turli masalalardagi murojaatlarni joyiga chiqqan holda oʻrganyapti.

Deputat mahalladagi ijtimoiy obyektlardan 11-sonli maktabgacha taʼlim tashkilotini oʻrganish chogʻida mazkur bogʻcha oʻtgan asrning 57- yillarida dastavval kolxoz idorasi sifatida qurilib, soʻng bogʻcha tipiga aylantirilgani va ayni damda oʻta taʼmir talabligi aniqlandi. Xalq vakili mutasaddi bilan shu yerning oʻzida masalaga yechim topish maqsadida mazkur bogʻchani qayta taʼmirlash uchun kelgusi yilgi davlat dasturiga kiritish boʻyicha koʻrsatmalar berildi.

Shuningdek, deputatimiz aholi bilan boʻlgan yuzma yuz muloqotlarda mazkur mahallada 15 ta ichki koʻchalar mavjudligi, shundan oltitasi taʼmirlashga muhtojligini aytib murojaat qilishdi. Shundan mahallaning “Yangi hayot” koʻchasida 1,1 km, “Guliston” koʻchasi 2 km, “Uchqun” koʻchasi 1,1 km toshlanmaganligi, “Doʻstlik” koʻchasida 1 km, “Istiqlol” koʻchasi 1,4 km, “Nurafshon” koʻchasi 1,2 km asfaltlanishi uchun amaliy yordam berishini aytib murojaat qilishdi. Deputat mazkur muammolarni oʻrganib tuman hokimligiga deputatlik soʻrovi yubordi.

Yana shuningdek, mazkur mahallaning “Guliston” koʻchasidagi xonadonlarga olib boruvchi ichimlik suvi quvurlari yaroqsiz holga kelganligi, shu sababli 1,5 km. joyga suv chiqmay qolganligi, bundan tashqari yana 3 km.ga suv quvurlari yangisiga almashtirilishi zarurligi toʻgʻrisida murojaatlar boʻldi. Deputat mazkur muammoni ham oʻrganib chiqib tuman “Suvoqova” unitar korxonasi rahbarlariga murojaat qildi va rahbariyat tomonidan mazkur suv quvurlari tez kunda yangisiga almashtirilishi maʼlum qilindi.

Oʻrganishlar davomida “Tamaddun” mahallasining “Obihayot” koʻchasidagi 6 dona, “Nurafshon” koʻchasida 2 dona, “Guliston” koʻchasida 4 dona, “Uchqun” va “Farovon” koʻchalarida 35 dona yuqori kuchlanishga ega elektr toki uchun oʻrnatilgan simyogʻochlar yaroqsiz boʻlib qolganligi tufayli beton yoki metall elektr ustunlariga almashtirish lozimligi aniqlandi. Deputat ushbu muammoni hal qilish uchun tuman elektr korxonasiga murojaat bilan chiqdi va korxona mutasaddilari tez orada muammoni bartaraf etishlarini maʼlum qilishdi.

Yuzma- yuz muloqotlar jarayonida mazkur mahallada istiqomat qiluvchi fuqaro Goʻzal Abdullayeva “Ayollar daftari”ga kiritilgan boʻlib, 5 farzandi borligi, turmush oʻrtogʻi 2-guruh nogironi ekanligini, ayni paytda yashash xonadoni ikki xonadan iborat boʻlib yangi uyga muhtojligini shu xususda amaliy yordam soʻrab murojaat qildi. Deputat mazkur masalani hal qilishni soʻrab tuman hokimligiga deputatlik soʻrovi yubordi.

Shuningdek, ushbu mahalla fuqarosi Kimyo Bekmurodova ham “Ayollar daftari”ga kiritilgan boʻlib turmush oʻrtog'i B.Roʻziyev 1- guruh nogironi ekanligini, unda hozir ikki buyrak almashtirishga muhtojligini, donor ayolning oʻzi hisoblanib ayni paytda jarrohlik amaliyoti uchun mablagʻ zarurligini, shu masalada amaliy yordam berishlarini soʻrab murojaat qildi.

Deputat mazkur muammo yuzasidan viloyat Sogʻliqni saqlash boshqarmasiga murojaat bilan chiqdi va mutasaddilar tomonidan muammo tezda hal qilinib jarrohlik amaliyoti oʻtkazilishi bildirildi.

Shuningdek, deputat hududlarni oʻrganish chogʻida Yangi Konstitutsiya loyihasiga doir oʻzgarishlar xususida ham targʻibot tadbirlari olib borib, fuqarolarni 30 aprel kuni boʻlib oʻtadigan Referendumda faol qatnashishga chaqirdi.

Deputatning hududlardagi oʻrganishlari davom etmoqda.

Gulshod Tursoatova,

Oʻzbekiston “Adolat” SDP Surxondaryo viloyat Kengashi matbuot kotibi.